ກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ພາຍໃຕ້ຄຳຂວັນ: “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ໄດ້ອັດລົງດ້ວຍຜົນສຳເລັດຢ່າງຈົບງາມ ໃນຕອນບ່າຍ ວັນທີ 21 ຕຸລາ 2024 ພາຍຫລັງດຳເນີນມາແຕ່ວັນທີ 18 ຕຸລາ 2024, ນະຄອນຫລວງວຽງຈັນ ສປປ ລາວ ໂດຍການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ລາວ ແລະ ປະທານໄອປາ ຄັ້ງທີ 45.
ທ່ານ ໄຊສົມພອນ ພົມວິຫານ ກ່າວອັດກອງປະຊຸມຄັ້ງນີ້ວ່າ: ສປປ ລາວ ມີຄວາມຍິນດີ ແລະ ພາກພູມໃຈ ທີ່ໄດ້ຮັບກຽດເປັນເຈົ້າພາບ ແລະ ປະທານກອງປະຊຸມ ໄອປາ ຄັ້ງທີ 45 ໄດ້ປຶກສາຫາລື ແລະ ຕົກລົງຫລາຍຫົວຂໍ້ສໍາຄັນ ຕາມພາລະບົດບາດຂອງຕົນ ເພື່ອເປັນການສົ່ງເສີມ ແລະ ຮັດແໜ້ນການຮ່ວມມື ໃນຂະແໜງການນິຕິບັນຍັດ ກໍຄື ເພື່ອປະກອບສ່ວນເຂົ້າໃນຂະບວນການການ ສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ນຳເອົາຜົນປະໂຫຍດມາສູ່ປະຊາຊົນ ກໍຄືການປະກອບສ່ວນເຂົ້າໃນພາລະ ກິດລວມແຫ່ງການປົກປັກຮັກສາ ແລະ ສົ່ງເສີມ ສັນຕິພາບ, ສະຖຽນລະພາບ ແລະ ຄວາມສົມບຸນພູນສຸກຂອງພາກພື້ນ.
ບັນດາຍັດຕິທີ່ໄອປາ ໄດ້ຮັບຮອງເອົາໃນໂອກາດກອງປະຊຸມຄັ້ງນີ້, ກວມເອົາຂົງເຂດການເມືອງ, ເສດຖະກິດ, ສັງຄົມ, ແມ່ຍິງ, ຊາວໜຸ່ມ, ວຽກງານພາຍໃນ, ກອງປະຊຸມລະຫວ່າງອາຊຽນ ແລະ ໄອປາ ເຊິ່ງຈະເປັນເອກະສານພື້ນຖານສຳຄັນ ສຳລັບການຜັນຂະຫຍາຍຄຳຂວັນສຳລັບການເປັນປະທານໄອປາ ຄັ້ງທີ 45 ຂອງ ສປປ ລາວ ໃນປີ 2024.
ນອກຈາກນີ້, ກໍໄດ້ມີກອງປະຊຸມຮ່ວມລະຫວ່າງ ໄອປາ ກັບ ລັດຖະສະພາປະເທດສັງເກດການ ເພື່ອເພີ່ມທະວີການຮ່ວມມື, ການສະໜັບສະໜູນ, ແກ້ໄຂບັນຫາທີ່ເກີດຂຶ້ນ ແນໃສ່ຮັບປະກັນການເຊື່ອມຈອດ ແລະ ການເຕີບໂຕແບບກວມລວມ, ຊຶ່ງປະທານກອງປະຊຸມແຕ່ລະກຳມາທິການປະຈຳ ໄດ້ລາຍງານຈະແຈ້ງຄົບຖ້ວນແລ້ວ.
ຮຽກຮ້ອງບັນດາສະມາຊິກລັດຖະສະພາລະຫວ່າງຊາດອາຊຽນ, ລັດຖະສະພາປະເທດສັງ ເກດການ ແລະ ຄູ່ຮ່ວມພັດທະນາໄອປາ ນຳເອົາເນື້ອໃນຈິດໃຈສຳຄັນຂອງບັນດາມະຕິຕ່າງໆ ກໍຄື ຄຳຕົກລົງຂອງກອງປະຊຸມ ໄປເຜີຍແຜ່ ແລະ ເຊື່ອມສານເຂົ້າໃນວຽກງານຂອງຕົນໃຫ້ປະກົດຜົນເປັນຈິງ, ສາມາດປະເມີນໄດ້ ແລະ ມີການລາຍງານຢ່າງເປັນລະບົບ.
