ຕາມຂ່າວຈາກ ມະນິລາ, ສະພາ ການເດີນທາງ ແລະ ການທ່ອງທ່ຽວໂລກ (WTTC) ຄາດການວ່າ: ການເດີນທາງ ແລະ ການທ່ອງທ່ຽວໂລກ ຈະຟື້ນຕົວ ກັບໄປຢູ່ໃນລະດັບກ່ອນເຊື້ອພະຍາດ ໂຄວິດ-19 ລະບາດ ໄດ້ພາຍໃນ ປີ2023.
ຂະນະທີ່ ເອເຊຍ ຈະກັບມາຟື້ນຕົວຢ່າງຊ້າໆ ຫລັງຈາກ WTTCເຜີຍແຜ່ບົດລາຍງານລະຫວ່າງກອງປະຊຸມ ມະນິລາ ໃນວັນທີ 21 ເມສາ ນີ້ ວ່າ: ອຸດສາຫະກໍານີ້ ຈະຂະຫຍາຍຕົວສະເລ່ຍ 5.8 ຕໍ່ປີ ຕັ້ງແຕ່ປີນີ້ ຈົນຮອດ ປີ 2032 ລື່ນກາຍ ຍອດລວມ ຜະລິດຕະພັນ ພາຍໃນປະເທດ (GDP) ຂອງໂລກ ທີ່ຈະຂະຫຍາຍຕົວ ສະເລ່ຍ 2.7% ຕໍ່ປີ ໃນໄລຍະເວລາດຽວກັນ ແລະ ຈະສ້າງວຽກເຮັດງານທຳປະມານ 126 ລ້ານ ຕໍາແໜ່ງ.
ຂະນະທີ່ການເດີນທາງ ແລະ ການທ່ອງທ່ຽວ ຈະມີມູນຄ່າ 8,35 ພັນຕື້ ໂດລາ ສະຫະລັດ ໃນປີນີ້ ແລະ 96 ພັນຕື້ໃນປີໜ້າ ຊຶ່ງເປັນລະດັບກ່ອນເກີດການແພ່ລະບາດ ໂຄວິດ-19 ໃນປີ 2019.
ຂະນະດຽວກັນ ການຈ້າງງານຈະກັບຄືນ ມາສູ່ ລະດັບ 300 ລ້ານຄົນໃນປີນີ້ ແລະ 324 ລ້ານຄົນ ໃນປີໜ້າ ເປັນຕົວເລກ ໃກ້ຄຽງກັບ 333 ລ້ານຄົນໃນປີ2019. ສະເພາະພາກພື້ນ ເອເຊຍ ປາຊີຟິກ GDP ຂອງອຸດສາຫະກຳນີ້ ຄາດວ່າ ຈະບັນລຸ 3,4 ພັນຕື້ ໂດລາ ສະຫະລັດ ໃນປີໜ້າ ແຕ່ຂະນະນີ້ີ້ຟື້ນຕົວຊ້າກວ່າ ອາເມຣິກາ ເໜືອ ແລະ ເອີຣົບ ເນື່ອງຈາກຫລາຍປະເທດຍັງຄົງໃຊ້ ມາດຕະການຄວບຄຸມຊາຍແດນຢ່າງເຂັ້ມງວດ. ສ່ວນ ເອເຊຍ ຕາເວັນອອກສ່ຽງໃຕ້ (ອາຊຽນ) ເລີ່ມມີຜູ້ໂດຍສານເຮືອບິນກັບມາ ໃຊ້ບໍລິການແລ້ວ ຍ້ອນຍົກເລີກລະບຽບເຂົ້າປະເທດ ແລະ ການກັກໂລກ ແຕ່ການຟື້ນຕົວຍັງເປັນໄປຢ່າງຊ້າໆ ແບບໝັ້ນຄົງ.