ເຄີຍບໍ່ ເມື່ອຕື່ນຕອນເຊົ້າໆມາ ທ່ານມັກຈະຈາມ, ໄອ, ຄັນດັງ, ມີນໍ້າມູກ ໂດຍສະເພາະແມ່ນໄລຍະອາກາດປ່ຽນແປງ. ອາການແບບນີ້ ບົ່ງຊີ້ວ່າ ທ່ານມີອາການແພ້ອາກາດ ຊຶ່ງເປັນສ່ວນໜຶ່ງ ຂອງພູມແພ້ນັ້ນເອງ.
ພູມແພ້ດັງ (Allergic Rhinitis) ຫຼື ຮຽກວ່າ ແພ້ອາກາດ ເປັນໂຣກທີ່ພົບເລື້ອຍໆ ໃນຄົນລາວ, ຄົນທີ່ເປັນ ຍັງມີທ່າອ່ຽງທີ່ຈະເກີດການຕອບສະໜອງ ໄວກວ່າປົກກະຕິ ຕໍ່ສິ່ງກະຕຸ້ນທີ່ບໍ່ແມ່ນສານກໍ່ພູມແພ້ໄດ້ ເຊັ່ນ ຄວາມເຢັນ, ຄວາມຮ້ອນ, ຄວາມກົດອາກາດຕຳ່, ຝົນ ຫຼື ຄວາມຊຸ່ມ. ພາວະນີ້ ອາດຢູ່ດົນເປັນມື້ ຫຼື ເປັນເດືອນກໍມີ ແລະ ສາມາດເກີດອາການໄດ້ ໂດຍບໍ່ຈຳເປັນຕ້ອງສຳຜັດກັບສານກໍ່ພູມແພ້ ເຊັ່ນ ຖ້າເປັນໂຣກພູມແພ້ທາງດັງ ເມື່ອເຮົາຫາຍໃຈເຂົ້າໄປທາງດັງ ສານກໍ່ພູມແພ້ ຈະໄປສຳຜັດກັບເຍື່ອບຸຜົ້ງດັງ ແລ້ວເຮັດໃຫ້ເກີດການອັກເສບໃນໂພງດັງ, ເກີດອາການຄັນດັງ ລະຕ້ອງແກະດັງ ຈົນເຮັດໃຫ້ເລືອດອອກ. ໃນບາງຄົນມີຄວາມຜິດປົກກະຕິຂອງລະບົບເລືອດ ເຊັ່ນ ໂຣກເລືອດອອກງ່າຍ.
ວິທີສັງເກດອາການຂອງໂຣກພູມແພ້ທາງດັງ ແບ່ງອອກເປັນດັ່ງນີ້:
- ມີອາການເດັ່ງທາງນຳ້ມູກ ຄື ຈະມີນຳ້ມູກໃສໄຫຼ, ຈາມຄັນດັງ.
- ມີອາການເດັ່ນ ທາງອາການຄັນດັງເປັນຫຼັກ, ມັກບໍ່ມີນຳ້ມູກ ຫຼື ອາການຈາມ.
- ມີອາການຂອງ 2 ຊະນິດທີ່ກ່າວມາຮວມກັນ ຄື ມີທັງນຳ້ມູກໃສ ແລະ ອາການຄັນດັງ.
ການເບິ່ງແຍງໂຕເອງດ້ວຍນໍ້າຂີງ:
ໃຫ້ໃຊ້ຂີງສົດ ປັ່ນ ຫຼື ຕຳ, ຄັ້ນເອົານຳ້ເຂັ້ມຂຸ້ນ ແລ້ວປະສົມນຳ້ເຜິ້ງ, ໝາກນາວ, ປຸງຈົນຖືກໃຈ ແລ້ວດື່ມຄັ້ງລະ 1 ກືນ, ມື້ລະ 4 ຄັ້ງ. ໃນອາທິດທຳອິດ ຈະເຫັນຄວາມປ່ຽນແປງ ແລ້ວເມື່ອກິນຄົບ 1 ເດືອນ ເກືອບຈະບໍ່ພົບອາການໄປຈາມເລີຍ. ຂໍ້ຄວນລະວັງກໍຄື ຫ້າມດື່ມນຳ້ຂີງໃສ່ກັບນຳ້ຕານເດັດຂາດ.
ຄວາມຮ້ອນຂອງຂີງ ເມື່ອກິນເຂົ້າໄປ ຈະຊ່ວຍຮັກສາອຸນຫະພູມໃນຮ່າງກາຍໃຫ້ອົບອຸ່ນຕະຫຼອດເວລາ ຂີງຈຶ່ງໄປຊ່ວຍຫຼຸດອາການໄອ, ຈາມ ຫຼື ຫຼຸດນຳ້ມູກໄດ້. ຄຸນສົມບັດຂອງຂີງອີກຢ່າງໜຶ່ງ ກໍຄື ເມື່ອມັນໃຫ້ຄວາມຮ້ອນ ມັນຈຶ່ງເປັນໂຕເປີດທາງໃຫ້ເລືອດລົມເດີນໄດ້ສະດວກ ຊຶ່ງໝາຍເຖິງຂີງໄປເປີດເສັ້ນເລືອດໃຫ້ສານອາຫານໄປລ້ຽງທົ່ວຮ່າງກາຍ.