ສປປ ລາວ ບັນລຸຂໍ້ຕົກລົງ Project Development Agreement (PDA) ຊຶ່ງແມ່ນໂຄງການກໍ່ສ້າງໂຮງງານໄຟຟ້າດ້ວຍພະລັງງານລົມ ໃນເນື້ອທີ່ 2.687 ເຮັກຕາ ຢູ່ເມືອງເຊໂປນ ແຂວງສະຫວັນນະເຂດ ກັບ ບໍລິສັດຫຸ້ນສ່ວນການລົງທຶນ ເອເອັມໄອ ກວາງບິ່ງ (AMI) ໂດຍໄລຍະໜຶ່ງຈະມີກຳລັງການຜະລິດໄຟຟ້າ 187,2 ເມກາວັດ ຊຶ່ງຄາດວ່າ ຈະສຳເລັດໂຄງການທ້າຍປີ 2023 ແລະ ດຳເນີນການຜະລິດຢ່າງເປັນທາງການໃນໄຕມາດ 4 ປີ 2025 ເພື່ອສົ່ງອອກໄປ ສສ ຫວຽດນາມ.
ພິທີເຊັນສັນຍາໂຄງການດັ່ງກ່າວ ໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ ໂດຍການລົງນາມລະຫວ່າງ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ຫງວຽນ ນາມ ຖັງ (Nguyen Nam Thang) ປະທານສະພາບໍລິຫານ ບໍລິສັດ (AMI) ໂດຍມີ ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ທັງເປັນປະທານສະມາຄົມມິດຕະພາບ ລາວ-ຫວຽດນາມ; ທ່ານ ຫວຽນ ບ໋າ ຮຸ່ງ (Nguyen Ba Hung) ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາ ສປປ ລາວ; ທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ພ້ອມດ້ວຍທຸກພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ຫງວຽນ ນາມ ຖັງ ກ່າວວ່າ: ສັນຍາພັດທະນາໂຄງການ PDA ທີ່ໄດ້ຮ່ວມລົງນາມໃນຄັ້ງນີ້ ສະແດງໃຫ້ເຫັນເຖິງຄວາມເຊື່ອໝັ້ນທີ່ລັດຖະບານລາວ ທີ່ມີໃຫ້ ບໍລິສັດ ເອເອັມໄອ ກວາງບິ່ງ ໃນການຈັດຕັ້ງປະຕິບັດໂຄງການດັ່ງກ່າວ ຊຶ່ງນັບຕັ້ງແຕ່ມີການລົງນາມໃນບົດບັນທຶກຊ່ວຍຈໍາມາຮອດປັດຈຸບັນ ກໍເປັນໄລຍະເວລາ 7 ເດືອນ ຖືວ່າແມ່ນສະຖິຕິໃໝ່ຊຶ່ງບໍ່ມີມາກ່ອນ ໃນການພັດທະນາໂຄງການພະລັງງານຢູ່ ສປປ ລາວ. ໂຄງການກໍ່ສ້າງໂຮງໄຟຟ້າພະລັງງານລົມແຫ່ງນີ້, ໄລຍະທີ 1 ຊຶ່ງມີກຳລັງການຜະລິດ 187,2 ເມກາວັດ (ສາມາດເພີ່ມຂຶ້ນເປັນ 252 ເມກາວັດ) ຈະເລີ່ມລົງມືກໍ່ສ້າງໃນໄຕມາດທີ 2 ປີ 2024 ແລະ ດຳເນີນການຜະລິດຢ່າງເປັນທາງການໃນໄຕມາດທີ 4 ຂອງປີ 2025. ໂຄງການນີ້, ຖືເປັນການປະຕິບັດຕົວຈິງ, ເຫັນໄດ້ໝາກຜົນ ແລະ ຖືເປັນໂຄງການຕົວແບບ, ເປັນສິ່ງຢືນຢັນໃຫ້ເຫັນເຖິງການຮ່ວມມືພັດທະນາເສດຖະກິດ ລາວ-ຫວຽດນາມ ໃນໄລຍະໃໝ່.
