ຫຼາຍຄົນຢ້ານຄວາມໂດດດ່ຽວ, ຢ້ານຊີວິດໂສດ, ຢ້ານການທີ່ຕ້ອງກາຍເປັນຄົນທີ່ຕ້ອງຢູ່ພຽງລຳພັງ ກັບພາລະຮັບຜິດຊອບທີ່ບໍ່ຮູ້ວ່າໂຕເອງຈະຮັບມືໄຫວ ຫຼື ບໍ່? ຄວາມຢ້ານເຫຼົ່ານັ້ນ ້ດີເຂຶ້ນເພາະຫຼາຍຄົນຍຶດຕິດວ່າ “ຊີວິດນີ້ຕ້ອງມີຄູ່” ໃນເມື່ອຄວາມເປັນຈິງແລ້ວ ທ່ານສາມາດຢູ່ພຽງລຳພັງໄດ້ຢ່າງມີຄວາມສຸກ ແຕ່ຖ້າທ່ານຍັງບໍ່ສາມາດກ້າວຂ້າມຄວາມຮູ້ສຶກໂດດດ່ຽວໄດ້ ທ່ານຄວນລອງ 5 ວິທີຕໍ່ຈາກນີ້ໄປທີ່ຈະເຮັດໃຫ້ທ່ານຫຼຸດພົ້ນຈາກຄວາມຮູ້ສຶກໂດດດ່ຽວ ແລະ ຈະເຮັດໃຫ້ທ່ານກາຍເປັນຄົນທີ່ມີຄວາມສຸກ ແລະ ຮັກໂຕເອງຫຼາຍຂຶ້ນ.
- ຍອມມຮັບໃນສິ່ງທີ່ເກີດຂຶ້ນ ແລະ ຮູ້ທັນອາລົມໂຕເອງ
ຫຼາຍຄົນຮູ້ສຶກວ່າ ການຕ້ອງຢູ່ຄົນດຽວ ຫຼື ຢູ່ຢ່າງລຳພັງ ເປັນເລື່ອງທີ່ບໍ່ກ້າເປີດເຜີຍກັບໃຜ ເພາະຢ້ານຄົນອື່ນຈະເບິ່ງວ່າເປັນຄົນທີ່ບໍ່ມີຄົນຢາກຈະຮັກ, ແຕ່ແທ້ຈິງແລ້ວ ການທີ່ທ່ານຕ້ອງຢູ່ລຳພັງຄົນດຽວບໍ່ວ່າຈະດ້ວຍເຫດຜົນໃດໆກໍຕາມ ຂໍໃຫ້ຍອມຮັບກັບສະຖານະການທີ່ເກີດຂຶ້ນ ແລະ ຮຽນຮູ້ທີ່ຈະມີຄວາມສຸກກັບການດຳເນີນຊີວິດທີ່ຈະເຮັດໃຫ້ເຮົາຮູ້ຈັກຄວາມສາມາດຂອງໂຕເອງຫຼາຍຂຶ້ນ, ເຖິງວ່າຈະຮູ້ສຶກເຫງົາແດ່ ແຕ່ຖ້າທ່ານຮູ້ຈັກຫາກິດຈະກຳເຮັດ ແລະ ຮັກໂຕເອງໃຫ້ເປັນ ຄວາມຮູ້ສຶກຫງົາກໍຈະບໍ່ມີຜົນຫຍັງຕໍ່ທ່ານ.
