ພິທີທຳລາຍສິນຄ້າຮຽນແບບ ແລະ ສິນຄ້າທີ່ໝົດອາຍຸ ຫຼາຍລາຍການທີ່ກວດພົບຢູ່ສອງຕະຫຼາດໃນເທດສະບານແຂວງ ອຸດົມໄຊ ໄດ້ຈັດຂຶ້ນເມື່ອບໍ່ດົນມານີ້ ໂດຍມີ ທ່ານນາງ ໄມພອນ ສີລິວົງ ຮອງຫົວໜ້າພະແນກ ອຸດສາຫະກຳ ແລະ ການຄ້າ ແຂວງ ພ້ອມດ້ວຍເຈົ້າໜ້າທີ່ການຄ້າ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ສິນຄ້າ ແລະ ອາຫານ ທີ່ໝົດອາຍຸ ທີ່ນຳມາທຳລາຍໃນຄັ້ງນີ້ ແມ່ນການລົງກວດກາຂອງເຈົ້າໜ້າທີ່ ໄດ້ລົງກວດກາຢູ່ສອງຕະຫຼາດເທດສະບານແຂວງ ຄື ຕະຫຼາດໜອງແມງດາ ແລະ ຕະຫຼາດວັງໄຮ ຈຳນວນຫຼາຍຮ້ານທີ່ໄດ້ກວດພົບ ພ້ອມທັງຢຶດປະເພດອາຫານແຊ່ແຂງ ທີ່ໝົດອາຍຸຫຼາຍລາຍການລວມມູນຄ່າ 11,963,000 ກີບ ທ່ານ ສອນເພັດ ບຸນທະຈິດ ຫົວໜ້າຂະແໜງການຄ້າພາຍໃນ ຍັງໄດ້ຮຽກຮ້ອງມາຍັງຜູ້ບໍລິໂພກທັງຫຼາຍວ່າ ກ່ອນທີ່ຈະຊື້ສິນຄ້າໃດໜຶ່ງຄວນກວດເບິ່ງວັນເດືອນປີຜະລິດ ແລະ ວັນໝົດອາຍຸໃຫ້ລະອຽດສາກ່ອນ ເພື່ອຄວາມປອດໄພກ່ອນບໍລິໂພກ.
ຂ່າວ-ພາບ: ແສງອາທິດ + ດາວອນ ສີວິໄລ