ສູນບໍລິການຊໍາລະສະສາງເງິນຢວນ ແມ່ນສະຖາບັນຕ່າງປະເທດທີ່ໃຫ້ບໍລິການຊໍາລະສະສາງ ເງິນຢວນໃຫ້ແກ່ທະນາຄານຢູ່ໃນຂົງເຂດ ຫຼື ປະເທດ ທີ່ສາມາດຊໍາລະສະສາງເງິນຢວນໄດ້. ໃນປັດຈຸບັນ, ໄດ້ສ້າງຕັ້ງສູນຊໍາລະສະສາງເງິນຢວນຕ່າງປະເທດ ລວມທັງໝົດ 31 ແຫ່ງ ໃນ 29 ປະເທດ ແລະ ຂົງເຂດ ທົ່ວໂລກ ຊຶ່ງໄດ້ກວມເອົາທະວີບອາເມຣິກາ, ເອີຣົບ, ອາຊີຕາເວັນອອກ, ອາຊີຕາເວັນອອກສ່ຽງໃຕ້, ໂອເຊອານີ ແລະ ອາຟຣິກາ. ທ້າຍປີ 2021, ທົ່ວໂລກມີສະຖາບັນການເງິນທີ່ຮ່ວມມືກັບສູນຊໍາລະສະສາງເງິນຢວນ ເຖິງ 950 ແຫ່ງ.
ໃນວັນທີ 20 ກັນຍາ 2022, ທະນາຄານປະຊາຊົນຈີນ ແລະ ທະນາຄານແຫ່ງ ສປປ ລາວ ໄດ້ລົງນາມໃນບົດບັນທຶກຄວາມເຂົ້າໃຈວ່າດ້ວຍການແຕ່ງຕັ້ງທະນາຄານຊໍາລະສະສາງ ເງິນຢວນຢູ່ ສປປ ລາວ. ພ້ອມດຽວກັນນັ້ນ, ໃນວັນທີ 30 ກັນຍາ 2022 ທະນາຄານປະຊາຊົນຈີນ ໄດ້ມອບໝາຍໃຫ້ທະນາຄານ ອຸດສາຫະກຳ ແລະ ການຄ້າຈີນ ຈໍາກັດ ສາຂານະຄອນຫຼວງວຽງຈັນ ເຮັດໜ້າທີ່ເປັນສູນຊໍາລະສະສາງເງິນຢວນໃນ ສປປ ລາວ. ມາຮອດປັດຈຸບັນ, ສປປ ລາວ ກາຍເປັນປະເທດທີ 5 ໃນອາຊຽນທີ່ໄດ້ຮັບອະນຸຍາດສ້າງຕັ້ງເປັນສູນຊໍາລະສະສາງ ເງິນຢວນຖັດຈາກ ສິງກະໂປ, ມາເລເຊຍ, ໄທ ແລະ ຟີລິບປິນ. ແລະ ໃນວັນທີ 30 ພະຈິກ 2022, ສະຫາຍ ທອງລຸນ ສີສຸລິດ ເລຂາທິການໃຫຍ່ ພັກປະຊາຊົນປະຕິວັດລາວ ປະທານປະເທດແຫ່ງ ສປປ ລາວ ໄດ້ເດີນທາງພົບປະຢ້ຽມຢາມການນຳຢູ່ ສປ ຈີນ ຊຶ່ງໃນລະຫວ່າງການເຄື່ອນໄຫວຢ້ຽມຢາມລັດຖະກິດ ປະມຸກລັດຂອງສອງປະເທດລາວ-ຈີນ ໄດ້ຮ່ວມເປັນສັກຂີພິຍານ ໃຫ້ກັບໝາກຜົນການຮ່ວມມືດ້ານການເງິນທີ່ສຳຄັນນີ້.