ອີງໃສ່ບົດລາຍງານຄວາມເປັນໄປໄດ້ ໃນການຈັດຕັ້ງປະຕິບັດໂຄງການ ທີ່ໄດ້ຮັບການອະນຸມັດຈາກ ກະຊວງພະລັງງານ ແລະ ບໍ່ແຮ່, ເພື່ອສົ່ງເສີມຄວາມຄືບໜ້າຂອງໂຄງການ ແລະ ບັນລຸໄດ້ເປົ້າໝາຍການສົ່ງອອກໄຟຟ້າໃຫ້ໄດ້ໃນໄຕມາດທີ 4 ປີ 2025, ບໍລິສັດ AMI ໄດ້ສະເໜີໃຫ້ກະຊວງອຸດສາຫະກຳ ແລະ ການຄ້າຫວຽດນາມ ແລະ ສະຫະບໍລິສັດໄຟຟ້າຫວຽດນາມ ກ່ຽວກັບແຜນການເຊື່ອມເຄືອຂ່າຍ ແລະ ລົງ ທຶນຕິດຕັ້ງສາຍສົ່ງໄຟຟ້າແຮງສູງ 220 ກິໂລໂວນ ຄວາມຍາວປະມານ 40 ກິໂລແມັດ ຈາກສະຖານີໄຟຟ້າ 220 ກິໂລໂວນຂອງໂຄງການ PDA ສະຫວັນນະເຂດ ໄປຫາສະຖານີໄຟຟ້າ 550 ກິໂລໂວນ ລາວບາວ ຂຶ້ນກັບເມືອງເຮືອງຮວາ ແຂວງກວາງຈິ ສສ ຫວຽດນາມ ໂດຍບໍລິສັດ ຈະເປັນເຈົ້າການໃນການຊົດເຊີຍ ແລະ ບຸກເບີກພື້ນທີ່ຂອງໂຄງການ, ໄດ້ຮັບສິດຄຸ້ມຄອງ ແລະ ພັດທະນາໂຄງການ ຮອດປີ 2030.
ທ່ານ ສະຖາບັນດິດ ອິນສີຊຽງໃໝ່ ກ່າວວ່າ: ລັດຖະບານລາວ ກຳລັງສຸມໃສ່ຈັດຕັ້ງປະຕິບັດແຜນພັດທະນາເສຖະກິດ-ສັງຄົມ 5 ປີ (2021-2025) ໃນນັ້ນຂະແໜງພະລັງງານເປັນທ່າແຮງບົ່ມຊ້ອນຂອງ ສປປ ລາວ ຍ້ອນມີພູມສັນຖານທີ່ເອື້ອອຳນວຍແກ່ການພັດທະນາພະລັງງານເປັນຕົ້ນ: ພະລັງງານໄຟຟ້າຈາກນໍ້າ, ຈາກລົມ, ຈາກແສງຕາເວັນ ແລະ ອື່ນໆ. ເວົ້າສະເພາະການພັດທະນາພະລັງງານລົມ ມີຄວາມສອດຄ່ອງສອງ ເພື່ອຊຸກຍູ້ການພັດທະນາເສຖະກິດ-ສັງຄົມ ໂດຍສະເພາະການສ້າງບາດກ້າວຫັນປ່ຽນໃໝ່ ຕາມໂຄງການສ້າງເສດຖະກິດທີ່ທັນສະໄໝ, ມີຄຸນນະພາບ ຕາມທິດສີຂຽວ ຍືນຍົງ ຊຶ່ງສະເພາະໂຄງການນີ້ ກໍແມ່ນໜຶ່ງໃນໂຄງການທີ່ນອນຢູ່ໃນແຜນຂາຍໄຟຟ້າໃຫ້ ສສ ຫວຽດນາມ ໃນທ້າຍປີ 2025.
(ຂ່າວ: ສຸກສະຫວັນ, ພາບ-ຂໍ້ມູນ: AMI)