2. ສ້າງເວລາສ່ວນໂຕຂອງທ່ານ ໃຫ້ອອກມາຈາກຕາລາງເວລາປະຈຳວັນ
ການໃຊ້ເວລາກັບໝູ່ເພື່ອນອາດເປັນເລື່ອງມ່ວນຊື່ນ ແລະ ໃນຂະນະດຽວກັນ ການທີ່ທ່ານມີຕາຕະລາງວຽກປະຈຳທີ່ຕ້ອງເຮັດ ທັງວຽກຫ້ອງການ ແລະ ວຽກບ້ານ ຈົນເຮັດໃຫ້ທ່ານເກືອບຈະບໍ່ມີເວລາເປັນຂອງໂຕເອງ. ດັ່ງນັ້ນ, ຂໍໃຫ້ທ່ານສ້າງ ເວລາສ່ວນໂຕຂອງທ່ານເອງ ອາດຈະເປັນຊ່ວງເວລາປະມານ 1-2 ຊົ່ວໂມງ ທີ່ຢູ່ໃນຕາຕະລາງເວລາປະຈຳວັນຂອງທ່ານ ຊ່ວງເວລາທີ່ທ່ານຈະໄດ້ພັກຜ່ອນ ແລະ ຜ່ອນຄາຍ, ໄດ້ເຮັດສິ່ງທີ່ທ່ານມັກ ຊ່ວງເວລາແບບນີ້ສຳຄັນຫຼາຍ ເພາະການໄດ້ຢູ່ກັບໂຕເອງ, ໄດ້ເຮັດສິ່ງທີ່ໂຕເອງມັກ ຈະເຮັດໃຫ້ທ່ານຮູ້ສຶກວ່າ ຊີວິດທີ່ຕ້ອງຢູ່ພຽງລຳພັງມີຄຸນຄ່າເປັນຢ່າງຍິ່ງ.
3.ເບິ່ງແຍງຮັກສາສຸຂະພາບໃຫ້ແຂງແຮງຢູ່ຕະຫຼອດເວລາ
ຄຳສຸພາສິດທີ່ວ່າ “ຮ່າງກາຍທີ່ແຂັງແຮງ ນຳມາເຊິ່ງສຸຂະພາບໃຈທີ່ດີ” ນັ້ນແມ່ນຄວາມຈິງທີ່ຫາຂໍ້ຕອບໂຕ້ບໍ່ໄດ້ເລີຍ ເພາະວ່າເຖິງທ່ານຈະມີເພື່ອນອ້ອມຮອບຢູ່ຫຼາຍປານໃດ, ມີກິດຈະກຳໃຫ້ເຮັດບໍ່ເວັ້ນວັນ ຫຼື ມີໜ້າທີ່ການງານທີ່ສຳຄັນທີ່ຕ້ອງໄດ້ຮັບຜິດຊອບ ແຕ່ທ້າຍທີ່ສຸດແລ້ວຮ່າງກາຍທີ່ແຂັງແຮງ ຈະເຮັດໃຫ້ທ່ານຮັບມືກັບທຸກສິ່ງໄດ້ດ້ວຍສຸຂະພາບໃຈທີ່ດີ.
ດັ່ງນັ້ນ, ເລືອກອອກກຳລັງກາຍທີ່ທ່ານມັກ ບໍ່ວ່າຈະເປັນການຫຼິ້ນໂຢຂະ, ອອກໄປຍ່າງ ຫຼື ແລ່ນເບົາໆ, ການເຕັ້ນ ຫຼື ສ້າງຮ່າງກາຍໃຫ້ມີກ້າມຊີ້ນທີ່ສວຍງາມເຫຼົ່ານີ້ ເຊິ່ງລ້ວນແລ້ວແຕ່ເຮັດໃຫ້ຈິດໃຈຂອງທ່ານດີຂຶ້ນຕາມລຳດັບ ເພາະນອກຈາກຈະເປັນການເຮັດເພື່ອໂຕເອງແລ້ວ ຍັງເຮັດໃຫ້ທ່ານຮູ້ສຶກພູມໃຈໃນຮູບຮ່າງຂອງທ່ານອີກດ້ວຍ ຂະນະດຽວກັນຄວນດື່ມນ້ຳໃຫ້ຫຼາຍໆ, ນອນຫຼັບຢ່າງພຽງພໍ ແລະ ກິນອາຫານທີ່ມີປະໂຫຍດ. ເຫຼົ່ານີ້ຄືການເຮັດໃຫ້ຮ່າງການຂອງທ່ານແຂງແຮງ ແລະ ສຸຂະພາບດີ ທ່ານຈົ່ງຈື່ໄວ້ວ່າ ເມື່ອທ່ານເບິ່ງແຍງຮ່າງກາຍທ່ານດີ ວິທີຄິດຂອງທ່ານຕໍ່ສິ່ງຮອບຂ້າງຈະດີຕາມໄປນຳ.
