ຕາມຂ່າວຈາກ ເຊອຸນ, ສ.ເກົາຫລີ ຍົກເລີກມາດຕະການຄວບຄຸມການແພ່ລະບາດ ໂຄວິດ-19 ເກືອບທັງໝົດແລ້ວ ໃນວັນທີ 18 ເມສານີ້ ຊຶ່ງຖືເປັນບາດກ້າວສຳຄັນ ເພື່ອໃຫ້ປະຊາຊົນກັບໄປໃຊ້ຊີວິດຕາມປົກກະຕິ ຫລັງຈາກ ຍອດຜູ້ຕິດເຊື້ອລາຍໃໝ່ຕ່ຳກວ່າ 50,000 ຄົນ ເປັນຄັ້ງທຳອິດ ໃນຮອບກວ່າ 2 ເດືອນຜ່ານມາ ໂດຍນັບແຕ່ມື້ນີ້ເປັນຕົ້ນໄປຂໍ້ຈຳກັດຕ່າງໆຖືກຍົກເລີກ ເພື່ອໃຫ້ຮ້ານອາຫານ ແລະ ທຸລະກິດອື່ນໆ ເປີດຈົນຮອດທ່ຽງຄືນລວມທັງ ຄຳສັ່ງຈຳກັດການເຕົ້າໂຮມກັນສູງສຸດ 10 ຄົນ ແຕ່ຍັງຄົງໃຊ້ຄຳສັ່ງ ໃຫ້ປະຊາຊົນໃສ່ຜ້າອັດປາກ-ດັງ ຕໍ່ໄປ ຈົນກວ່າຈະພິຈາລະນາໃນອີກ 2 ອາທິດ ຕໍ່ໜ້າ.
ປັດຈຸບັນ ສ.ເກົາຫລີ ພົບຜູ້ຕິດເຊື້ອສະສົມກວ່າ 16 ລ້ານຄົນ ແລະ ເສຍຊີວິດ 21,200 ກວ່າຄົນ ໂດຍມີປະຊາຊົນ ເຂົ້າຮັບການສັກວັກຊີນປ້ອງກັນ ໂຄວິດ-19 ຄົບ 2 ໂດສ 87% ແລະ ວັກຊີນເຂັມກະຕຸ້ນພູມຕ້ານທານ 64% ຈາກປະຊາກອນ ທັງໝົດ 52 ລ້ານຄົນ.