ຄວາມເຊື່ອໃຈເຊິ່ງກັນ ແລະກັນ ຖືເປັນເລື່ອງສຳຄັນ ທີ່ຄູ່ຮັກຄວນຢຶດຖື ເພາະໂລກທຸກມື້ນີ້ ເຕັມໄປດ້ວຍສິ່ງທີ່ລໍ້ຕາລວງໃຈ ຫຼາຍຢ່າງ ເຮັດໃຫ້ໂອກາດທີ່ຈະນອກໃຈແຟນ ຫຼື ຄູ່ຊີວິດໂຕເອງ ໄດ້ງ່າຍ ແລະແນບນຽນຫຼາຍຂຶ້ນ. ສະນັ້ນ ບາງຄົນຈຶ່ງຄິດເຖິງບົດບາດເປັນສາຍລັບ, ຕາມຈັບຜິດຄົນຮັກຢູ່ແບບຫ່າງໆ ຈົນຕິດເປັນນິດໄສ. ແຕ່ສິ່ງໃດທີ່ເຮົາເຮັດຫຼາຍເກີນໄປນັ້ນ ອາດບໍ່ແມ່ນເລື່ອງດີ.
ລອງອ່ານບາງເຫດຜົນທີ່ທ່ານ ບໍ່ຄວນຈັບຜິດຄົນຮັກຂອງຕົນເອງຫຼາຍເກີນໄປ ຕໍ່ໄປນີ້ເບິ່ງເດີ.
- ຄຸນຄ່າໃນໂຕທ່ານຈະຫຼຸດລົງໄປເລື້ອຍໆ:
ເພາະການຈັບຜິດ ເປັນການຕັ້ງຢູ່ເທິງພື້ນຖານຂອງການທຳລາຍຄວາມໄວ້ເນື້ອເຊື່ອໃຈ ຄື ຍິ່ງທ່ານມີຄວາມລະແວງຫຼາຍເທົ່າໃດ ໃນສາຍຕາເຂົາ ທ່ານກໍຍິ່ງມີຄຸນຄ່າຫຼຸດລົງເທົ່ານັ້ນ, ຍິ່ງທ່ານຄອຍແຕ່ແລ່ນຕາມຈັບຜິດເຂົາໄປທົ່ວທີບ ແບບວ່າ ແຕ່ລະມື້ບໍ່ໄດ້ເຮັດຫຍັງ ມົວແຕ່ລໍຖ້າກວດເບິ່ງໂທລະສັບ ເຮັດໃຫ້ເກີດເລື່ອງວຸ່ນວາຍ, ທ່ານຄວນກຽມໂຕໄວ້ວ່າ ອາດມື້ທ່ານອາດບໍ່ເຫຼືອຄ່າສິ່ງໃດໃຫ້ເຂົາຕ້ອງຮັກສາ.
- ທ່ານຈະມີຄວາມກັງວົນຫຼາຍເກີນເຫດ:
ຖ້າທ່ານບໍ່ເຊື່ອ ທ່ານລອງເປັນຄົນຈັບຜິດແຟນ ຫຼື ຄູ່ຊີວິດຂອງທ່ານຈັກຄັ້ງນຶ່ງເບິ່ງ ເຊື່ອບໍ່ວ່າ ທ່ານຈະເປັນຄົນແບບນີ້ໄປຕະຫຼອດ ແຖມອາດເປັນໜັກຂຶ້ນກວ່າເກົ່າອີກ. ການເວົ້າແບບນີ້ ກໍເພາະວ່າ ການມົວເມົານຳແຕ່ການມານັ່ງຄອຍຈັບຜິດ ນອກຈາກຈະເຮັດໃຫ້ທ່ານຮູ້ສຶກ ບໍ່ສະບາຍໃຈແລ້ວ ຍັງເປັນການສ້າງຄວາມກັງວົນຫຼາຍເກີນເຫດຈຳເປັນ ກັບການທີ່ທ່ານຕ້ອງມານັ່ງຄິດອຸກໃຈຢູ່ສະເໝີ ຄື ພຽງແຕ່ໄດ້ຍິນສຽງຂໍ້ຄວາມແຊັດ ທີ່ບໍ່ຮູ້ວ່າ ໃຜຮູ້ສົ່ງມາຫາຄົນຮັກຂອງທ່ານ ທັງໆທີ່ອາດເປັນການແຊັດພຽງແຕ່ເລື່ອງວຽກງານກໍໄດ້.
