ຕາມການລາຍງານຈາກ ທ່ານ ບຸນລິດ ສັກບົວວົງ ຮັກສາການຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ເຊກອງ ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງເຊກອງຊຸດທີ II ວັນທີ 17 ສິງຫາ ນີ້ວ່າ: ຜ່ານມາ ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ເປັນໃຈກາງປະສານສົມທົບກັບພາກສ່ວນກ່ຽວ ເພື່ອດໍາເນີນການເກັບກໍາຂໍ້ມູນການເຊົ່າ ແລະ ສໍາປະທານດິນລັດໃນທົ່ວແຂວງ. ມາຮອດປັດຈຸບັນ, ມີທັງໝົດ 124 ໂຄງການ ເນື້ອທີ່ 193,880 ເຮັກ ຕາ, ໃນນີ້ ນອນໃນຂະແໜງກະສິກໍາ ແລະ ປ່າໄມ້ 33 ໂຄງການ ເນື້ອທີ່ 11,652 ເຮັກ ຕາ, ຂະແໜງພະລັງງານໄຟຟ້າ 58 ໂຄງການ, ເນື້ອທີ່ 6,038 ເຮັກຕາ ແລະ ຂະແໜງ ບໍ່ແຮ່ 33 ໂຄງການ ເນື້ອທີ່ 176,190 ເຮັກຕາ.
ສໍາລັບ ໂຄງການທີ່ນອນໃນຂະແໜງກະສິກໍາ ແລະ ຂະແໜງພະລັງງານໄຟຟ້າ ໄດ້ມີສັນຍາເຊົ່າ-ສໍາປະທານ (CA) ຈໍານວນ 27 ໂຄງການ; ສັນຍາພັດທະນາໂຄງການ (PDA) ຈໍານວນ 33 ໂຄງການ; ສັນຍາ MOU ຈໍານວນ 25 ໂຄງການ ແລະ ບໍ່ທັນມີສັນຍາ 6 ໂຄງການ. ສ່ວນຂົງເຂດຂະແໜງບໍ່ແຮ່ ຢູ່ໃນຂັ້ນຕອນຊອກຄົ້ນສໍາຫລວດມີ 9 ໂຄງການ; ຂັ້ນຕອນສຶກສາຄວາມເປັນໄປໄດ້ທາງດ້ານເສດຖະກິດເຕັກນິກ 1 ໂຄງການ ແລະ ຂັ້ນຕອນການຂຸດຄົ້ນ ແລະ ປຸງແຕ່ງ 23 ໂຄງການ.
ທ່ານ ບຸນລິດ ສັກບົວວົງ ໃຫ້ຮູ້ຕື່ມວ່າ: ສຳລັບການຂຶ້ນທະບຽນອອກໃບຕາດິນ ໃຫ້ແກ່ບຸກຄົນ, ນິຕິບຸກຄົນ, ລັດ ແລະ ລວມໝູ່ທີ່ນອນໃນ 8 ປະເພດທີ່ດິນ ໃນທົ່ວແຂວງເຊກອງ ນັບແຕ່ປີ 2010-2021 ປະຕິບັດໄດ້ 19,315 ຕອນ, ເນື້ອທີ່ 2,963,514,054 ຕາແມັດ ໃນນີ້ດິນປຸກສ້າງ 12,024 ຕອນ; ດິນກະສິກໍາ 5,926 ຕອນ; ດິນຂອງລັດ ແລະ ລວມໝູ່ໃນ 8 ປະເພດດິນ 1.365 ຕອນ. ສໍາລັບປີ 2022 ມາຮອດເດືອນທີ 8 ສາມາດພິສູດຫລັກຖານອອກໃບຕາດິນສໍາເລັດ 1,028 ຕອນ, ເນື້ອທີ່ 5,323,19 ຕາແມັດເທົ່າກັບ 51.4% ຂອງແຜນການປີທີ່ແຂວງວາງອອກ.
ຂ່າວ-ພາບ: ສັນຍາ
