7 ວິທີຕັດໃຈຈາກຂອງຫວານ

ວິທີດີທີ່ສຸດ ທີ່ຈະເຮັດໃຫ້ສາວໆບໍ່ຕ້ອງກິນຂອງຫວານ ກໍຄື ຢ່າຊື້ມາໄວ້ໃນເຮືອນ ຖ້າຮູ້ສຶກຢາກກິນຂອງຫວານຂຶ້ນມາ ເມື່ອເປີດເບິ່ງຕູ້ເຢັນແລ້ວເຫັນເຂົ້າໜົມ ໃຫ້ຮີບນຳເອົາເຂົ້າໜົມຫວານຕ່າງໆຢູ່ໃນເຮືອນອອກໃຫ້ເໝິດ ແລະ ເວລາໄປຊື້ເຄື່ອງຢູ່ຮ້ານຄ້າກໍຢ່າເຜີໃຈໄປຍ່າງເລາະແຖວຊັ້ນວາງເຂົ້າໜົມ ແລ້ວໃຫ້ຮີບຍ່າງຜ່ານໄປເລີຍ.
ກິນອາຫານຈານຫຼັກໃຫ້ອີ່ມ: ວິທີຫຼຸດນໍ້າໜັກທີ່ຫຼາຍໆຄົນແນະນຳກໍຄື ຫ້າມອົດອາຫານເດັດຂາດ ໂດຍສະເພາະອາຫານ 3 ຄາບຫຼັກຂອງມື້ ຄື ເຊົ້າ, ສວາຍ ແລະແລງ ເພາະວ່າ ຖ້າເຮົາອົດກໍຍິ່ງເຮັດໃຫ້ເຮົາຫິວ ແລະເຮັດໃຫ້ຢາກກິນທຸກຢ່າງທີ່ຂວາງໜ້າ ຊຶ່ງເປັນວິທີການຍາກທີ່ຈະຫຼຸດນໍ້າໜັກ. ສະນັ້ນ ກິນອາຫານທຸກຄາບໃຫ້ອີ່ມ ຈະບໍ່ເຮັດໃຫ້ຢາກກິນສິ່ງຫວານໆເພີ່ມອີກ ແລະຖ້າອົດບໍ່ໄດ້ ກໍໃຫ້ຊອກເອົາຜັກສົດ, ໝາກໄມ້ສົດກອບໆມາກິນແທນ.
ຂໍເວລາ 15 ນາທີ: ບໍ່ໄດ້ໝາຍເຖິງໃຫ້ເວລາກິນຂອງຫວານພຽງແຕ່ 15 ນາທີ, ແຕ່ໝາຍຄວາມວ່າ ຫຼັງຈາກກິນອາຫານຈານຫຼັກຄຳສຸດທ້າຍແລ້ວ ຢ່າຟ້າວຈັບເອົາຂອງຫວານເຂົ້າປາກ ຄື ໃຫ້ນັ່ງຖ້າອີກ 15 ນາທີ ຊຶ່ງເປັນໄລຍະເວລາທີ່ສະໝອງໄດ້ເຮັດວຽກ ແລະ ຮັບຮູ້ເຖິງຄວາມອີ່ມແລ້ວ ຊຶ່ງຕອນນີ້ເຮົາອາດຈະບໍ່ຮູ້ສຶກຢາກກິນຂອງຫວານອັດທ້າຍ ໃນຄາບນັ້ນກໍເປັນໄດ້. ແຕ່ຖ້າບໍ່ຍອມລໍຖ້າ ສາວໆອາດຈະໄປຈັບເອົາເຂົ້າໜົມເຄັກກ້ອນໃຫຍ່ໆເຂົ້າປາກກິນຈົນເໝິດພາຍໃນ 5 ນາທີແນ່ນອນ ກວ່າສະໝອງຈະຮັບຮູ້ວ່າ ອີ່ມແລ້ວ ເຂົ້າໜົມເຄັກກໍອາດເໝິດໄປຫຼາຍໆກ້ອນ.
ເລືອກຂະໜາດນ້ອຍ: ຄົນມັກກິນຫວານ ຈະໃຫ້ມາຕັດໃຈອອກຈາກບາດດຽວບໍ່ໄດ້ ແຕ່ສາວໆສາມາດກິນຂອງຫວານໄດ້ ແຕ່ຕ້ອງຮູ້ວ່າ ຄວນກິນປະລິມານເທົ່າໃດ. ແນ່ນອນວ່າ ຕ້ອງເປັນປະລິມານໜ້ອຍທີ່ສຸດ ຄື ເວລາກິນໂຊໂກແລັດເຄັກ ກໍຕ້ອງກິນເປັນຄຳນ້ອຍໆບໍ່ແມ່ນກ້ອນໃຫຍ່ ແລະຄວນກິນໃສ່ຈານນ້ອຍໆ ກະເອົາພໍປະມານທໍ່ອົ້ງມືກໍພໍແລ້ວ.
ລະວັງເຄື່ອງດື່ມ: ໃນເມື່ອຫ້າມກິນຂອງຫວານ ແລ້ວຫັນໄປດື່ມກາເຟ ກໍຕ້ອງຄິດກ່ອນວ່າ ກາເຟ 1 ຈອກ ອາດໃຫ້ແຄລໍຣີ່ສໍ່າກັບຊີສເບີເກີຣີ່ 1 ອັນ. ສະນັ້ນ ນອກຈາກເຂົ້າໜົມເນີຍທັງຫຼາຍທີ່ເປັນຂອງຫ້າມແລ້ວ ການດື່ມກາເຟອັດທ້າຍຄາບອາຫານກໍເປັນສິ່ງຕ້ອງຫ້າມຄືກັນ.
ແບ່ງກັນກິນ: ເມື່ອຢາກກິນກະແລັມຫວານໆ ກໍໄປຊື້ມາກິນຈັກຈອກ ຫຼື ຈັກຖ້ວຍກໍໄດ້ ແຕ່ເມື່ອຊື້ມາແລ້ວຢ້ານອ້ວນ ກໍຄວນແບ່ງໃຫ້ຄົນອື່ນກິນນໍາ ຊຶ່ງກິນບໍ່ພໍທໍ່ໃດກໍເໝິດແລ້ວ ພຽງແຕ່ເທົ່ານີ້ກໍເຮັດໃຫ້ເຮົາກິນໃນປະລິມານທີ່ໜ້ອຍລົງ ແລະ ຈະບໍ່ມີຜົນກະທົບຕໍ່ແຜນການຫຼຸດນໍ້າໜັກ.
ວາງແຜນກິນຂອງຫວານ: ສຳລັບຄົນທີ່ີມັກກິນຂອງຫວານ, ການຫຼີກເວັ້ນຕະຫຼອດເວລາ ອາດເປັນເລື່ອງທີ່ເຮັດໄດ້ຍາກ ແຕ່ບໍ່ໄດ້ໝາຍຄວາມວ່າ ໃຫ້ສາວໆຫ້າມກິນຂອງຫວານໂດຍເດັດຂາດ. ສາວໆສາມາດກິນໄດ້ ແຕ່ຕ້ອງຈັດເວລາສຳລັບກິນຂອງຫວານໄວ້ ເຊັ່ນ ກິນເຂົ້າໜົມໄດ້ອາທິດລະ 2 ຄັ້ງຫຼັງອາຫານ ແລ້ວປະຕິບັດຕາມກົດລະບຽບທີ່ໂຕເອງຕັ້ງໄວ້ໃຫ້ໄດ້.