ບັນຍາກາດ ງານປະກວດເຮືອໄຟງາມບຸນອອກພັນສາ ຢູ່ນະຄອນ-ຫຼວງພະບາງ ມີຫຼາຍສີສັນສວຍງາມ

ງານປະກວດເຮືອໄຟງາມ ໃນບຸນປະວໍລະນາ (ອອກພັນສາ) ທີ່ນະຄອນ-ຫຼວງພະບາງ ເມືອງມໍລະດົກໂລກ ແຂວງຫຼວງພະບາງ ແມ່ນປາງບຸນໜຶ່ງທີ່ໄດ້ສືບທອດກັນມາແຕ່ບູຮານນະການ ໂດຍໄດ້ຈັດຂຶ້ນໃນມື້ແຮມ 1 ຄໍ່າເດືອນ 11 ຂອງທຸກປີ. ປີນີ້ກົງກັບວັນທີ 11 ຕຸລາ ໂດຍລວມແມ່ນມີຄວາມຄຶກຄື້ນພາຍຫຼັງບໍ່ໄດ້ຈັດຂຶ້ນໃນໄລຍະການລະບາດຂອງພະຍາດໂຄວິດ-19, ໂດຍມີບັນດາກຸ່ມບ້ານໃນເທດສະບານນະຄອນ, ສະຖາບັນການສຶກສາ ແລະ ພາກສ່ວນທຸລະກິດ ສົ່ງເຮືອໄຟເຂົ້າປະກວດ 25 ລໍາ ແລະ ມີເຮືອໄຟສະໝັກຫຼິ້ນ ຈຳນວນໜຶ່ງ. ພິທີໄດ້ເລີ່ມຕົ້ນຈາກການທຳພິທີທາງສາສະໜາ ເທດສະຫຼອງເຮືອໄຟຢູ່ວັດປ່າຮວກ (ໜ້າຫໍພິພິທະພັນແຫ່ງຊາດຫຼວງພະບາງ).

ຈາກນັ້ນ, ທ່ານ ສົມດີ ພອນສະຫວັດ ປະທານແນວລາວສ້າງຊາດ ນະຄອນ-ຫຼວງພະບາງ ຮອງປະທານ ຈັດການປະກວດເຮືອໄຟງາມໃນປີນີ້ ໄດ້ກ່າວວ່າ: ປະເພນີການປະກວດເຮືອໄຟງາມ ເປັນປະເພນີທີ່ຊາວຫຼວງພະບາງ ໄດ້ພ້ອມກັນປະຕິບັດມາໄດ້ຫຼາຍເຊັ່ນຄົນ ເຮືອໄຟແຕ່ລະລຳແມ່ນໄດ້ສ້າງຂຶ້ນ ດ້ວຍຄວາມສາມັກຄີຂອງປະຊາຊົນບັນດາເຜົ່າ ຊຶ່ງປະກອບໄປດ້ວຍການປະດັບປະດາແສງສີ ແລະ ໂຄມໄຟນ້ອຍໃຫ່ຍ, ທັງເປັນການສະແດງເຖິງວັດທະນະທຳອັນດີງາມ ທີ່ເປັນເອກະລັກຂອງຊາວ ຫຼວງພະບາງ ເມືອງມໍລະດົກໂລກ ໄດ້ປະຕິບັດເປັນວັດທະນະທຳອັນດີງາມມາໄດ້ຫຼາຍເຊັ່ນຄົນ ທັງໄດ້ຮັບການສືບທອດ ແລະ ເສີມຂະຫຍາຍມາຈົນເຖິງທຸກວັນນີ້.

ພາຍຫຼັງເປີດພິທີທາງການແລ້ວ ໄດ້ເຄື່ອນຂະບວນເຮືອໄຟແຕ່ລະພາກສ່ວນ ໄປຕາມເສັ້ນທາງສີສະຫວ່າງວົງ ແລ້ວນຳເອົາເຮືອໄຟໄຫຼລົງແມ່ນ້ຳຂອງເຂດບ້ານຊຽງທອງ-ຄີລີ. ໂດຍຈະມີຄະນະນຳກຳມະການໃຫ້ຄະແນນ ແລະ ຄັດເລືອກເຮືອໄຟງາມ ແລະ ຄົບຕາມມາດຖານເງື່ອນໄຂທີ່ກຳນົດ ເພື່ອຈັດອັນດັບທີ່ ພ້ອມທັງມອບລາງວັນໃນມື້ຕໍ່ໄປ. ເຂົ້າຮ່ວມຊົມງານປະກວດເຮືອໄຟງາມໃນປີນີ້, ມີທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຄະນະ ແລະ ແຂກຮັບເຊີນ ຕະຫຼອດຮອດມວນຊົນ, ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຊົມຢ່າງຫຼວງຫຼາຍ.

ຂ່າວ :ຫຼານອ້າຍຄຳຫຼ້າ

ພາບ: Teng

People with a lrdinate attitude are successful because, to them, failure is not negative. But Don't forget to ally good habits with Natural Remedies for bad breath, like Brush your teeth well, floss all The days, drink plenty of water, not smoke and Nor drink alcohol, have a good food With Antioxidant and fat free products And, of course, visit your dentist, at least, Once a year. There is no cost to leave the Aggregation Program at any time.