ແຫລ່ງຂ່າວຈາກ ເມືອງ ໂຂງ, ແຂວງ ຈຳປາສັກ ໃຫ້ຮູ້ວ່າ: ວັນທີ 4 ພຶດສະພາ 2022 ນີ້, ຄະນະກຳມະການ ຈັດຕັ້ງປະຕິບັດມາດຕະຖານ ໂຮງແຮມ ສີຂຽວ ອາຊຽນ ຂັ້ນກະຊວງ, ແຂວງ ແລະ ເມືອງ ລົງເຄື່ອນໄຫວເຮັດວຽກຢູ່ບັນດາໂຮງແຮມທີ່ນອນໃນເປົ້າໝາຍ ເປັນຕົ້ນ ໂຮງແຮມ ແສງອາລຸນ ວິນລາ ດອນຄອນ ແລະ ໂຮງແຮມ ໂກເດັນ ດອນເດດ ເມືອງໂຂງ ເພື່ອເປັນການຊຸກຍູ້ສົ່ງເສີມບັນດາໂຮງແຮມທີ່ມີເປົ້າໝາຍ ໃນການສ້າງເປັນໂຮງແຮມສີຂຽວອາຊຽນ ເພື່ອຮອງຮັບນັກທ່ອງທ່ຽວທັງ ພາຍໃນ ແລະ ຕ່າງປະເທດ ໃນຕໍ່ໜ້າ.
ທ່ານ ບຸນທະວີ ສີຣິເພັງພະຈັນ ຫົວໜ້າຫ້ອງການຖະແຫລງຂ່າວ, ມັດທະນະທຳ ແລະ ທ່ອງທ່ຽວ ເມືອງໂຂງ ໄດ້ໃຫ້ຮູ້ໂດຍສັງເຂບວ່າ: ກ່ອນທີ່ບັນດາໂຮງແຮມ ກໍຄື ຜູ້ປະກອບການດ້ານບໍລິການໃດໜຶ່ງ ຈະໄດ້ຮັບໃບຢັ້ງຢືນ ຈະຕ້ອງໄດ້ຖືກປະເມີນຕາມຂັ້ນຕອນ ແລະ ຮັບຮອງຈາກພາກສ່ວນທີ່ກ່ຽວຂ້ອງ ເຊິ່ງການລົງມາປະເມີນໃນຄັ້ງນີ້, ພາກສ່ວນກ່ຽວຂ້ອງ ໄດ້ມີແບບຟອມປະເມີນຜົນ ຕາມມາດຕະຖານ ໂຮງແຮມ ສີຂຽວ ອາຊຽນ ຢ່າງຊັດເຈນ ໂດຍມີເງື່ອນໄຂສະເພາະ ເປັນຕົ້ນ ນະໂຍບາຍ ແລະ ແຜນຈັດຕັ້ງປະຕິບັດງານທາງດ້ານສິ່ງແວດລ້ອມຂອງໂຮງແຮມ, ການນຳໃຊ້ຜະລິດຕະພັນທີ່ເປັນມິດກັບສິ່ງແວດລ້ອມ, ການຮ່ວມມືກັບຊຸມຊົນ ແລະ ອົງການຈັດຕັ້ງທ້ອງຖິ່ນ, ການພັດທະນາບຸກຄະລາກອນ, ການຄຸ້ມຄອງຂີ້ເຫຍື້ອ (ສິ່ງເສດເຫລືອຕ່າງໆ), ການນຳໃຊ້ພະລັງງານຢ່າງມີປະສິດທິພາບ, ການນຳໃຊ້ນ້ຳ ແລະ ການຄຸ້ມຄອງນ້ຳຢ່າງມີປະສິດທິພາບ, ການຄຸ້ມຄອງຄຸນນະພາບຂອງອາກາດ (ຢູ່ພາຍໃນ ແລະ ພາຍນອນອາຄານ), ການຄຸ້ມຄອງມົນລະພິດທາງສຽງ, ການບຳບັດ ແລະ ການຄຸ້ມຄອງນ້ຳເປື້ອນ, ການຈັດການຂີ້ເຫຍື້ອທີ່ມີສານເຄມີ ແລະ ວັດຖຸທີ່ເປັນພິດ.
ບັນດາມາດຖານເຫລົ່ານີ້, ຜູ້ປະກອບການໂຮງແຮມ ແມ່ນຈຳເປັນຈະຕ້ອງປະຕິບັດຢ່າງເຂັ້ມງວດ ເຊິ່ງໄລຍະຜ່ານມາ ເມືອງໂຂງ ກໍມີໂຮງແຮມ ທີ່ຖືກຮັບຮອງເປັນ ໂຮງແຮມ ສີຂຽວ ອາຊຽນ ແລ້ວ 1 ແຫ່ງຄື: ໂຮງແຮມ ປອນອາລິນາ ທີ່ໄດ້ຮັບໃບຢັ້ງຢືນໃນຕົ້ນປີ 2022 ທີ່ຜ່ານມາ.
ຂໍ້ມູນຂ່າວ-ພາບ: ພຸດທະສິນ