- ທ່ານກຳລັງທຳລາຍຄວາມໄວ້ວາງໃຈຂອງຄົນທີ່ທ່ານຮັກໂດຍບໍ່ຮູ້ໂຕ:
ຄົນເຮົາຈະຄົບກັນໄປເຮັດຫຍັງ ຖ້າບໍ່ມີຄວາມເຊື່ອໃຈໃຫ້ແກ່ອີກຝ່າຍ, ຍິ່ງຖ້າທ່ານສະແດງອອກວ່າ “ຂ້ອຍກຳລັງຈັບຕາເບິ່ງເຈົ້າຢູ່ເດີ” ຫຼາຍເທົ່າໃດ ນັ້ນກໍຄື ທ່ານໄດ້ທຳລາຍຄວາມໄວ້ເນື້ອເຊື່ອໃຈຂອງອີກຝ່າຍໄປເທື່ອລະໜ້ອຍ. ທຳອິດ ຄົນຮັກຂອງທ່ານອາດເຂົ້າໃຈ ແຕ່ຖ້າພົບກັນໄປດົນໆແລ້ວ ທ່ານຍັງມີພຶດຕິກຳນີ້ບໍ່ເຊົາ ບອກໄດ້ເລີຍວ່າ ທ່ານອາດເປັນໂສດອີກເທື່ອນຶ່ງກໍເປັນໄດ້.
- ບໍ່ມີໃຜມັກທີ່ຖືກຈັບຜິດຕະຫຼອດເວລາ:
ຖ້າທ່ານຈະບອກວ່າ “ການທີ່ຂ້ອຍຕ້ອງມານັ່ງຈັບຜິດເຈົ້າ ກໍເພາະເປັນການຕັດໄຟແຕ່ຕົ້ນລົມ ເຜື່ອວ່າ ເຈົ້າຈະໄດ້ບໍ່ມາຫັກຫຼັງຂ້ອຍເອົາຕາມຫຼັງ.” ເຫດຜົນແບບນີ້ ຟັງແລ້ວຟັງອີກກໍບໍ່ດີຂຶ້ນ. ບາງຄັ້ງ ສິ່ງແບບນີ້ອາດເປັນຂໍ້ອ້າງຂອງຄົນນິດໄສບໍ່ດີ ທີ່ມັກແຕ່ຈະຈັບຜິດຄົນອື່ນ, ທ່ານລອງຄິດເບິ່ງເອົາເອງວ່າ ມີໃຜແດ່ ທີ່ຢາກຢູ່ກັບຄົນນິດໄສແບບນີ້?
- ຍິ່ງຈັບຜິດ ຍິ່ງເຮັດໃຫ້ເລື່ອງຊັບຊ້ອນ:
ທ່ານເຄີຍສັງເກດຄົນທີ່ທ່ານຮັກບໍ່ວ່າ ຖ້າເຮົາລໍຖ້າແຕ່ຈັບຜິດເຂົາໄດ້ 1 ເລື່ອງ, 2 ເລື່ອງ, 3 ເລື່ອງ ລະດັບຄວາມຊັບຊ້ອນຂອງເລື່ອງທີ່ທ່ານຈັບຜິດ ຈະຍິ່ງເພີ່ມຫຼາຍຂຶ້ນຕາມລຳດັບ. ສິ່ງເຫຼົ່ານີ້ ອາດເປັນເພາະອີກຝ່າຍ ຢາກຫາທາງໜີ ເພື່ອບໍ່ໃຫ້ທ່ານຈັບຜິດເຂົາໄດ້.
