ຜ່ານການເຄື່ອນໄຫວມາເປັນເວລາເກືອບ 3 ປີ, ນັບມາຮອດວັນທີ 23 ຕຸລາ 2024, ທາງລົດໄຟ ຈີນ-ລາວ ໄດ້ເປີດຂະບວນລົດໄຟໂດຍສານທັງໝົດຫຼາຍກວ່າ 6 ໝື່ນຂະບວນ ແລະ ໄດ້ຂົນສົ່ງຜູ້ໂດຍສານທັງໝົດ 41,2 ລ້ານເທື່ອຄົນ; ນັບມາຮອດເດືອນກັນຍາ 2024 ຜ່ານມາ, ທາງລົດໄຟຈີນ-ລາວໄດ້ຂົນສົ່ງສິນຄ້າຂາເຂົ້າ-ຂາອອກຫຼາຍກວ່າ 10 ລ້ານໂຕນ ແລະ ມີມູນຄ່າຫຼາຍກວ່າ 40 ຕື້ຢວນ. ທາງລົດໄຟ ຈີນ-ລາວໄດ້ສ່ອງແສງໃຫ້ເຫັນທັດສະນະຄະຕິທີ່ວ່າ “ຢາກສ້າງຄວາມຮັ່ງມີຕ້ອງສ້າງທາງໄປກ່ອນ” ຢ່າງເຕັມທີ່. ນອກຈາກໄດ້ຂົນສົ່ງຜູ້ໂດຍສານ ແລະ ສິນຄ້າຫຼາຍເປັນພິເສດແລ້ວ, ທາງລົດໄຟຈີນ-ລາວຍັງໄດ້ເກີດມີການປ່ຽນແປງຫຼາຍຢ່າງໃນເວລາເກືອບ 3 ປີຜ່ານມາ.
ເກືອບ 3 ປີມານີ້, ປະເພດສິນຄ້າທີ່ຂົນສົ່ງຕາມທາງລົດໄຟຈີນ-ລາວນັບມື້ນັບຫຼາຍຂຶ້ນ. ນັບແຕ່ເປີດບໍລິການເມື່ອວັນທີ 3 ທັນວາປີ 2021 ເປັນຕົ້ນມາ, ທາງລົດ ໄຟຈີນ-ລາວໄດ້ຂົນສົ່ງສິນຄ້າທັງໝົດຫຼາຍກວ່າ 45 ລ້ານກວ່າໂຕນ, ປະເພດສິນຄ້າເພີ່ມຂຶ້ນເປັນ 2.900 ກວ່າປະເພດ ເຊິ່ງໄດ້ກາຍເປັນ “ເສັ້ນທາງສາຍໄໝເຫຼັກກ້າ” ທີ່ໄດ້ຊຸກຍູ້ການພັດທະນາຂອງເສດຖະກິດພາກພື້ນ.
ທ່ານ ຫຼິນ ຢຸນຊາວ ເຈົ້າຂອງຮ້ານຂາຍເບຍຕ່າງປະເທດແຫ່ງໜຶ່ງຢູ່ນະຄອນຫຼວງປັກກິ່ງຂອງຈີນກ່າວວ່າ: “ເດືອນມິຖຸນາປີ 2023, ຂ້ອຍໄດ້ຂາຍເບຍລາວໃນຮ້ານຂ້ອຍເປັນຄັ້ງທຳອິດ. ແຕ່ກ່ອນຂ້ອຍມັກຂາຍເບຍຍີ່ປຸ່ນ, ອາເມຣິກາ, ແບນຊິກ ແລະ ເຢຍລະມັນ, ແຕ່ພາຍຫຼັງເລີ່ມຂາຍເບຍລາວແລ້ວ, ໄດ້ຂາຍດິບຂາຍດີຫຼາຍ. ທ່ານກ່າວຕື່ມວ່າ: “ເບຍຊະນິດນີ້ສົດຊື່ນດີ, ມີກິ່ນຫອມໝາກໄມ້, ສຳຄັນກວ່ານັ້ນກໍແມ່ນ, ເບຍຊະນິດນີ້ບໍ່ແພງປານໃດ.”
