ສຳນັກຂ່າວ ຊິນຮວາ, ທ່ານHun Sen, ນາຍົກ ລັດຖະມົນຕີ ກຳປູເຈຍ ຈັດສັນເງິນ ອຸດໜູນ ຫລາຍກວ່າ 100 ລ້ານໂດລາ ສະຫະລັດ ໃຫ້ການໄຟຟ້າ ກຳປູເຈຍ ເພື່ອຮັກສາ ລາຄາໄຟຟ້າ ໃຫ້ຄົງທີ ໃນປີນີ້ ເນື່ອງຈາກ ລາຄາ ໄຟຟ້າ ອາດເພີ່ມຂຶ້ນ 2ເທົ່າ ຖ້າບໍ່ມີ ເງິນອຸດໜູນ ຈາກລັດຖະບານ ໂດຍບາງປະເທດ ປັບເພີ່ມ ອັດຕາ ຄ່າໄຟຟ້າແລ້ວ ແຕ່ລາຄາ ໄຟຟ້າ ໃນກຳປູເຈຍ ຍັງຄົງ ຢູ່ຄືເກົ່າ ພ້ອມທັງ ຮຽກຮ້ອງ ໃຫ້ປະຊາຊົນ ປະຢັດ ໄຟຟ້າ ແລະ ຫັນມາ ໃຊ້ພາຫະນະ ໄຟຟ້າ ເພື່ອຫລຸດ ການໃຊ້ ນ້ໍາມັນ ເຊື້ອໄຟ ແລະ ການປ່ອຍ ມົນລະພິດ.ຂະນະທີ່ ລາຄາ ນ້ຳມັນ ແອັດຊັງທຳມະດາ ໃນວັນພຸດທີ 6 ກໍລະກົດນີ້ ຢູ່ທີ່ 5,800 ຣຽວ (riel) ຕໍ່ລິດ, ສ່ວນລາຄາ ນ້ໍາມັນ ກາຊວນ ຢູ່ທີ່ 6.200 ຣຽວ (riel) ຕໍ່ລິດ ເພີ່ມຂຶ້ນ 22% ແລະ 39% ຕາມລຳດັບ ເມື່ອທຽບໃສ່ ໄລຍະ ກາງເດືອນ ກຸມພາ ຜ່ານມາ.
ຂະນະດຽວກັນ ທ່ານHun Sen ໄດ້ເນັ້ນ ຄວາມສຳຄັນ ຂອງເຂື່ອນ ໄຟຟ້າ ນ້ຳຕົກ ແລະ ໂຮງໄຟຟ້າ ພະລັງງານ ແສງຕາເວັນ ເພື່ອຊ່ວຍ ຈັດສົ່ງ ໄຟຟ້າ ທີ່ມີສະຖຽນ ລະພາບ ແລະ ຮັກສາ ຄ່າໄຟຟ້າ ໃຫ້ຄົງທີ ທ່າມກາງ ວິກິດ ພະລັງງານໂລກ ໂດຍຈີນ ເປັນຜູ້ ພັດທະນາ ເຂື່ອນໄຟຟ້າ ນ້ຳຕົກ ຂະໜາດໃຫຍ່ ໃນກຳປູເຈຍ ລວມທັງ ໂຮງໄຟຟ້າ ຖ່ານຫີນ ແລະ ໂຮງໄຟຟ້າ ພະລັງງານ ແສງຕາເວັນ ກວມເອົາ ອັດຕາສ່ວນ 65,7% ຂອງພະລັງງານ ທັງໝົດ ທີ່ຜະລິດ ໃນກຳປູເຈຍ.
ຮຽບຮຽງຂ່າວໂດຍ: ສະໄຫວ ລາດປາກດີ