ການສ້າງຕັ້ງສູນຊໍາລະສະສາງເງິນຢວນນີ້ ແມ່ນໝາກຜົນສໍາເລັດອັນ ໜຶ່ງຂອງສາຍພົວພັນຮ່ວມມືລາວ-ຈີນ ທີ່ມີມູນເຊື້ອປະຫວັດສາດອັນຍາວນານ, ມີການຮ່ວມມືສົ່ງເສີມດ້ານເສດຖະກິດຊຶ່ງກັນ ແລະ ກັນ ລະຫວ່າງສອງຊາດຢ່າງ ແໜ້ນແຟ້ນ, ມີຂົງເຂດການຮ່ວມມືໃນຫຼາຍດ້ານ ຊຶ່ງເກີດດອກອອກຜົນຢ່າງຫຼວງຫຼາຍ ແລະ ມີແຜນພັດທະນາໃນອະນາຄົດທີ່ສົດໃສຢ່າງບໍ່ຢຸດຢັ້ງ. ໃນປີ 2020, ທະນາຄານກາງຂອງສອງປະເທດ ໄດ້ລົງນາມເຊັນສັນຍາວ່າດ້ວຍການຮ່ວມມືໃນການສົ່ງເສີມການນໍາໃຊ້ສະກຸນເງິນທ້ອງຖິ່ນລະຫວ່າງສອງປະເທດລາວ-ຈີນ ແລະ ສັນຍາແລກປ່ຽນກີບ-ຢວນ (SWAP) ຊຶ່ງອະນຸຍາດໃຫ້ສາມາດ ນໍາໃຊ້ເງິນທ້ອງຖິ່ນຂອງສອງປະເທດ ເຂົ້າໃນການຊໍາລະດຸນບັນຊີຊໍາລະປົກກະຕິ (Current Account) ແລະ ດຸນບັນຊີທຶນ (Capital Account) ໂດຍກົງ, ສົ່ງເສີມ ແລະ ຊຸກຍູ້ອໍານວຍຄວາມສະດວກດ້ານການຄ້າ ແລະ ການລົງທຶນລະຫວ່າງສອງປະເທດ. ມາຮອດທ້າຍປີ 2021, ມູນຄ່າການລົງທຶນລະຫວ່າງລາວ-ຈີນ ໄດ້ບັນລຸເຖິິງ 16,4 ຕື້ໂດລາ ແລະ ໃນໄລຍະປີ 2018-2022, ມູນຄ່າການຄ້າລະຫວ່າງສອງປະເທດ ບັນລຸໄດ້ຫຼາຍກວ່າ 15,9 ຕື້ໂດລາ, ອັດຕາການເຕີບໂຕສະເລ່ຍຕໍ່ປີແມ່ນ 15,9% ຊຶ່ງປັດຈຸບັນ ສປ ຈີນ ໄດ້ກາຍເປັນປະເທດ ອັນດັບ 1 ທີ່ ສປປ ລາວ ສົ່ງອອກຫຼາຍທີ່ສຸດ ແລະ ເປັນປະເທດອັນດັບ 1 ທີ່ເຂົ້າມາລົງທຶນຫຼາຍສຸດໃນ ສປປ ລາວ, ພ້ອມກັນນັ້ນ ຍັງເປັນຄູ່ຮ່ວມມືດ້ານການຄ້າ ລາຍໃຫຍ່ອັນດັບສອງຂອງ ສປປ ລາວ, ສາຍພົວພັນການຮ່ວມມືດ້ານການຄ້າລະຫວ່າງ ສອງປະເທດ ສະແດງໃຫ້ເຫັນເຖິງຄວາມເຂັ້ມແຂງ ແລະ ສັກກະຍະພາບທີ່ດີ.
ອີງໃສ່ຂໍ້ໄດ້ປຽບດ້ານເຄືອຂ່າຍຂອງກຸ່ມ ທະນາຄານ ອຸດສາຫະກຳ ແລະ ການຄ້າຈີນ ທີ່ມີເຄືອຂ່າຍບໍລິການການຊໍາລະສະສາງເງິນຢວນ ຢູ່ທົ່ວໂລກ, ພາຍຫຼັງການສ້າງຕັ້ງສູນຊໍາລະສະສາງເງິນຢວນໃນ ສປປ ລາວ ຈະຊ່ວຍຍົກສູງປະສິດທິພາບການຊຳລະເງິນຢວນຂອງ ສປປ ລາວ, ສາມາດສະໜອງການບໍລິການຊໍາລະເງິນຢວນ, ບໍລິການເງິນສົດ, ບໍລິການສະໜັບສະໜູນສະພາບຄ່ອງ, ບໍລິການແລກປ່ຽນກີບ-ຢວນ ແລະ ບໍລິການດ້ານການເງິນອື່ນໆໃຫ້ແກ່ບັນດາທະນາຄານໃນລາວໃຫ້ດີຍິ່ງຂຶ້ນ. ຄຽງຄູ່ກັນນັ້ນ, ຈະສົ່ງເສີມ ແລະ ອຳນວຍຄວາມສະດວກໃຫ້ແກ່ບັນດາຫົວໜ່ວຍທຸລະກິດຂອງແຕ່ລະຂົງເຂດໃນ ສປປ ລາວ ໃຫ້ສາມາດດໍາເນີນທຸລະກໍາເງິນຢວນ ໃນຮູບແບບຫຼາກຫຼາຍ ແລະ ສະດວກວ່ອງໄວ, ຍົກສູງຄວາມສາມາດດ້ານການບໍລິການ ແລະ ປະສິດທິພາບໃນການຊໍາລະສະສາງເງິນຢວນ ລະຫວ່າງປະເທດໃຫ້ດີຂຶ້ນ, ອຳນວຍຄວາມສະດວກໃຫ້ແກ່ການຊໍາລະເງິນຕາທ້ອງຖິ່ນຂອງ ການຄ້າສອງຝ່າຍ, ພ້ອມທັງ ຍັງຈະຊ່ວຍເພີ່ມທາງເລືອກທີ່ຫຼາກຫຼາຍຂອງຄັງສໍາຮອງເງິນຕາ ຕ່າງປະເທດຂອງ ສປປ ລາວ ອີກດ້ວຍ.
