ຕາມການລາຍງານຈາກ ທ່ານ ພັທ ວິລະພົງ ສະເໜ່ຫາ ຫົວໜ້າພະແນກຕຳຫລວດຈະລາຈອນ ປກສ ນະຄອນຫລວງວຽງຈັນ(ນວ) ໃຫ້ສຳພາດ ໃນວັນທີ 17 ເມສາ 2023 ວ່າ: ໄລຍະການສະເຫລີມສະຫລອງບຸນປີໃໝ່ ລາວ ແຕ່ວັນທີ 14-16 ເມສາ 2023 ນີ້, ທົ່ວນະຄອນຫລວງວຽງຈັນ, ມີຄະດີອຸບັດເຫດເກີດຂຶ້ນທັງໝົດ 20 ກໍລະນີ, ມີຄົນເສຍຊີວິດ 3 ຄົນ. ໃນນີ້ ເມືອງໄຊເສດຖາ 2 ກໍລະນີ, ເມືອງນາຊາຍທອງ 1 ກໍລະນີ, ເມືອງໄຊທານີ 3 ກໍລະນີ, ເມືອງສີສັດຕະນາກ 2 ກໍລະນີ, ເມືອງສັງທອງ 1 ກໍລະນີ, ເມືອງຈັນທະບູລີ 1 ກໍລະນີ, ເມືອງສີໂຄດຕະບອງ 3 ກໍລະນີ, ເມືອງປາກງື່ມ 1 ກໍລະນີ, ເກີດຂຶ້ນຫລາຍກວ່າໜູ່ ແມ່ນເມືອງຫາຍຊາຍຟອງ 6 ກໍລະນີ, ທຽບໃສ່ປີ 2022 ຫລຸດລົງ 3 ກໍລະນີ.
ທ່ານ ພັທ ວິລະພົງ ສະເໜ່ຫາ ຍັງໃຫ້ຮູ້ອີກວ່າ: ໃນປີນີ້, ກຳລັງຕຳຫລວດຈະລາຈອນ ທົ່ວນະຄອນຫລວງວຽງຈັນ ໄດ້ລົງປ້ອງກັນມີທັງໝົດ 485 ສະຫາຍ, ຍິງ 15 ສະຫາຍ. ໃນນັ້ນ, ມີຈຸດລົງໂຄສະນາ, ປະຈຳຈຸດ-ປະຈຳປ້ອມ, ຈັດລະບຽບກວດກາຕາມສາຍທາງ, ຈຸດກວດກາ ແລະ ຄອຍເຫດ ລວມທັງໝົດມີ 104 ຈຸດ: ຕັ້ງຈຸດກວດກາທັງໝົດມີ 11 ຈຸດ . ໃນນັ້ນ, ມີຈຸດກວດກາ 24 ຊົ່ວໂມງ 5 ຈຸດ: ແຕ່ເສັ້ນທາງ 13 ໃຕ້, ເສັ້ນທາງ 13 ເໜືອ, ເສັ້ນທາງເລກ 10, ເສັ້ນທາງເລກ 11 ແລະ ເສັ້ນທາງທ່າເດື່ອ; ຈຸດລົງໂຄສະນາ 3 ຈຸດ ມີ: ຄິວລົດສາຍໃຕ້-ສາຍເໜືອ ແລະ ເສັ້ນທາງຫລັກ; ຈຸຈັດສັນມີ: ວັດ 9 ຈຸດ, ຈຸດງານຈັດລະບຽບກວດກາຕາມສາຍທາງ 4 ຈຸດ, ປະຈຳການຄອຍເຫດ 10 ຈຸດ, ຈຸດປະຈຳປ້ອມ 67 ປ້ອມ.
ສຳລັບ ສະພາບການສັນຈອນ ຢູ່ນະຄອນຫລວງວຽງຈັນ, ການສັນຈອນຢູ່ນອກເມືອງ ຂາອອກເມືອງ ແມ່ນມີລົດອອກຫລາຍ ໂດຍສະເພາະເສັ້ນທາງເລກ 10, ເລກ 11, 13 ໃຕ້ ແລະ 13 ເໜືອ, ສ່ວນການສັນຈອນພາຍໃນຕົວເມືອງ ໂດຍລວມແຕ່ລະເສັ້ນທາງແມ່ນເບົາບາງ ການສັນຈອນມີຄວາມສະດວກ, ແຕ່ກໍມີບາງເສັ້ນທາງການສັນຈອນສະລໍຕົວຊ້າຢູ່ເຂດວັດເພາະ ມວນຊົນມາສົງພະ ແລະ ຂໍພອນ ຕາມປະເພນີ ໂດຍສະເພາະເສັ້ນທາງເສດຖາທິລາດ ແຕ່ໄຟອຳນາດຫລັກໜຶ່ງ ຫາ ວັດມີໄຊ ຍ້ອນສະຖານທີ່ ຈອດລົດບໍ່ພຽງພໍ ແລະ ເສັ້ນທາງສາມແສນໄທ ແຕ່ຫໍວັດທະນາທຳຫາໄຟອຳນາດສີຫອມ ການສັນຈອນແມ່ນແອອັດຍ້ອນ ມວນຊົນຫລິ້ນນ້ຳ ແລະ ຫົດນ້ຳຢູ່ແຄມທາງ.
ຂ່າວ: ສຸກສະຫວັດ
ຂໍ້ມູນ: ຄອນສະຫວັນ