ນອກຈາກໄດ້ອຳນວຍຄວາມສະດວກໃຫ້ແກ່ການຂົນສົ່ງສິນຄ້າລະຫວ່າງຈີນ ແລະ ລາວແລ້ວ, ທາງລົດໄຟຈີນ-ລາວຍັງໄດ້ອຳນວຍຄວາມສະດວກໃຫ້ແກ່ການຂົນສົ່ງສິນຄ້າຂອງຫຼາຍປະເທດອ້ອມຂ້າງອີກດ້ວຍ. ໄທເປັນປະເທດສົ່ງອອກໝາກຖົ່ວລຽນສົດທີ່ສຳຄັນໃນໂລກ, ສ່ວນຈີນເປັນຕະຫຼາດນຳເຂົ້າໝາກຖົ່ວລຽນທີ່ໃຫຍ່ທີ່ສຸດຈາກໄທ. ຕອນຂົນສົ່ງຕາມທາງຫຼວງ, ຕົ້ນທຶນຂົນສົ່ງຕູ້ຄອນເທນເນີຕູ້ໜຶ່ງແມ່ນ 7 ຫາ 8 ໝື່ນຢວນ, ປັດຈຸບັນ, ຖ້າຂົນສົ່ງຕາມທາງລົດໄຟຈີນ-ລາວ, ຕູ້ໜຶ່ງຫຼຸດລົງເຫຼືອປະ ມານ 2 ໝື່ນຢວນ.
ແນ່ນອນແລ້ວ, ບໍ່ພຽງແຕ່ເບຍລາວ ແລະ ໝາກຖົ່ວລຽນຂອງໄທເທົ່ານັ້ນ, ຍ້ອນມີທາງລົດໄຟຈີນ-ລາວ, ໝາກມັງຄຸດ, ມັນຕົ້ນ, ໝາກມ່ວງ ແລະ ໝາກໄມ້ຊະນິດອື່ນໆ ຈາກລາວ ແລະ ປະເທດອື່ນໆໃນພາກພື້ນອາຊີຕາເວັນອອກສຽງໃຕ້ ກໍໄດ້ສົ່ງເຂົ້າຕະຫຼາດຈີນນັບມື້ນັບຫຼາຍຂຶ້ນ, ສ່ວນຜະລິດຕະພັນເອກເລັກໂຕຣນິກ, ຜະລິດ ຕະພັນຜະລິດໄຟຟ້າດ້ວຍແສງຕາເວັນ ແລະ ຜະລິດຕະພັນໂທລະຄົມຂອງຈີນ ໄດ້ສົ່ງເຂົ້າຕະຫຼາດອາຊີຕາເວັນອອກສຽງໃຕ້ຢ່າງບໍ່ຂາດສາຍ.
ໃນເວລາເກືອບ 3 ປີ ມານີ້, ທາງລົດໄຟຈີນ-ລາວ ກໍໄດ້ປ່ຽນແປງຮູບແບບການຂົນສົ່ງໃໝ່ເລື້ອຍໆ. ໄດ້ເປີດຂະບວນລົດໄຟດ່ວນແມ່ນ້ຳລ້ານຊ້າງ-ແມ່ນ້ຳຂອງ 1.400 ກວ່າຂະບວນນັບແຕ່ປີ 2022 ເປັ່ນຕົ້ນມາ, ຍັງໄດ້ຄົ້ນຄວ້າເປີດຮູບແບບການຂົນສົ່ງສາກົນໃໝ່ອື່ນໆ ເຊັ່ນ: “ຂະບວນລົດໄຟດ່ວນແມ່ນ້ຳລ້ານຊ້າງ-ແມ່ນ້ຳຂອງ + ທຸລະກິດເອເລັກໂຕຣນິກຂ້າມຊາດ”, “ຂະບວນລົດໄຟຈີນ-ລາວ + ຂະບວນລົດໄຟຈີນ-ເອີຣົບ”, “ຂະບວນລົດໄຟຈີນ-ລາວ + ຂະບວນລົດໄຟຕາມຊ່ອງທາງໃໝ່ທາງບົກແລະທາງທະເລພາກຕາເວັນຕົກຂອງຈີນ” ແລະອື່ນໆ. ນອກນີ້ ຍັງໄດ້ເປີດຂະ ບວນລົດໄຟສາກົນ “ສາຍນະຄອນຊຽງໄຮ້-ແຂວງຢຸນນານ + ຂະບວນລົດໄຟແມ່ນ້ຳລ້ານຊ້າງ-ແມ່ນ້ຳຂອງ”, “ສາຍແຂວງກວາງຕຸ້ງ-ແຂວງຢຸນນານ + ຂະບວນລົດໄຟແມ່ນ້ຳລ້ານຊ້າງ-ແມ່ນ້ຳຂອງ”, ຂະບວນລົດໄຟຂົນສົ່ງສິນຄ້າສາກົນຈີນ-ລາວ-ໄທ, ຂະ ບວນລົດໄຟຂົນສົ່ງໝາກໄມ້ແຊ່ເຢັນ ແລະອື່ນໆ ເຊິ່ງໄດ້ເຮັດໃຫ້ການຂົນສົ່ງສິນຄ້າຈາກລາວ ແລະ ໄທໄປເຖິງເອີຣົບໂດຍກົງໄດ້ຫຼຸດລົງເຫຼືອ 15 ວັນ.