ທັງນີ້, ກໍເພື່ອຍົກສູງບົດບາດຂອງໄອປາ ໃນການຊຸກຍູ້ສົ່ງເສີມ ການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ການສົ່ງ ເສີມປະຊາຄົມອາຊຽນ ໃຫ້ເຂັ້ມແຂງ ແລະ ເຮັດໃຫ້ເສດຖະກິດອາຊຽນມີຄວາມເຂັ້ມແຂງ, ເປີດກວ້າງ, ປະຊາຄົມມີຄວາມສາມັກ ຄີປອງດອງ, ມີການພັດທະນາທີ່ເທົ່າທຽມກັນ, ຊີວິດການເປັນຢູ່ຂອງປະຊາ ຊົນດີຂຶ້ນ ແລະ ພ້ອມກັນກ້າວໄປຂ້າງໜ້າ.
ພ້ອມນີ້, ທ່ານ ຍັງໄດ້ສະແດງຄວາມຂອບໃຈຢ່າງຈິງໃຈ ມາຍັງບັນດາລັດຖະສະພາປະເທດສະມາຊິກໄອປາ, ລັດຖະສະພາສັງເກດການ, ກອງເລຂາໄອປາ, ສະພາແຫ່ງຊາດລາວ ແລະ ທຸກພາກສ່ວນທີ່ກ່ຽວຂ້ອງ ທັງພາຍໃນ ແລະ ຕ່າງປະເທດ ທີ່ໄດ້ໃຫ້ການສະໜັບສະໜູນຊ່ວຍເຫລືອ ສປປ ລາວ ໃນການ ປະຕິບັດໜ້າທີ່ ອັນມີກຽດສະຫງ່າດັ່ງກ່າວ ດ້ວຍຜົນສຳເລັດອັນຈົບງາມ ແລະ ທ່ານຍັງສະແດງຄວາມເຊື່ອໝັ້ນວ່າ ພາຍໃຕ້ການເປັນປະທານໄອປາຂອງປະເທດມາເລເຊຍ ໃນຄັ້ງຕໍ່ໄປຈະປະສົບຜົນສຳເລັດໃຫຍ່ຫລວງກວ່າເກົ່າ.
(ສອງ). ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດແຫ່ງ ສປປ ລາວ ແລະ ປະທານໄອປາ ຄັ້ງທີ 45 ໄດ້ຖະແຫລງກ່ຽວກັບຜົນສຳເລັດຂອງການເປັນເຈົ້າພາບຈັດກອງປະຊຸມສະ ມັດຊາໃຫຍ່ລັດຖະສະພາລະຫວ່າງຊາດອາຊຽນ ຫລື ໄອປາ ຄັ້ງທີ 45 ຢູ່ຫໍປະຊຸມແຫ່ງຊາດ, ນະຄອນຫລວງວຽງຈັນໃນວັນທີ 21 ຕຸລາ 2024 ນີ້ ທ່ານໃຫ້ຮູ້ວ່າ:
ກອງປະຊຸມໄອປາ-45 ໄດ້ຈັດຂຶ້ນຢ່າງເປັນທາງການ ໃນລະຫວ່າງວັນທີ 17-23 ຕຸລາ 2024, ພາຍໃຕ້ຫົວຂໍ້ “ບົດບາດຂອງລັດຖະສະພາ ໃນການຊຸກຍູ້ການ ເຊື່ອມຈອດ ແລະ ການເຕີບໂຕແບບກວມລວມ ຂອງອາຊຽນ’’ ໂດຍການເປັນປະທານຂອງປະທານສະພາແຫ່ງຊາດ ແຫ່ງ ສປປ ລາວ. ກອງປະຊຸມໄດ້ ຮັບກຽດຢ່າງສູງທີ່ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ເຂົ້າຮ່ວມ ແລະ ກ່າວສູນທອນພົດ ຕໍ່ພິທີເປີດກອງປະຊຸມ.
ກອງປະຊຸມຄັ້ງນີ້ ໄດ້ມີຄະນະຜູ້ແທນນຳໂດຍ ບັນດາປະທານຈາກ ລັດຖະສະພາສະມາຊິກໄອປາ 08 ປະເທດ ອິນໂດເນເຊຍບໍ່ໄດ້ສົ່ງຄະນະຜູ້ແທນເຂົ້າ ເນື່ອງຈາກມີການກະກຽມເລືອກຕັ້ງພາຍໃນ, ສ່ວນປະເທດມຽນມາ ແມ່ນຍັງບໍ່ທັນມີສະພາແຫ່ງຊາດ ຈຶ່ງໄດ້ສົ່ງແຕ່ຜູ້ຕາງໜ້າເຂົ້າຮ່ວມ, ລັດຖະສະພາສັງເກດການ 15 ປະເທດເຂົ້າຮ່ວມ, ແຂກເຈົ້າພາບ 03 ປະເທດເຂົ້າຮ່ວມ, ຄູ່ຮ່ວມພັດທະນາໄອປາ 08 ພາກສ່ວນ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ, ທຸຕານຸທູດ ປະຈຳ ສປປ ລາວ ແລະ ຄະນະຜູ້ແທນ ສປປ ລາວ ເຈົ້າພາບ ລວມທັງໝົດ ປະມານ 600 ທ່ານ ເຂົ້າຮ່ວມ.
