ໃນທຸກໆປີ ທົ່ວໂລກຈະຈັດໃຫ້ມີການສະເຫຼີມສະຫຼອງວັນເດັກໂລກ ເພື່ອເປັນຂີດໝາຍຕໍ່ການໃຫ້ສັດຕະຍາບັນໃນສົນທິສັນຍາວ່າດ້ວຍສິດທິເດັກ ແລະ ເພີ່ມຄວາມຮັບຮູ້ກ່ຽວກັບບັນຫາສຳຄັນທີ່ສົ່ງຜົນກະທົບຕໍ່ຊີວິດເດັກ.
ເນື່ອງໃນໂອກາດວັນເດັກໂລກ 2022 ໃນລະຫວ່າງ ວັນທີ 18 -19 ພະຈິກ 2022 ນີ້ ທີ່ ນະຄອນຫຼວງ ວຽງຈັນ, ການນຳຂັ້ນສູງຂອງລັດຖະບານ ແຫ່ງ ສປປ ລາວ, ທ່ານຮອງເຈົ້າແຂວງຈາກ 18 ແຂວງທົ່ວປະເທດ, ຜູ້ຕາງໜ້າຈາກພາກເອກະຊົນ, ອົງການບໍ່ສັງກັດລັດຖະບານ (NGO), ອົງການຈັດຕັ້ງທາງສັງຄົມ, ອົງການຢູນິເຊັບ ແລະ ເດັກ ໄດ້ເຂົ້າຮ່ວມ ກອງປະຊຸມ ລະດັບສູງ ຂອງຮອງເຈົ້າແຂວງ ໃນທົ່ວປະເທດ ເພື່ອລາຍງານຄວາມຄືບໜ້າໃນການແກ້ໄຂບັນຫາຄວາມທຸກຍາກຂອງເດັກ ຂອງ ສປປ ລາວ.
ວັນເດັກໂລກແມ່ນໄດ້ຈັດຂຶ້ນໃນວັນທີ 20 ພະຈິກ ຂອງທຸກໆປີ ເພື່ອເປັນຂີດໝາຍຂອງການໃຫ້ສັດຕະຍາບັນໃນສົນທິສັນຍາວ່າດ້ວຍສິດທິເດັກ ແລະ ເພື່ອແນໃສ່ສ້າງຄວາມຮັບຮູ້ກ່ຽວກັບບັນຫາສຳຄັນທີ່ສົ່ງຜົນກະທົບຕໍ່ຊີວິດຂອງເດັກ.
ເສີມຕື່ມຈາກຈຸດສຸມໃນປີກາຍ ທີ່ແນໃສ່ການຟື້ນຟູຈາກຜົນກະທົບຂອງພະຍາດໂຄວິດ-19, ຫົວຂໍ້ຂອງການສະເຫຼີມສະຫຼອງວັນເດັກໂລກໃນປີນີ້ ຈະເຫນັ້ນໜັກເຖິງການມີສ່ວນຮ່ວມ ແລະ ການເປັນສວ່ນໜຶ່ງຂອງເດັກນ້ອຍ ໃນຂະບວນການຟື້ນຟູຈາກຜົນກະທົບຂອງການລະບາດຂອງພະຍາດ.
ໃນກອງປະຊຸມລະດັບສູງ, ບັນດາພາກສ່ວນກ່ຽວຂ້ອງໄດ້ນໍາສະເໜີ ຄວາມຄືບໜ້າໃນການຈັດຕັ້ງປະຕິບັດຄຳໝັ້ນສັນຍາທີ່ຜ່ານມາໃນການຫຼຸດຜ່ອນຄວາມທຸກຍາກຂອງເດັກ ໃນລະຫວ່າງປີ 2021 – 2022 ພ້ອມທັງ ທົບທວນຄືນຄວາມເປັນຢູ່ຂອງເດັກນ້ອຍໃນສະພາບການແຜ່ລະບາດຂອງພະຍາດໂຄວິດ-19.
ນອກຈາກກອງປະຊຸມລະດັບສູງ ນີ້ແລ້ວ, ອົງການຢູນິເຊັບ ຍັງໄດ້ຈັດຕັ້ງຫຼາກຫຼາຍກິດຈະກຳເພື່ອສະເຫຼີມສະຫຼອງວັນເດັກໂລກ 2022 ຢູ່ ສປປ ລາວ ເຊັ່ນ: ການຍ່າງເພື່ອສຸຂະພາບ ແລະ ງານເທດສະການວັນເດັກໂລກໃນວັນທີ 19 ພະຈິກນີ້. ເນື່ອງໃນໂອກາດວັນເດັກໂລກປີນີ້ ກົງກັບ ການແຂ່ງຂັນບານເຕະໂລກ, ງານເທດສະການວັນເດັກໂລກນີ້ ກໍ່ຈະຈັດຂຶ້ນໃນຫົວຂໍ້ການແຂ່ງຂັນບານເຕະ ແລະ ກິລາ.
ໃນວັນທີ 20 ພະຈິກ ຊຶ່ງແມ່ນ ວັນເດັກໂລກ, ເຮົາຈະມາປ່ຽນປະຕູໄຊເປັນສັນຍາລັກຂອງປະເທດໃຫ້ເປັນສີຟ້າ ເພື່ອສະເຫຼີມສະຫຼອງວັນເດັກໂລກ ແລະ ສົ່ງເສີມສິດທິເດັກໃນທົ່ວປະເທດ. ນອກນີ້ເດັກນ້ອຍກໍ່ຍັງຈະໄດ້ມີໂອກາດສົ່ງຄໍາຄິດເຫັນ ແລະ ສະແດງຄວາມປາດຖະໜາຂອງຕົນເອງ ຜ່ານທາງ ໂທລະພາບແຫ່ງຊາດລາວ ແລະ ວິທະຍຸກະຈາຍສຽງແຫ່ງຊາດລາວ.
#UNICEFLaos
#ຊົມເຊີຍວັນເດັກໂລກ
#WorldChildren’sDay