ແຂວງອຸດົມໄຊ ໄດ້ຈັດພິທີຈູດທຳລາຍຢາເສບຕິດ ຫຼາຍປະເພດ ເນື່ອງໃນໂອກາດວັນແຫ່ງຊາດ ຕ້ານຢາເສບຕິດ ຄົບຮອບ 22 ປີ ໃນວັນທີ 12 ຕຸລາ 2023 ຢູ່ເຂດພື້ນທີ່ສະໜາມກິລາແຂວງ, ເຂົ້າຮ່ວມຂອງ ທ່ານ ສົມຈິດ ປັນຍາສັກ ຮອງເຈົ້າແຂວງ, ພົຈວ ສີວອນ ໄຊຍະວົງ ຫົວໜ້າກອງບັນຊາການ ປກສ ແຂວງອຸດົມໄຊ, ມີພາກສ່ວນທີ່ກ່ຽວຂ້ອງເຂົ້າຮ່ວມ.
ພັອ ດວງຈັນ ໄຊວຸດ ຮອງຫົວໜ້າກອງບັນຊາການ ປກສ ແຂວງອຸດົມໄຊ ລາຍງານໃຫ້ຮູ້ວ່າ: ຢາເສບຕິດທີ່ມາຈູດທຳລາຍຄັ້ງນີ້ ແມ່ນຢາເສບຕິດທີ່ສານປະຊາຊົນໄດ້ຕັດສິນຄະດີຢ່າງເດັດຂາດ, ໃນນັ້ນ ມີເຮໂລອິນ 29,03 ກິໂລກຣາມ, ຢາບ້າ 2.608.991 ເມັດ ນໍ້າໜັກ 306,68 ກິໂລກຣາມ, ຢາບ້າເປັນແປ້ງຝຸ່ນສີແດງຍັງບໍ່ທັນໄດ້ອັດເປັນເມັດນໍ້າຫນັກ 9,08 ກິໂລກະລາມ, ຢາໄອ້ 3 ຫໍ່, ນ້ຳໜັກ 3 ກິໂລກຣາມ, ເຄຕາມິນ ນ້ຳໜັກ 13,9 ກຣາມ, ກັນຊາອັດແຫ້ງ 1 ແທ່ງ ນໍ້າໜັກ 1 ກິໂລກຣາມ, ແປ້ງຝຸ່ນ 142,69 ກິໂລກຣາມ, ນໍ້າຢາເຄມີ 6 ແກ້ດ, ສີປະສົມອາຫານ 3 ເປົາ ແລະ ຖົງຢາງໃສ່ຢາບ້າ ( ຖົງເປົ່າ ) 5 ເປົ້າ ໜັກ 89,8 ກິໂລກຣາມ, ຢາຝິ່ນ ນໍ້າຫນັກ 11 ກິໂລກຣາມ ແລະ ເປືອກຫມາກຝິ່ນ ນໍ້າຫນັກ 17 ກິໂລກຣາມ.
ດັ່ງນັ້ນ ເພື່ອເຮັດໃຫ້ການຄວບຄຸມ, ສະກັດກັ້ນ ແລະ ຕ້ານ ບັນຫາຢາເສບຕິດ ໃຫ້ມີປະສິດທິພາບ ຄະນະພັກ, ອົງການປົກຄອງແຕ່ລະຂັ້ນ ແລະ ປະຊາຊົນບັນດາເຜົ່າ ຄວນເອົາໃຈໃສ່ບາງບັນຫາສຳຄັນ ເປັນຕົ້ນແມ່ນ: ວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ຕ້ອງຢູ່ໃຕ້ການຊີ້ນຳ-ນຳພາ ໂດຍກົງ, ຮອບດ້ານ ແລະ ເດັດຂາດຂອງພັກ ແລະ ຫຼັກການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຖືເອົາການຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນໜ້າທີ່ອັນຮີບດ່ວນ, ປະຈັນບານ ໃນສະເພາະໜ້າ ແລະ ຍາວນານ ຂອງກຳລັງປ້ອງກັນຄວາມສະຫງົບ ໂດຍປະສານສົມທົບກັບຂະແໜງການຕ່າງໆ ນັບທັງສູນກາງ ແລະ ທ້ອງຖິ່ນ ຕະຫຼອດຮອດຄອບຄົວ ແລະ ທຸກຊັ້ນຄົນໃນສັງຄົມ ບັນຫາສຳຄັນ ແມ່ນການເພີ່ມທະວີວຽກງານໂຄ ສະນາ, ປຸກລະດົມ ທຸກຊັ້ນຄົນໃນສັງຄົມ ໃຫ້ເປັນເຈົ້າການເຂົ້າຮ່ວມວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ຢ່າງແຂງແຮງ, ປະກອບອຸປະກອນເຕັກນິກ-ເຕັກໂນໂລຊີ ທີ່ທັນສະໄໝ ແລະ ຈຳເປັນ ເພື່ອຮັບໃຊ້ເຂົ້າໃນວຽກງານໃຫ້ມີປະສິດທິຜົນສູງ.