ຄົນທີ່ມັກລືມ ແກ້ໄຂແບບນີ້

ຈັດວາງເຄື່ອງຂອງໃຫ້ເປັນລະບຽບ: ຈະສັງເກດໄດ້ວ່າ ຄົນທີ່ມີລະບຽບໃນຊີວິດ ຈະບໍ່ມັກລືມ. ດັ່ງນັ້ນ ຄວນຈັດລະບຽບຊີວິດໃຫ້ງ່າຍຂຶ້ນ ໂດຍການມ້ຽນເຄື່ອງຂອງໄວ້ໃນບ່ອນທີ່ເໝາະສົມ ຈະຊ່ວຍໃຫ້ເຮົາບໍ່ຈຳເປັນຕ້ອງມາຄິດວ່າ ເຮົາວາງເຄື່ອງຂອງຕ່າງໆໄວ້ຢູ່ບ່ອນໃດ ເຊັ່ນ ເອົາປຶ້ມບັນຊີໄວ້ໃນລີ້ນຊັກຊັ້ນເທິງ, ເກັບກະແຈໄວ້ບ່ອນໃດ, ເກັບເອກະສານຕ່າງໆ ເຊັ່ນ ໃບຮັບເງິນເອົາໄວ້ໃນຊອງເອກະສານ ທີ່ຫ້ອຍໄວ້ຢູ່ຫ້ອງນັ່ງຫຼິ້ນ ຫຼື ມີຕູ້ສຳລັບເກັບຢາທຸກຊະນິດ.

ຈົດບັນທຶກ: ຄວາມຈິງແລ້ວ ຄົນທີ່ມັກລືມ ຫຼື ບໍ່ມັກລືມກໍຕາມ ຄວນມີປຶ້ມບັນທຶກປະຈຳວັນ ເພື່ອບັນທຶກເຖິງສິ່ງທີ່ຕ້ອງເຮັດໃນແຕ່ລະມື້ເອົາໄວ້ (ອາດຈະບັນທຶກໄວ້ໃນໂທລະສັບມືຖື ຫຼື ແທັບເລັດ ກໍໄດ້) ລວມທັງປຶ້ມຈົດທີ່ຢູ່ ແລະ ເບີໂທຂອງໝູ່ເພື່ອນ ແລະ ບຸກຄົນສຳຄັນເອົາໄວ້ ທັງເປັນການຈົດບັນທຶກແຜນການທີ່ຕ້ອງເຮັດໃນແຕ່ລະອາທິດ ຫຼື ໃນເດືອນຖັດໄປ. ການມີປຶ້ມບັນທຶກເປັນສິ່ງສໍາຄັນ ເພາະມັນຈະຊ່ວຍເຕືອນຄວາມຈື່ຈຳໄດ້ຢ່າງງ່າຍໆ, ແຕ່ສໍາຄັນ ກໍຄື ບໍ່ຄວນລືມໃນການຈົດບັນທຶກໃນມື້ນັ້ນໆ.

ຂຽນບັນທຶກໄວ້: ເປັນອີກວິທີໜຶ່ງທີ່ຊ່ວຍເຕືອນຄວາມຈື່ຈຳໄດ້ເປັນຢ່າງດີ ເຊັ່ນ ຂຽນຂໍ້ຄວາມລົງໃສ່ເຈ້ຍແລ້ວຕິດໄວ້ໜ້າໂຕະເຮັດວຽກ ຫຼື ຈຸດທີ່ເຮົາຜ່ານເລື້ອຍໆ ເຊັ່ນ ຕູ້ເຢັນ, ແວ່ນຢູ່ທີ່ໂຕະແຕ່ງໜ້າ, ແວ່ນໃນຫ້ອງນໍ້າ, ປະຕູທາງອອກ ຫຼື ເຮົາຈະໃຊ້ເຈ້ຍ ຫຼື ກະດານນ້ອຍໆຂຽນເຕືອນໄວ້ໃນຫ້ອງນອນ ຫຼື ຫ້ອງນັ່ງຫຼິ້ນ. ການຂຽນບັນທຶກໄວ້ ເປັນວິທີການເຕືອນຄວາມຈື່ຈຳໄດ້ງ່າຍ ທັງເປັນການຊ່ວຍ ບໍ່ໃຫ້ເປັນຄົນຂີ້ລືມໄດ້.