4. ເປີດໃຈຮັບໂອກາດ ຫຼື ສິ່ງໃໝ່ໆທີ່ເຂົ້າມາໃນຊີວິດ
ຫຼາຍຄົນທີ່ຕ້ອງຕິດຢູ່ໃນຄວາມຮູ້ສຶກໂດດດ່ຽວ ມັກຈະບໍ່ກ້າເປີດໃຈຮັບສິ່ງໃໝ່ ເພາະຢ້ານທີ່ຈະເຈັບຄືກັບທີ່ຜ່ານມາ ຢ້ານຖືກຖິ້ມໃຫ້ຢູ່ພຽງລຳພັງອີກ, ຖ້າທ່ານຮູ້ສຶກແບບນີ້ ສິ່ງທີ່ຕ້ອງເຮັດຄື ບັງຄັບໂຕເອງໃຫ້ອອກຈາກກອບຄວາມຮູ້ສຶກທີ່ທ່ານວາງເອົາໄວ້ ອອກໄປຫາໝູ່ເພື່ອນ ຫຼື ພົບປະກັບຄົນອື່ນແດ່ຢ່າງໜ້ອຍມື້ລະຄັ້ງ, ໄປຢາມພໍ່ແມ່, ຢາມຍາດພີ່ນ້ອງ ຫຼື ນັດກິນເຂົ້າກັບໝູ່ ສິ່ງເຫຼົ່ານີ້ຈະເຮັດໃຫ້ທ່ານໄດ້ປັບຄວາມຮູ້ສຶກຂອງໂຕເອງ ເປີດໂອກາດໃຫ້ຄົນທີ່ພ້ອມຈະເປັນມິດເຂົ້າມາໃນຊີວິດ, ທັງນີ້ ການຮັກສາສຳພັນທະພາບທີ່ດີກັບຄົນຮອບຂ້າງ ທີ່ພ້ອມຈະໃຫ້ຄວາມຮູ້ສຶກດີໆກັບທ່ານ.
5. ເຮັດໃນສິ່ງທີ່ທ່ານຮູ້ສຶກວ່າເຮັດໃຫ້ໂຕເອງມີຄວາມສຸກ
ຖ້າທ່ານມັກເຮັດອາຫານ ທ່ານກໍເຮັດອາຫານ ຫຼື ໄປຮຽນເຮັດອາຫານ ຖ້າທ່ານເປັນຄົນມັກຫາຂອງກິນແຊບໆກິນ ກໍອອກໄປຫາຂອງແຊບໆທີ່ທ່ານມັກ ຫຼື ຖ້າທ່ານມັກແລ່ນ ກໍຊ້ອມແລ່ນຈົນໄປຮ່ວມແລ່ນມາຣາທອນໄປເລີຍ ນີ້ແມ່ນໂຕຢ່າງພຽງເລັກໆນ້ອຍໆຂອງກິດຈະກຳສຳລັບຄົນໂສດ ເພາະແຕ່ລະຄົນມີສິ່ງທີ່ມັກບໍ່ຄືກັນ ແລະ ຫົນທາງທີ່ດີທີ່ສຸດໃນການຢຸດຄວາມຮູ້ສຶກໂດດດ່ຽວຂອງໂຕເອງ ຄື ຫັນໄປຫາສິ່ງທີ່ມັກ ແລະ ມີຄວາມສຸກກັບສິ່ງທີ່ມັກ, ເພາະນອກຈາກການລົງມືເຮັດແລ້ວຮູ້ສຶກມີຄວາມສຸກ ຈະເຮັດໃຫ້ເວລາຜ່ານໄປຢ່າງໄວ ແລ້ວທ່ານອາດພົບຫົນທາງໃນການຕໍ່ຍອດຈາກສິ່ງທີ່ທ່ານມັກ ຈົນກາຍເປັນູວາມສຳເລັດຢ່າງໜຶ່ງໃນຊີວິດຂອງທ່ານໄປເລີຍກໍໄດ້.