ໃນວາລະດຳເນີນກອງປະຊຸມສະມັດຊາໃຫຍ່ ໄອປາ-45 ໃນຄັ້ງນີ້ ໄດ້ມີກອງປະຊຸມຕ່າງໆ ທັງໝົດ 11 ກອງປະຊຸມ ດັ່ງລາຍລະອຽດດັ່ງນີ້:
– ກອງປະຊຸມຄະນະບໍລິຫານງານໄອປາ;
– ກອງປະຊຸມກຳມາທິການການເມືອງ;
– ກອງປະຊຸມກຳມາທິການເສດຖະກິດ;
– ກອງປະຊຸມກຳມາທິການວຽກງານສັງຄົມ;
– ກອງປະຊຸມກຳມາທິການວຽກງານຈັດຕັ້ງພາຍໃນ;
– ກອງປະຊຸມກຳມາທິການສະມາຊິກສະພາເພດຍິງ;
– ກອງປະຊຸມສະມາຊິກລັດຖະສະພາໜຸ່ມໄອປາ;
– ກອງປະຊຸມກຳມາທິການຖະແຫຼງການຮ່ວມ;
– ກອງປະຊຸມພົບປະ ລະຫວ່າງ ກອງເລຂາໄອປາ ແລະ ກອງເລຂາອາຊຽນ;
– ກອງປະຊຸມພົບປະກັບລັດຖະສະພາສັງເກດການ;
– ກອງປະຊຸມເວທີຜູ້ນຳການເມືອງເພດຍິງ;
ໃນກອງປະຊຸມສະມັດຊາໃຫຍ່ ໄອປາ-45, ບັນດາທ່ານປະທານລັດຖະສະພາ ແລະ ຫົວໜ້າຄະນະຜູ້ແທນແຕ່ລະປະເທດ ໄດ້ກ່າວປາໄສ ພາຍໃຕ້ກອບຫົວຂໍ້ກອງປະຊຸມ ໂດຍໄດ້ຍົກໃຫ້ເຫັນ ສະພາບການຂອງໂລກ ພາກພື້ນ ຊຶ່ງມີທັງກາລະໂອກາດ ແລະ ສິ່ງທ້າທາຍ. ພ້ອມກັນນີ້ ກໍໄດ້ຢໍ້າຄືນຄວາມໝາຍໝັ້ນຂອງຜູ້ນຳລັດຖະສະພາສະມາຊິກໄອປາທີ່ຈະຕ້ອງເພີ່ມທະວີບົດບາດລັດຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມ ຂອງອາຊຽນ.
ນອກຈາກນີ້, ໃນກອງປະຊຸມກຳມາທິການປະຈຳຕ່າງໆ ຂອງໄອປາ ກໍໄດ້ລົງເລີກຄົ້ນຄວ້າປຶກສາຫາລື,ພິຈາລະນາ ແລະ ຮັບຮອງເອົາຮ່າງມະຕິ ທັງໝົດ 37 ສະບັບ. ໃນນີ້ ຂົງເຂດວຽກງານການເມືອງ ມີ 04 ສະບັບ, ຂົງເຂດວຽກງານເສດຖະກິດ ມີ 08 ສະບັບ, ຂົງເຂດວຽກງານສັງຄົມ ມີ 05 ສະບັບ, ວຽກງານເພດຍິງ ມີ 02 ສະບັບ, ວຽກງານຊາວໜຸ່ມ ມີ 03 ສະບັບ ແລະ ວຽກງານຈັດຕັ້ງພາຍໃນໄອປາ ມີ 15 ສະບັບ ແລະ ໃນຕອນທ້າຍຂອງກອງປະຊຸມ, ບັນດາຫົວໜ້າຄະນະຜູ້ແທນສະມາຊິກລັດຖະສະພາໄອປາ ໄດ້ລົງນາມໃສ່ຖະແຫຼງການຮ່ວມກອງປະຊຸມສະມັດຊາໃຫຍ່ ໄອປາ-45.
ກອງປະຊຸມສະມັດຊາໃຫຍ່ ໄອປາ ຄັ້ງນີ້ ຍັງໄດ້ພິຈາລະນາຮັບ ຮອງເອົາປະເທດມາເລເຊຍ ເປັນເຈົ້າພາບຈັດກອງປະຊຸມສະມັດຊາໃຫຍ່ ໄອປາ ຄັ້ງຕໍ່ໄປ ໃນປີ 2025.