ທະນາຄານພັດທະນາ ເອເຊຍ (ADB) ໄດ້ອອກບົດລາຍງານ ລະບຸວ່າ: ການຟື້ນຕົວທາງດ້ານເສດຖະກິດຂອງ ສປປ ລາວ ຄາດວ່າຈະຊ້າກວ່າທີ່ໄດ້ຄາດຄະເນໄວ້ໃນ ເດືອນ ເມສາ 2022, ເນື່ອງຈາກບັນຫາການສະໜອງ ແລະ ລາຄາສິນຄ້າທີ່ເພີ່ມສູງຂຶ້ນ ເຊິ່ງໄດ້ເຮັດໃຫ້ສ້າງຄວາມກົດດັນໃຫ້ແກ່ອັດຕາເງິນເຟີ້ເພີ່ມຂຶ້ນ.
ບົດລາຍງານການຄາດຄະເນການພັດທະນາຂອງອາຊີ 2022 ສະບັບປັບປຸງ, ໄດ້ປັບຫຼຸດອັດຕາການຄາດຄະເນການເຕີບໂຕໂດຍລວມ ຂອງຍອດຜະລິດຕະພັນພາຍໃນປະເທດ (ຈີດີພີ) ໃນປີ 2022 ລົງມາຢູ່ລະດັບ 2,5% ຈາກການຄາດຄະເນໄວ້ກ່ອນໜ້ານີ້ທີ່ 3,4% ແລະ ປັບລົງມາທີ່ 3,5% ຈາກ 3,7% ສໍາລັບປີ 2023.
ທັງນີ້ ທຸລະກິດສ່ວນໃຫຍ່ໄດ້ກັບຄືນສູ່ສະພາບການດຳເນີນງານເປັນປົກກະຕິໃນເຄິ່ງປີທຳອິດ, ນັກທ່ອງທ່ຽວສາກົນໄດ້ເລີ່ມເຂົ້າມາເພີ່ມຂຶ້ນ. ແນວໃດກໍດີ, ລາຄາທີ່ມີການຜັນແປ ໂດຍສະເພາະແມ່ນລາຄານໍ້າມັນ ໄດ້ເຮັດໃຫ້ຄ່າຄອງຊີບເພີ່ມສູງຂຶ້ນ, ສົ່ງຜົນໃຫ້ກະທົບຕໍ່ການຊົມໃຊ້ພາຍໃນປະເທດຫຼຸດລົງ. ການເພີ່ມຂຶ້ນກະທັນຫັນຂອງລາຄາປຸ໋ຍ, ອາຫານສັດ, ອາຫານ, ແລະ ນໍ້າມັນເຊື້ອໄຟ ໄດ້ຂັດຂວາງກິດຈະກໍາທາງດ້ານກະສິກໍາ ແລະ ການຜະລິດ. ທ່າອ່ຽງເຫຼົ່ານີ້ ເຮັດໃຫ້ເສດຖະກິດຟື້ນຕົວຊ້າລົງ.
ທ່ານ ນາງ ໂຊໂນມິ ທະນາກະ, ຜູ້ຕາງໜ້າ ADB ປະຈໍາ ສປປ ລາວ ໄດ້ກ່າວວ່າ: “ລາຄາສິນຄ້າທີ່ເພີ່ມສູງຂຶ້ນ ກຳລັງຂົ່ມຂູ່ຕໍ່ຄວາມສະຫວັດດີພາບຂອງບັນດາຄົວເຮືອນໃນ ສປປ ລາວ, ໂດຍສະເພາະຄອບຄົວທີ່ທຸກຍາກ, ເຮັດໃຫ້ເກີດຄວາມສ່ຽງຕໍ່ຄວາມປອດໄພດ້ານສະບຽງອາຫານ ແລະ ໂພຊະນາການຂອງຄອບຄົວ”.
ທ່ານໃຫ້ຮູ້ຕື່ມອີກວ່າ: “ບັນຫາເຫຼົ່ານີ້ ກຳລັງສ້າງສິ່ງທ້າທາຍ ບໍ່ພຽງແຕ່ຕໍ່ປະຊາຊົນເທົ່ານັ້ນ, ແຕ່ຍັງຕໍ່ກັບການເງິນຂອງພາກລັດອີກດ້ວຍ. ການຄຸ້ມຄອງເສດຖະກິດມະຫາພາກໄດ້ດີ, ໄປພ້ອມກັບການແຊກແຊງ ເພື່ອປົກປ້ອງກຳລັງຊື້, ແມ່ນຈຳເປັນເພື່ອຟື້ນຄວາມໝັ້ນໃຈຂອງຕະຫຼາດ.”
ອັດຕາເງິນເຟີ້ໃນ ເດືອນສິງຫາເພີ່ມຂຶ້ນສູ່ລະດັບສູງສຸດໃນຮອບ 22 ປີ ຢູ່ທີ່ 30%, ຊຶ່ງອັດຕາເງິນເຟີ້ສະເລ່ຍແມ່ນ 15.5% ໃນ 8 ເດືອນທຳອິດຂອງປີ. ລາຄານໍ້າມັນເຊື້ອໄຟທີ່ຖືກຄຸ້ມຄອງ ໄດ້ເພີ່ມຂຶ້ນຫຼາຍເທົ່າຈາກ ເດືອນມັງກອນ ຫາ ເດືອນກັນຍາ, ເຊິ່ງເຮັດໃຫ້ລາຄານໍ້າມັນກາຊວນເພີ່ມຂຶ້ນ 90.3% ແລະ ລາຄານໍ້າມັນແອັດຊັງເພີ່ມຂຶ້ນ 62.3%. ຄຽງຄູ່ກັນນັ້ນ, ຄ່າເງິນກີບຫຼຸດລົງໜຶ່ງສ່ວນສາມ ເມື່ອທຽບກັບເງິນໂດລາສະຫະລັດ ແລະ ເງິນບາດໄທ ນັບແຕ່ເດືອນມັງກອນຫາເດືອນສິງຫາ. ຄາດຄະເນວ່າ ອັັດຕາເງິນເຟີ້ຈະປັບຂຶ້ນສູງຮອດ 17.0% ໃນປີ 2022 ເນື່ອງຈາກລາຄານ້ຳມັນທີ່ເພີ່ມຂຶ້ນສູງກວ່າທີ່ຄາດໄວ້ ແລະ ການອ່ອນຄ່າຂອງເງິນກີບ. ໃນຂະນະດຽວກັນ, ໜີ້ສິນສາທາລະນະ ແລະ ໜີ້ທີ່ພາກລັດຄ້ຳປະກັນ, ສ່ວນໃຫຍ່ແມ່ນໜີ້ຕ່າງປະເທດ ຢູ່ໃນລະດັບສູງ ເມື່ອທຽບໃສ່ຈີດີພີ.
ຂໍ້ມູນຂ່າວ: ADB