ວັນທີ 3 ພຶດສະພາ 2022 ທີ່ສະຫະພັນບານເຕະແຫ່ງຊາດລາວ, ນະຄອນຫລວງ ວຽງຈັນ ໄດ້ຈັດພິທີມອບຫລຽນລາງວັນ ອັນດັບທີ 3 ໃຫ້ນັກກິລາບານເຕະຊາຍ ລຸ້ນອາຍຸ 23 ປີ ຫລື ຢູ 23 ທີມຊາດລາວ ທີ່ໄດ້ອັນດັບ 3 ຮ່ວມໃນການແຂ່ງ ຂັນບານເຕະຊີງແຊ້ມ ອາຊຽນ ລຸ້ນອາຍຸ 23 ປີ ທີ່ຈັດຂຶ້ນຢູ່ນະຄອນຫລວງ ພະນົມເປັນ ແຫ່ງຣາຊອານາຈັກ ກຳປູເຈ່ຍ ໃນລະຫວ່າງ ວັນທີ 14-26 ກຸມພາ 2022 ຜ່ານມາ ໂດຍການໃຫ້ກຽດມອບຂອງ ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ, ທ່ານ Khiev Sameth ປະທານ ສະຫະພັນບານເຕະອາຊຽນ, ທ່ານ Winston Lee ເລຂາທິການສະຫະພັນບານເຕະ ອາຊຽນ.
ໃນພິທີມອບຫລຽນລາງວັນໃນຄັ້ງນີ້, ທ່ານ Khiev Sameth ປະທານ ສະຫະພັນບານເຕະ ອາຊຽນ ໄດ້ສະແດງຄວາມຊົມເຊີຍກັບຜົນສໍາເລັດຂອງນັກກິລາບານເຕະ ຢູ່ 23 ທີມຊາດລາວ ທີ່ສາມາດຍາດໄດ້ອັນດັບທີ 3 ເປັນຄັ້ງປະຫວັດສາດ ແລະ ສະແດງຄວາມເຊື່ອຫມັ້ນວ່າໃນ ກິລາ ຊີເກມ ຄັ້ງທີ XXXI ທີ່ຈະຈັດຂຶ້ນຢູ່ ຫວຽດນາມ ຈະປະສົບຜົນສໍາເລັດຕາມທີ່ຄາດຫວັງໄວ້.
ສໍາລັບຜົນງານການແຂ່ງຂັນ ບານເຕະຊີງແຊ໋ມ ອາຊຽນ ລຸ້ນອາຍຸ 23 ປີ, ນັກກິລາບານເຕະ ຢູ 23 ທີມຊາດລາວ ສາມາດຜ່ານເຂົ້າຮອບຮອງຊະນະເລີດສໍາເລັດ ພາຍ ຫລັງເອົາຊະນະ ທີມຊາດມາເລເຊຍ ທັງ 2 ນັດ ໃນຮອບຄັດເລືອກ ໄດ້ເຂົ້າຮອບເປັນທີ 1 ຂອງກຸ່ມ B ແຕ່ເສຍໃຫ້ທີມຊາດໄທໃນຮອບຮອງຊະນະເລີດ ແລະ ໂຊກຮ້າຍກວ່ານັ້ນແມ່ນບໍ່ສາມາດລົງແຂ່ງຂັນຊີງອັນດັບທີ 3 ກັບ ທີມຊາດ ຕີມໍ ເລສເຕ ໄດ້ຍ້ອນວ່ານັກກິລາລາວຈຳນວນຫຼາຍຕິດເຊື້ອພະຍາດ ໂຄວິດ-19 ເຮັດໃຫ້ຈໍາເປັນຕ້ອງຂໍຖອນຕົວ, ແຕ່ສະຫະພັນບານເຕະ ອາຊຽນ (AFF) ໄດ້ຕັດສິນໃຫ້ ຢູ-23 ຂອງ ລາວ ແລະ ຢູ-23 ຕີມໍເລສເຕ ຄອງອັນດັບ ທີ 3 ຮ່ວມກັນ.
