ກອງປະຊຸມພົບປະແລກປ່ຽນລະຫ່ວາງ ຄະນະຜູ້ແທນເມືອງຈຽງເຊິນ ນະຄອນພູເອີ ແຂວງຢຸນນານ ແຫ່ງ ສປຈີນ ກັບ ແຂວງຜົ້ງສາລີ ໄດ້ມີຂຶ້ນເມື່ອບໍ່ດົນມານີ້ ທີ່ແຂວງຜົ້ງສາລີ, ຝ່າຍແຂວງຜົ້ງສາລີ ນຳໂດຍ ທ່ານ ຄຳຜອຍ ວັນນະສານ ກໍາມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີ ແລະ ຝ່າຍ ເມືອງຈຽງເຊີນ ນຳໂດຍທ່ານ ຫູ ຊິງ ຫົວ ເລຂາພັກເມືອງຈຽງເຊິນ ນະຄອນພູເອີ ແຂວງຢຸນນານ ແຫ່ງ ສປ ຈີນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ໃນໂອຫກາດດັ່ງກ່າວ ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ໄດ້ກ່າວສະແດງຄວາມຮັບ, ພ້ອມທັງຕີລາຄາສູງຕໍ່ ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນເມືອງຈຽງເຊິນ ໃນຄັ້ງນີ້ ຊຶ່ງເປັນການເສີມຂະຫຍາຍສາຍພົວພັນມິດຕະພາບ, ຄູ່ຮ່ວມມືຍຸດທະສາດຮອບດ້ານ, ໝັ້ນຄົງ ແລະ ຍາວນານ ຕາມທິດ 4 ດີ; ຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ເວົ້າລວມ, ເວົ້າສະເພາະແຂວງຜົ້ງສາລີ – ເມືອງຈຽງເຊິນ ແຫ່ງ ສປ ຈີນ. ພ້ອມກັນນັ້ນທັງສອງຝ່າຍໄດ້ຜັດປ່ຽນກັນລາຍງານສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມ ໃນໄລຍະທີ່ຜ່ານໃຫ້ກັນຊາບ ຊຶ່ງສອງຝ່າຍເຫັນດີເປັນເອກະພາບຮ່ວມກັນວ່າເພື່ອສືບຕໍ່ປົກປັກຮັກສາຄວາມສະເໝີພາບ, ຄວາມເປັນລະບຽບຮຽບຮ້ອຍລຽບຕາມຊາຍແດນສອງຝ່າຍ, ຊຸກຍູ້ ແລະ ປະກອບສ່ວນໃນການພັດທະນາເສດຖະກິດ-ສັງຄົມໃຫ້ມີບາດກ້າວຂະຫຍາຍຕົວເທື່ອລະກ້າວ.
ການປຶກສາຫາລື ຄັ້ງນີ້ ສອງຝ່າຍໄດ້ເອກະພາບຕໍ່ທິດທາງແຜນການຮ່ວມມືໃນຕໍ່ໜ້າເປັນຕົ້ນແມ່ນ: ສອງຝ່າຍເຫັນດີສະໜັບສະໜູນໃຫ້ເມືອງຍອດອູ ກັບ ເມືອງຈຽງເຊິນເຊັນບົດບັນທຶກຊ່ວຍຈຳເພື່ອເປັນບ່ອນອີງໃນການສ້າງສັນຍາເມືອງມິດຕະພາບ, ແຂວງຜົ້ງສາລີ ເຫັນດີສະໜັບໜູນເມືອງຈຽງເຊິນຈັດງານມະຫາກຳໂຍນໝາກຄອນ 3 ປະເທດລາວ – ຫວຽດນາມ – ຈີນ ຄັ້ງທີ 7 ແລະ ງານແລກປ່ຽນສິນຄ້າຕາມລຽບຊາຍແດນ, ສອງຝ່າຍພ້ອມກັນອອກແຮງຊຸກຍູ້ການຍົກລະດັບດ່ານລານຕຸ້ຍ-ດ່ານເມືອງຄຳ ເປັນຕົ້ນແມ່ນການອຳນວຍຄວາມສະດວກ, ບໍລິການເກັບຄ່າທຳນຽມຢ່າງຈະແຈ້ງ ແລະ ໂປ່ງໃສ ແລະ ການບໍລິການດ້ານຕ່າງໆ, ສ້າງກົນໄກປະສານງານປ້ອງກັນຜົນກະທົບຕໍ່ສິ່ງແວດລ້ອມ, ສອງຝ່າຍເຫັນດີຟື້ນຟູກົນໄກການພົວພັນຮ່ວມມື, ການໄປມາຫາສູ່ພົບປະແລກປ່ຽນຊຶ່ງກັນ ແລະ ກັນ ລະຫວ່າງການນຳສອງຝ່າຍ, ສອງຝ່າຍເຫັນດີຟື້ນຟູເສັ້ນທາງການທ່ອງທ່ຽວຂ້າມແດນລາວ-ຈີນ ຂອບເຂດຫຼັກໝາຍ 7 ຊາຍແດນລາວ-ຈີນ ພ້ອມທັງຍົກລະດັບພື້ນຖານໂຄງລ່າງເພື່ອ ເປັນເງື່ອນໄຂທີ່ດີໃຫ້ແກ່ການທ່ອງທ່ຽວໄປສູ່ 5 ປະເທດ ໂດຍເລີ່ມຈາກດ່ານເມືອງຄຳ ແຫ່ງ ສປ ຈີນ, ສອງຝ່າຍເຫັນດີເພີ່ມທະວີການຮ່ວມມືການນຳເຂົ້າ-ສົ່ງອອກສິນຄ້າຜະລິດຕະພັນກະສິກຳ, ເຫັນດີຍົກລະດັບເສັ້ນທາງຫຼວງແຫ່ງຊາດ ເຊື່ອມຕໍ່ ສະຖານີລົດໄຟ ລາວ-ຈີນ ທີເມືອງນາໝໍ້ ແຂວງອຸດົມໄຊ ແລະ ເສັ້ນທາງເລກທີ 13 ເໜືອ ໂດຍຜ່ານເທດສະບານເມືອງຍອດອູ, ເມືອງບຸນເໜືອ ແລະ ເມືອງບຸນໃຕ້ ມີຄວາມຍາວທັງໝົດປະມານ 270 ກິໂລແມັດ, ຊຶ່ງເມືອງຈຽງເຊິນພ້ອມທີ່ຈະໃຫ້ການສະໜັບສະໜູນຊ່ວຍເຫຼືອຕາມເງື່ອນໄຂຕົວຈິງ, ເຫັນດີຮ່ວມມືສ້າງກົນໄກການນຳໃຊ້ແຮງງານ ແລະ ສອງຝ່າຍເຫັນດີຮ່ວມມືໄປມາຫາສູ່ກັນ, ພົບປະແລກປ່ຽນວຽກງານຊາວໝຸ່ມສອງຝ່າຍອີກດ້ວຍ.
ໃນກອງປະຊຸມດັ່ງກ່າວສອງຝ່າຍໄດ້ຮ່ວມກັນລົງນາມເຊັນບົດບັກທຶກການຮ່ວມມືໃນຕໍ່ໜ້າ ຊຶ່ງຕາງໜ້າອົງການປົກຄອງແຂວງຜົ້ງສາລີ ລົງນາມໂດຍທ່ານ ຄຳຜອຍ ວັນນະສານ ແລະ ຝ່າຍເມືອງຈຽງເຊີນ ນະຄອນພູເອີ ລົງນາມໂດຍທ່ານ ຫູ ຊິງ ຫົວ, ພ້ອມກັນນັ້ນ ເມືອງຍອດອູ ແຂວງຜົ້ງສາລີ ແລະ ເມືອງຈຽງເຊີນ ນະຄອນພູເອີ, ແຂວງຢຸນນານ ຍັງໄດ້ເຊັນບົດບັນທຶກ ຊ່ວຍຈຳ ເປັນເມືອງມິດຕະພາບ ຕື່ມອີກ ໂດຍຊ່ອງໜ້າຈາກຄະນະຜູ້ແທນທັງສອງຝ່າຍເຂົ້າຮ່ວມເປັນສັກຄິພິຍານ.
(ຂ່າວ-ພາບ: ແສງຄຳ ສາລີວັນ )