ໃນວັນທີ 23 ພະຈິກ ຜ່ານມາ, ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ແຂວງສາລະວັນ ຮ່ວມກັບກົມໂຄສະນາການທ່ອງທ່ຽວ ກະຊວງ ຖວທ ໄດ້ຈັດກອງປະຊຸມສໍາມະນາເພື່ອປຶກສາຫາລື, ແລກປ່ຽນທັດສະນະ, ວິທີການໆພັດທະນາ ແລະ ສົ່ງເສີມການທ່ອງທ່ຽວຂອງແຂວງ ແນໃສ່ປັບປຸງສິ່ງອໍານວຍຄວາມສະດວກ ແລະ ການບໍລິການໃຫ້ດີຂຶ້ນ ເປັນຕົ້ນສະຖານທີ່ແຫຼ່ງທ່ອງທ່ຽວ, ສະຖານທີ່ພັກແຮມ, ຂອດບໍລິ ການເພື່ອຮອງຮັບນັກທ່ອງທ່ຽວ, ໂດຍການເປັນປະທານຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນໍາວຽກງານວັດທະນະທຳ-ສັງຄົມ, ມີທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວກະຊວງ ຖວທ ພ້ອມດ້ວຍຜູ້ປະກອບການທຸລະກິດທ່ອງທ່ຽວ ເຂົ້າຮ່ວມ.
ທ່ານ ສົມໃຈ ອຸ່ນຈິດ ກ່າວວ່າ: ພາຍຫຼັງທີ່ລັດຖະບານໄດ້ປະກາດເປີດເສັ້ນທາງການທ່ອງທ່ຽວສີຂຽວ ແລະ ເປີດປະເທດຕ້ອນຮັບນັກທ່ອງທ່ຽວຢ່າງເຕັມຮູບແບບ, ສໍາລັບ ແຂວງ ສາລະວັນ ກໍໄດ້ເປີດບໍລິການຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດໂດຍອີງໃສ່ທ່າແຮງການທ່ອງທ່ຽວທາງທໍາມະຊາດ, ວັດທະນະທໍາ, ປະຫັວດສາດ ແລະ ກະສິກໍາເປັນທ່າແຮງເພື່ອດຶງດູດນັກທ່ອງທ່ຽວເຂົ້າມາຢ້ຽມຢາມແຂວງສາລະວັນ ຊຶ່ງໃນ 9 ເດືອນຕົ້ນປີ 2022 ສາມາດຕ້ອນຮັບນັກທ່ອງທ່ຽວ ຈໍານວນ 75,752 ເທື່ອຄົນ, ທຽບໃສ່ແຜນການປີ 2022 ປະຕິບັດໄດ້ 58%, ພ້ອມດຽວກັນນີ້ແຂວງສາລະວັນໄດ້ເອົາໃຈໃສ່ຈັດຕັ້ງງານເທດສະການເຊັ່ນ: ງານເທດສະການ ໝາກພ້າວນາໄຊ, ງານເທດສະການປີ້ງໄກ່ນາປົ່ງ ແລະ ກິດຈະກໍາການທ່ອງທ່ຽວຕິດພັນກັບວັດທະນະທໍາຮີດຄອງປະເພນີ, ການຜະລິດສິນຄ້າຫັດຖະກໍາ ເພື່ອດຶງດູດນັກທ່ອງທ່ຽວໃຫ້ມາທ່ຽວ ແຂວງ ສາລະວັນ ນັບມື້ນັບເພີ່ມຂຶ້ນ, ກອງປະຊຸມຄັ້ງນີ້ຍັງໄດ້ຕິດພັນກັບພິທີປະກາດຫໍພະໄຕປີດົກເປັນມໍລະດົກແຫ່ງຊາດລະດັບທ້ອງຖິ່ນ.
ກອງປະຊຸມຍັງສ້າງໂອກາດໃຫ້ຜູ້ປະກອບການທຸລະກິດທ່ອງທ່ຽວໄດ້ແລກປ່ຽນ, ຄົ້ນຄວ້າລາຍການທ່ອງ ທ່ຽວເຊື່ອມຕໍ່ກັບບັນດາແຂວງໃກ້ຄຽງພາຍໃນປະເທດ ແລະ ກ້າວໄປສູ່ການສ້າງລາຍການທ່ອງທ່ຽວເຊື່ອມຕໍ່ກັບບັນດາປະເທດໃກ້ຄຽງ ເຮັດໃຫ້ຂະແໜງການທ່ອງທ່ຽວສາມາດເຄື່ອນໄຫວ ແລະ ສ້າງລາຍຮັບ, ສ້າງວຽກເຮັດງານທໍາໃຫ້ແກ່ສັງຄົມ ແລະ ຊຸກຍູ້ຂະແໜງການປິ່ນອ້ອມໃຫ້ມີການພັດທະນາຢ່າງຍືນຍົງ.
ຂ່າວ-ພາບ: ວິໄລວອນ ສິດທິໄຊ