ກົມຕໍາຫລວດກວດຄົນ ເຂົ້າ-ອອກ ເມືອງ ກະຊວງປ້ອງກັນຄວາມສະຫງົບ ມີຄວາມພ້ອມຮ້ອຍສ່ວນຮ້ອຍໃນການຕ້ອນຮັບຜູ້ຄົນທັງພາຍໃນເເລະຕ່າງປະເທດທີ່ຈະເດີນທາງຜ່ານ ເຂົ້າ-ອອກ ຜ່ານດ່ານສາກົນເເຫ່ງຕ່າງໆໃນຂອບເຂດທົ່ວປະເທດ ພາຍຫລັງທີ່ລັດຖະບານອະນຸຍາດໃຫ້ເປີດດ່ານສາກົນທຸກແຫ່ງນັບເເຕ່ ວັນທີ 9 ພຶດສະພາ ເປັນຕົ້ນໄປ ເພື່ອຫລຸດຜ່ອນຜົນກະທົບຈາກການລະບາດຂອງພະຍາດ ໂຄວິດ19.
ພັນເອກ ສາຍສະຫມີງ ສີວິໄລ ຫົວຫນ້າກົມຕໍາຫລວດກວດຄົນເຂົ້າ-ອອກເມືອງ ກະຊວງປ້ອງກັນຄວາມສະຫງົບໃຫ້ສໍາພາດ ຕອນແລງໃນ ວັນທີ 9 ພຶດສະພາ 2022 ນີ້ວ່າ: ປະຕິບັດຕາມທິດຊີ້ນໍາຂອງລັດຖະບານ ກ່ຽວກັບມາດຕະການ ເຂົ້າ-ອອກ ລາວ ແລະ ມາດຕະການຜ່ອນຜັນພາຍໃນປະເທດ ໃນໄລຍະມີການລະບາດຂອງພະຍາດ ໂຄວິດ-19 ສະບັບໃຫມ່ ທີ່ມີການຖະເເຫລ່ງຂ່າວໃນ ວັນທີ 7 ພຶດສະພາ ນີ້ ຢູ່ກະຊວງສາທາລະນະສຸກ ກົມຕໍາຫລວດກວດຄົນເຂົ້າ-ອອກເມືອງ ໄດ້ສົມທົບກັບພາກສ່ວນກ່ຽວຂ້ອງຈັດຕັ້ງປະຕິບັດການເປີດດ່ານສາກົນທົ່ວປະເທດຈໍານວນ 32ເເຫ່ງ ໃນນີ້ສະເພາະດ່ານສາກົນຂົວມິດຕະພາບ ລາວ-ໄທ ເເຫ່ງທີ 1 ເເລະ ສະຫນາມບີນສາກົນວັດໄຕ ພາຍຫລັງມີການເປີດດ່ານຢ່າງເປັນທາງການ ໃນວັນທີ 9 ພຶດສະພາ ນີ້ ເຫັນວ່າບັນຍາກາດໂດຍລວມຍັງບໍ່ຄຶກຄື້ນເທົ່າທີ່ຄວນເນື່ອງຈາກເປັນມື້ທໍາອິດ ເເຕ່ໃນການປະຕິບັດຫນ້າທີ່ຂອງເຈົ້າຫນ້າທີ່ກ່ຽວຂ້ອງທີ່ປະຈໍາຢູ່ດ່ານ ເເມ່ນມີຄວາມພ້ອມຮ້ອຍສ່ວນຮ້ອຍ ທີ່ຈະໃຫ້ບໍລິການປະຊາຊົນ ໂດຍນໍາໃຊ້ເຕັກນິກທີ່ທັນສະໄຫມລວມເຖີງສີ່ງອໍານວຍຄວາມສະດວກດ້ານຕ່າງໆ.
ພັນເອກ ສາຍສະຫມີງ ສີວິໄລໃຫ້ສໍາພາດຕື່ມວ່າ: ສໍາລັບປະຊາຊົນທັງພາຍໃນເເລະຕ່າງປະເທດທີ່ມີຈຸດປະສົງເດີນທາງໄປຕ່າງປະເທດ ຫລືເດີນທາງກັບຄືນປະເທດໃຫ້ປະຕິບັດຕາມການເເນະນໍາຂອງເຈົ້າຫນ້າທີ່ກ່ຽວຂ້ອງທີ່ປະຈໍາຢູ່ດ່ານສາກົນເເຕ່ລະເເຫ່ງ ສີ່ງສໍາຄັນຕ້ອງກວດກາເອກະສານທີ່ຈໍາເປັນໃຫ້ຄົບຖ້ວນ ໂດຍສະເພາະຫນັງສືເດີນທາງ, ໃບຢັ້ງຢືນການສັກວັກຊີນ ລວມເຖີງເອກະສານກ່ຽວຂ້ອງຕ່າງໆທີ່ມີຢູ່ໃນເເຈ້ງການຂອງລັດຖະບານກ່ຽວກັບມາດຕະການຜ່ອນຜັນສະບັບໃຫມ່ ພ້ອມທັງປະຕິບັດມາດຕະການປ້ອງກັນພະຍາດ ໂຄວິດ19 ຢ່າງເຂັ້ມງວດ ຕາມການເເນະນໍາຂອງເຈົ້າຫນ້າທີ່ ສໍາລັບການ ເຂົ້າ-ອອກ ດ່ານສາກົນຂົວມິດຕະພາບລາວໄທເເຫ່ງທີ 1 ໃນວັນທີ 9ພຶດສະພານີ້ ເຊີ່ງເປັນມື້ທໍາອິດ ຂອງປະຊາຊົນທັງພາຍໃນເເລະຕ່າງປະເທດມາຮອດເວລາ 16 ໂມງມີເຖີງ 376 ຄົນໃນນີ້ສະເພາະຂາເຂົ້າມີ 159 ຄົນ ແລະຂາອອກມີ 217 ຄົນ. ສ່ວນດ່ານສະໜາມບິນສາກົນວັດໄຕ ວັນທີ 9 ພຶດສະພາ ນີ້ ແມ່ນບໍ່ມີຖ້ຽວບິນ ແຕ່ເລີ່ມແຕ່ວັນທີ 10 ພຶດສະພາ ເປັນຕົ້ນໄປ ຈະມີຖ້ຽວບິນຂາອອກ ແລະຂາເຂົ້າເປັນປົກກະຕິ.
ຂໍ້ມູນຂ່າວ: ເດດອາລຸນ ແກ້ວວິໄລ
ພາບ: ຄໍາກອງ ກິດຕິຄຸນ