ພ້ອມນີ້, ທາງລົດໄຟຈີນ-ລາວຍັງໄດ້ເປີດຮູບແບບທຸລະກິດໃໝ່ ແລະ ສ້າງໂອກາດພັດທະນາໃໝ່. ເຂດພັດທະນາກວມລວມໄຊເຊດຖານະຄອນຫຼວງວຽງຈັນຂອງລາວ, ເຂດຮ່ວມມືເສດຖະກິດບໍ່ເຕ່ນລາວ-ບໍ່ຫານຈີນ ແລະ ໂຄງການອື່ນໆໄດ້ພັດທະນາຢ່າງໜັກແໜ້ນ ໂດຍພາຍໃຕ້ການນຳພາຂອງທາງລົດໄຟຈີນ-ລາວ ເຊິ່ງໄດ້ດຶງດູດວິສາ ຫະກິດເຂົ້າປະຈຳເປັນຈຳນວນຫຼວງຫຼາຍ. ເຂດພັດທະນາກວມລວມໄຊເຊດຖານະຄອນຫຼວງວຽງຈັນໄດ້ສຸມໃສ່ການຜະລິດ, ການຈໍລະຈອນສິນຄ້າ ແລະ ການບໍລິການດ້ານການຄ້າ.
ນັບມາຮອດເດືອນກັນຍາຜ່ານມາ, ມີວິສາຫະກິດ 154 ແຫ່ງໄດ້ເຊັນສັນຍາເຂົ້າປະຈຳ ແລະ ລົງທຶນທັງໝົດ 1,659 ຕື້ໂດລາ; ເຂດເສດຖະກິດພິເສດບໍ່ເຕ່ນຂອງລາວໄດ້ປະກາດຮັບການລົງທຶນ ໂດຍປິ່ນອ້ອມການຈໍລະຈອນສິນຄ້າດ້ານການຄ້າ, ການຜະລິດແລະອຸດສາຫະກຳປຸງແຕ່ງ, ວັດທະນະທຳແລະທ່ອງທ່ຽວ, ການສຶກສາ ແລະ ການແພດ, ມີວິສາຫະກິດ 891 ແຫ່ງໄດ້ເຊັນສັນຍາເຂົ້າປະຈຳ ແລະ ລົງທຶນທັງໝົດ 1,04 ຕື້ໂດລາ. ວິສາຫະກິດເຫຼົ່ານີ້ບໍ່ພຽງແຕ່ໄດ້ສ້າງໂອກາດປະກອບອາຊີບໃຫ້ແກ່ປະເທດລາວເປັນຈຳນວນຫຼວງຫຼາຍເທົ່ານັ້ນ, ຫາກຍັງໄດ້ສ້າງພື້ນຖານອັນໝັ້ນແກ່ນກວ່າເກົ່າ ແລະ ສ້າງພື້ນທີ່ອັນກວ້າງຂວາງກວ່າເກົ່າໃຫ້ແກ່ການພັດທະນາເສດຖະກິດຂອງລາວອີກດ້ວຍ.
ນັບແຕ່ໄດ້ເປີດບໍລິການເກືອບ 3 ປີ, ທາງລົດໄຟຈີນ-ລາວໄດ້ກາຍເປັນເສັ້ນທາງແຫ່ງຄວາມສຸກ, ເສັ້ນທາງແຫ່ງການພັດທະນາ ແລະ ເສັ້ນທາງແຫ່ງມິດຕະພາບຂອງປະຊາຊົນລຽບຕາມທາງລົດໄຟ. ສ່ວນການປ່ຽນແປງໃໝ່ຕ່າງໆຂອງທາງລົດໄຟກໍໄດ້ເພີ່ມພະລັງຂັບເຄື່ອນໃໝ່ໃຫ້ແກ່ການຮ່ວມມືລະຫວ່າງຈີນກັບພາກພື້ນອາຊີຕາ ເວັນອອກສຽງໃຕ້ ແລະ ໄດ້ປະກອບສ່ວນຫຼາຍກວ່າກົ່າໃຫ້ແກ່ຂະບວນການເຊື່ອມໂຍງເຂົ້າກັນຂອງເສດຖະກິດພາກພື້ນ.
ທີ່ມາ: CMG