ປັດຈຸບັນ ບໍ່ວ່າຈະຫຼຽວໄປທາງໃດ ກໍຈະເຫັນທັງຜູ້ໃຫຍ່ ໄປຈົນເຖິງເດັກນ້ອຍ ພາກັນຫຼິ້ນໂທລະສັບມືຖື, ລວມທັງເດັກຕຳ່ກວ່າ 2 ປີ ທີ່ຍັງເວົ້າບໍ່ເກັ່ງ ກໍຫຼິ້ນມືຖືສະມາດໂຟນ ແລະ ແທ໊ບເລ໊ດ ໄດ້ຢ່າງຄ່ອງມື.
ເດັກນ້ອຍຍັງໄຮ້ດຽງສາ, ພໍ່ແມ່ ຄວນຮູ້ວ່າ ຜົນເສຍຂອງການໃຫ້ລູກຫຼິ້ນມືຖື ມີຢ່າງຫຼວງຫຼາຍ ເພາະຖ້າຫາກໃຊ້ບໍ່ເປັນ ບໍ່ຖືກກາລະເທສະ ຫຼື ບໍ່ຖືກກັບຄົນໃນແຕ່ລະໄວ ກໍຍິ່ງມີຜົນເສຍຕາມມາ.
ພໍ່ແມ່ໃນຍຸກນີ້ ມັກຈະມີເຫດຜົນມາປະກອບສະເໝີ ເພື່ອເອົາອຸປະກອນເຫຼົ່ານີ້ໃຫ້ລູກນ້ອຍໂຕເອງຫຼິ້ນ ເຊັ່ນ:
- ບໍ່ມີເວລາເບິ່ງແຍງ ເພາະຕ້ອງເຮັດວຽກ.
- ຢ້ານລູກບໍ່ທັນສະໄໝ, ຢ້ານລູກດ້ອຍກວ່າລູກຄົນອື່ນ.
- ຫຼືແມ່ນແຕ່ເຫດຜົນທີ່ພໍຈະຟັງຂຶ້ນແດ່ ກໍຄື ຢາກໃຫ້ລູກໄດ້ຮຽນຮູ້ ເພາະມີຫຼາຍຢ່າງທີ່ມີປະໂຫຍດໃນດ້ານການສຶກສາ ຢູ່ໃນມືຖື.
ແຕ່ວ່າ ຂໍ້ດີນັ້ນ ຈະພຽງພໍ ຫຼືບໍ່ ຖ້າທຽບກັບຊ່ວງອາຍຸ ແລະ ຜົນກະທົບທີ່ກຳລັງຈະເກີດຕາມມາ. ມີຜົນການສຶກສາຂອງ Dr. Jenny Radesky ກຸມມານແພດ ແຫ່ງສູນການແພດ ບອສຕັນ, ສະຫະລັດ ອາເມຣິກາ ແລະ ເປັນຜູ້ຊ່ຽວຊານ ດ້ານການພັດທະນາການຂອງເດັກ ເຊິ່ງໄດ້ສຶກສາພຶດຕິກຳຂອງພໍ່ແມ່ ທີ່ມີຕໍ່ລູກນ້ອຍ ທີ່ກິນອາຫານໃນຮ້ານອາຫານ ພົບວ່າ: ພໍ່ແມ່ 55 ຄົນ ໃຊ້ສະມາດໂຟນໃນລະຫວ່າງການກິນອາຫານ ເຖິງແມ່ນວ່າ ເດັກຈະຮ້ອງໄຫ້ ຫຼືສະແດງພຶດຕິກຳທີ່ຮຽກຮ້ອງຄວາມສົນໃຈ ຈາກພໍ່ແມ່ແບບໃດກໍຕາມ, ພໍ່ແມ່ຈະສົນໃຈການລົມໂທລະສັບຫຼາຍກວ່າລູກ
Dr. Jenny ກ່າວວ່າ: ເດັກຮຽນຮູ້ພາສາ, ອາລົມ ແລະ ການຄວບຄຸມອາລົມຂອງໂຕເອງ ໂດຍການເຝົ້າເບິ່ງ ກິລິຍາ, ການສົນທະນາ ແລະ ການສະແດງອອກທາງສີໜ້າຂອງຜູ້ຄົນທີ່ຢູ່ອ້ອມໂຕ, ຖ້າເດັກ ຫຼື ພໍແມ່ໃຊ້ເວລາສ່ວນໃຫຍ່ຢູ່ໜ້າຈໍ ກໍຈະເຮັດໃຫ້ຂາດການຮູ້ຮູ້ດັ່ງກ່າວ. ສິ່ງນີ້ ຈະສົ່ງຜົນຕໍ່ການພັດທະນາໃນດ້ານຕ່າງໆ ອັນໝາຍເຖິງ ເດັກຈະຕ້ອງການໃຫ້ຜູ້ອື່ນຕອບສະໜອງຕໍ່ຕົນເອງໃນແບບຢ່າງດຽວກັບທີ່ ສະມາດໂຟນຕອບສະໜອງ ຄື ຕ້ອງເຄື່ອນໄຫວຢ່າງວ່ອງໄວ, ມີສີສັນ, ບາງຄັ້ງອາດເຖິງຂັ້ນໃຊ້ຄວາມຮຸນແຮງ.