ບໍ່ຄວນເຮັດຫຼາຍຢ່າງໃນເວລາດຽວກັນ: ຈຸດອ່ອນຂອງຄົນມັກລືມສ່ວນໃຫຍ່ ມັກຈະເປັນຄົນທີ່ບໍ່ມີສະມາທິ. ດັ່ງນັ້ນ ຖ້າເຮົາຮູ້ໂຕວ່າ ເຮົາເປັນຄົນມັກລືມ ຊຶ່ງສິ່ງສຳຄັນກໍຄື ບໍ່ຄວນເຮັດກິດຈະກຳຫຼາຍໆຢ່າງໃນເວລາດຽວກັນເຊັ່ນ ຫົດນໍ້າຕົ້ນໄມ້ໃນເວລາດຽວກັບຕອນທີ່ເປີດເຕົາແກ໊ດ ເພື່ອອຸ່ນອາຫານ ເພາະອາດຈະເຮັດໃຫ້ອາຫານໄໝ້ໄດ້, ລົມໂທລະສັບຫຼາຍສາຍໃນເວລາດຽວກັນ, ບາງຄົນມີສາຍໂທເຂົ້າພ້ອມໆກັນ ແລ້ວກໍເລືອກທີ່ຈະຮັບສາຍພ້ອມກັນ. ແຕ່ເມື່ອລົມກັບສາຍໜຶ່ງຢູ່ແລ້ວ ປ່ອຍໃຫ້ອີກສາຍໜຶ່ງຖືສາຍລໍຖ້າ, ສາຍທີ່ລໍຖ້າຢູ່ນັ້ນອາດຈະເຮັດໃຫ້ລໍຖ້າດົນເປັນຫຼາຍນາທີ.

ອາຫານບຳລຸງສະໝອງ: ປັດຈຸບັນ ທາງການແພດໄດ້ມີການວິໄຈວ່າ ມີອາຫານເສີມບາງຊະນິດທີ່ຊ່ວຍໃຫ້ຄວາມຈື່ຈຳດີຂຶ້ນ ແລະ ຊ່ວຍປ້ອງກັນຄວາມຈຳເສື່ອມ ເຊັ່ນ ສານສະກັດຈາກໃບແປ໊ະກ້ວຍ, ຜັກໜອກ… ທີ່ເພີ່ມການໄຫຼວຽນຂອງເລືອດໄປທີ່ສະໝອງ ຊຶ່ງຊ່ວຍໃຫ້ຄວາມຈື່ຈຳດີຂຶ້ນ. ສິ່ງສໍາຄັນ ກໍຄື ອາຫານເສີມບໍ່ສໍາຄັນເທົ່າກັບການກິນອາຫານໃຫ້ຄົບ 5 ໝູ່, ນອນໃຫ້ຫຼັບ, ພັກຜ່ອນໃຫ້ເຕັມທີ່ ເພື່ອເຮັດໃຫ້ສະໝອງປອດໂປ່ງ, ແຈ່ມໃສ ແລະ ມີຄວາມຈຳດີຂຶ້ນ.

ຝຶກສະໝອງຢູ່ສະເໝີ: ສະໝອງເປັນອະໄວຍະວະໜຶ່ງ ທີ່ຕ້ອງໄດ້ຮັບການຝຶກຝົນຢູ່ເປັນປະຈຳ ເພາະຖ້າບໍ່ດັ່ງນັ້ນ ເມື່ອເຖິງເວລາເສື່ອມແລ້ວ ມັນກໍຈະເສື່ອມຢ່າງໄວ ຊຶ່ງສັງເກດໄດ້ຈາກຄົນທີ່ມີນິດໄສ ບໍ່ຄ່ອຍໃສ່ໃຈສິ່ງແວດລ້ອມ ແລະ ໃຊ້ຊີວິດແບບທະເຍີທະຍານ ມັກຈະເປັນຄົນຂີ້ລືມ ຫຼາຍກວ່າຄົນທີ່ໃຊ້ສະໝອງຢູ່ເປັນປະຈຳ. ກິດຈະກຳໃນການຝຶກສະໝອງບໍ່ໃຫ້ເປັນຄົນຂີ້ລືມງ່າຍ ເຊັ່ນ ຫຼິ້ນເກມ, ດົນຕີ, ອ່ານໜັງສື, ປະດິດສິ່ງຂອງຕ່າງໆ.