ຕາມການລາຍງານຂອງ ທ່ານ ພັນເອກ ທະວີສັກ ເພັດພູຫລວງ ຮອງຫົວໜ້າກອງບັນຊາການ ປກສ ແຂວງເຊກອງ ໃຫ້ຮູ້ວ່າ: ໃນປີ 2022 ຜ່ານມາ, ແຂວງເຊກອງ ສາມາດເລີກຮື້ມ້າງຄະດີຢາເສບຕິດໄດ້ 94 ເລື່ອງ, ຈັບຕົວຜູ້ຖືກຫາໄດ້ 108 ຄົນ ແລະ ຢຶດຂອງກາງປະເພດຢາເສບຕິດໄດ້ 86.959 ເມັດ, ພາຫະນະລົດໃຫຍ່ 1 ຄັນ, ລົດຈັກ 31 ຄັນ, ໂທລະສັບ 78 ໜ່ວຍ, ປືນດັດແປງ 2 ກະບອກ, ປືນແກັບ 2 ກະບອກ, ລູກປືນ AK 19 ລູກ, ອຸປະກອນຄວບຄຸມລະເບີດ 2 ອັນ ແລະ ເງິນສົດຈໍານວນໜຶ່ງ.
ພ້ອມນີ້, ໄດ້ລົງເຄື່ອນໄຫວໂຄສະນາກົດໝາຍ ແລະ ຜົນຮ້າຍຂອງຢາເສບຕິດ 115 ຄັ້ງ ມີຜູ້ເຂົ້າຮ່ວມ 8.597 ຄົນ; ສຶກສາອົບຮົມສ້າງບົດບັນທຶກກ່າວເຕືອນຜູ້ເສບ ແລະ ມົ້ວສຸມຢາເສບຕິດຈໍານວນ 1.687 ຄົນ; ນໍາສົ່ງ ຜູ້ເສບ ແລະ ມົ້ວສຸມຢາເສບຕິດໄປບໍາບັດຕາມສູນຕ່າງໆ 19 ຄົນ; ຂຶ້ນເປັນຊີເປົ້າໝາຍຄ້າ-ຂາຍຢາເສບຕິດລາຍໃຫຍ່ 2 ຄົນ, ລາຍກາງ 27 ຄົນ, ລາຍຍ່ອຍ 160 ຄົນ; ເປົ້າໝາຍມົ້ວສຸມເສບຢາເສບຕິດຮຸນແຮງ 358 ຄົນ, ປານກາງ 705 ຄົນ, ເລັກນ້ອຍ 848 ຄົນ; ເກັບກໍາຂຶ້ນບັນຊີການສ້າງບ້ານປອດຢາເສບຕິດໄດ້ 71 ບ້ານ ແລະ ຄອບຄົວ ປອດຢາເສບຕິດ 9.946 ຄອບຄົວ.
ທ່ານຮອງຫົວໜ້າກອງບັນຊາການ ປກສ ແຂວງ ໃຫ້ຮູ້ຕື່ມວ່າ: ເພື່ອສືບຕໍ່ການແກ້ໄຂບັນຫາຢາເສບຕິດໃນປີ 2023 ໃຫ້ມີປະສິດທິພາບ ແລະ ປະສິດທິຜົນ, ກອງບັນຊາການ ປກສ ແຂວງສຸມໃສ່ສຶກສາອົບຮົມການເມືອງ ແນວຄິດໃຫ້ພະນັກງານ-ນັກຮົບ; ເຄື່ອນໄຫວເຜີຍແຜ່ກົດໝາຍ ວ່າດ້ວຍຢາເສບຕິດ ແລະ ຜົນຮ້າຍຂອງຢາເສບຕິດ; ເພີ່ມທະວີປະສານສົມທົບກັບຂະແໜງການກ່ຽວຂ້ອງ, ປຸກລະດົມສະມາຊິກພັກ, ພະນັກງານ-ລັດຖະກອນ, ອົງ ການປົກຄອງທ້ອງຖິ່ນ ຕະຫລອດຮອດປະຊາຊົນບັນດາເຜົ່າ ເປັນເຈົ້າການເຂົ້າຮ່ວມແກ້ໄຂບັນຫາຢາເສບຕິດ; ກວດ ກາປະເມີນຜົນການຄອບຄົວ ແລະ ບ້ານປອດຢາເສບຕິດ ແລະ ສິ່ງສໍາຄັນເຈົ້າໜ້າທີ່ຕ້ອງເປັນເຈົ້າການນໍາໃຊ້ດ້ານກົດ ໝາຍຢ່າງເຂັ້ມງວດ, ຢຶດໝັ້ນ 3 ຫຼັກການ, ດໍາເນີນຄະດີຕ້ອງຮັບປະກັນຄວາມຊັດເຈນ, ຮັດກຸ່ມ ແລະ ຍຸຕິທໍາ.
ຂ່າວ-ພາບ: ສັນຍາ