CRI-FM 93 ໄດ້ລາຍງານໃຫ້ຮູ້ວ່າ: ຄ່ຽງຄູ່ກັບຕູ້ຄອນເທັນເນີບັນຈຸສິນຄ້າຂ້າມຊາດງວດທຳອິດ ໄດ້ສຳເລັດການປ່ຽນຖ່າຍຈາກລາງລົດໄຟມາດຕະຖານໄປເຖິງລາງລົດໄຟໜຶ່ງແມັດ ແລະແລ່ນໄປສູ່ທ່າກຳປັ່ນແຫລມສະບັງ ຂອງໄທ, ຈຸດເຄື່ອນຖ່າຍສິນຄ້າສະຖານີລົດໄຟ ວຽງຈັນໃຕ້ ໄດ້ເປີດນຳໃຊ້ຢ່າງເປັນທາງການ ໃນວັນທີ 1 ກໍລະກົດນີ້, ເຊິ່ງເປັນຂີດໝາຍສະແດງໃຫ້ເຫັນວ່າ ທາງລົດໄຟ ຈີນ-ລາວ-ໄທ ໄດ້ສໍາເລັດການເຊື່ອມຕໍ່ກັນ.
ຈຸດປ່ຽນຖ່າຍສິນຄ້າສະຖານີວຽງຈັນໃຕ້ ສາມາດຂຶ້ນເໜືອເຊື່ອມຕໍ່ສູນລໍາລຽງສິນຄ້ານະຄອນເສີງຕູ່, ຈຸ່ງກິ່ງ ຊີອ່ານ ແລະເຂດອື່ນໆຂອງຈີນ ແລະເຊື່ອມຕໍ່ລົດໄຟຈີນ-ເອີຣົບ, ລົງໃຕ້ສາມາດເຊື່ອມຕໍ່ນະຄອນຫລວງບາງກອກ ແລະທ່າກຳປັ່ນແຫລມສະບັງ ຂອງໄທ ເຊິ່ງໄດ້ຍົກສູງປະສິດທິພາບໃນການຂົນສົ່ງສິນຄ້າ ລະຫວ່າງຈີນ ແລະປະເທດອາຊຽນ, ສົ່ງຜົນເຮັດໃຫ້ເວລາການເດີນທາງແຕ່ ນະຄອນຄຸນໝິງ ຂອງຈີນ ໄປທ່າກຳປັ່ນແຫລມສະບັງ ຫລຸດລົງປະມານ 1 ມື້ເມື່ອທຽບໃສ່ການຄ່ຽນຖ່າຍດ້ວຍລົດ ທັງສາມາດຫລຸດຕົ້ນທຶນໃນການຂົນສົ່ງ 20% ຂຶ້ນໄປ ເຊິ່ງເປັນສິ່ງຄໍ້າປະກັນທາງດ້ານຄົມມະນາຄົມຂົນສົ່ງໃຫ້ກັບການສ້າງຄູ່ຮ່ວມຊາຕາກໍາຈີນ-ອາຊຽນນໍາອີກ.
ໂອກາດດັ່ງກ່າວ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລາວ ໄດ້ສະແດງຄວາມຊົມເຊີຍຕໍ່ຜົນສໍາເລັດການຮ່ວມມື ລະຫວ່າງ ສອງພັກສອງລັດຖະບານ ລາວ-ຈີນ ກໍ່ຄືບັນດາບໍລິສັດຮັບເໝົາກໍ່ສ້າງ. ໂດຍທ່ານກ່າວວ່າ: ການເປີດນໍາໃຊ້ຈຸດປ່ຽນຖ່າຍສິນຄ້າດັ່ງກ່າວມີຄວາມໝາຍສໍາຄັນຍິ່ງ ແລະເປັນເຫດການທີ່ບໍ່ເຄີຍມີມາກ່ອນ, ເນື່ອງຈາກວ່າບັນຫາຄົມມະນາຄົມຂົນສົ່ງທີ່ມີຕົ້ນທຶນສູງນັ້ນເປັນອຸປະສັກໜຶ່ງໃນການດຶງດູດການລົງທຶນຂອງລາວ ແລະເຊື່ອໝັ້ນວ່າການເປີດນໍາໃຊ້ຈຸດປ່ຽນຖ່າຍສິນຄ້າດັ່ງກ່າວຈະເປັນແຮງຊຸກຍູ້ໃຫ້ແກ່ການພັດທະນາເສດຖະກິດ-ສັງຄົມຂອງລາວ ກໍ່ຄືຊຸກຍູ້ໃຫ້ຂະແໜງການຕ່າງໆໃຫ້ໄດ້ຮັບເງື່ອນໄຂການພັດທະນາທີ່ດີກວ່າເກົ່າ.
ພາຍຫລັງທາງລົດໄຟ ລາວ-ຈີນ ໄດ້ເປີດນໍາໃຊ້ຢ່າງເປັນທາງການເປັນຕົ້ນມາ, ປາກົດເຫັນວ່າການຂົນສົ່ງໂດຍສານ ແລະຂົນສົ່ງສິນຄ້າລ້ວນແຕ່ມີທ່າອ່ຽງການພັດທະນາດີຂຶ້ນທັງທາງດ້ານປະລິມານ ແລະຄຸນນະພາບ.
ມາຮອດວັນທີ 30 ມິຖຸນາ ໄດ້ສົ່ງຜູ້ໂດຍສານທັງໝົດ 4 ລ້ານເທື່ອຄົນ ໃນນັ້ນໄລຍະໃນລາວ ມີ 520,000 ເທື່ອຄົນ, ໄດ້ຂົນສົ່ງສິນຄ້າທັງໝົດ 4,940,000 ໂຕນ, ໃນນັ້ນການຂົນສົ່ງສິນຄ້າຂ້າມຊາດມີ 820,000 ໂຕນ.