ພາຍຫຼັງທີ່ ທະນາຄານ ອຸດສາຫະກຳ ແລະ ການຄ້າຈີນ ຈໍາກັດ ສາຂາ ນະຄອນຫຼວງວຽງຈັນ ເຮັດໜ້າທີ່ເປັນສູນຊໍາລະສະສາງເງິນຢວນໃນ ສປປ ລາວ, ກໍໄດ້ສຳເລັດການກະກຽມວຽກງານຕ່າງໆໃນໄລຍະຕົ້ນ ແລະ ປັດຈຸບັນນີ້ ກໍພວມຕັ້ງໜ້າກະກຽມວຽກງານເປີດໃຫ້ບໍລິການ ຕາມການອະນຸຍາດຈາກທະນາຄານແຫ່ງ ສປປ ລາວ ແລະ ທະນາຄານປະຊາຊົນຈີນ. ຂັ້ນຕອນຂອງວຽກງານຕ່າງໆໄດ້ດໍາເນີນການຢ່າງເປັນລະບຽບຮຽບຮ້ອຍ ຊຶ່ງຈະສູ້ຊົນໃຫ້ໄດ້ເປີດບໍລິການຢ່າງເປັນທາງການ ພາຍໃນເດືອນມິຖຸນາຂອງປີ 2023 ນີ້. ຫຼັງຈາກທີ່ໄດ້ເປີດໃຫ້ບໍລິການຢ່າງເປັນທາງການແລ້ວ ສູນຊໍາລະສະສາງເງິນຢວນຈະປະຕິບັດຕາມລະບຽບກົດໝາຍ ແລະ ຂໍ້ກໍານົດກົດລະບຽບຕ່າງໆຂອງ ສປປ ລາວ, ການດໍາເນີນທຸລະກິດ ຈະປະຕິບັດຕາມຫຼັກການຂອງຕະຫຼາດ ແລະ ການຄ້າ, ຈະສົມທົບກັບບັນດາພາກສ່ວນຕ່າງໆໃນລາວ ເພື່ອຈັດຕັ້ງປະຕິບັດຕາມ ສັນຍາວ່າດ້ວຍການຮ່ວມມືໃນການສົ່ງເສີມການນໍາໃຊ້ສະກຸນເງິນທ້ອງຖິ່ນ ແລະ ສັນຍາແລກປ່ຽນກີບ-ຢວນ (SWAP)” ຂອງສອງປະເທດ, ຈະສົ່ງເສີມໃຫ້ນຳໃຊ້ເງິນຕາທ້ອງຖິ່ນ ກໍຄືເງິນກີບ ແລະ ເງິນຢວນຫຼາຍຂຶ້ນ ໃນການຊຳລະການຄ້າ-ການລົງທຶນລະຫວ່າງ ລາວ-ຈີນ, ຈະສ້າງສະພາບແວດລ້ອມທີ່ດີໃນການຊຸກຍູ້ການຊຳລະດ້ວຍເງິນຕາທ້ອງຖິ່ນ ແລະ ພັກດັນການເຄື່ຶອນໄຫວໃໝ່ໃນການຄ້າ-ການລົງທຶນລະຫວ່າງສອງປະເທດລາວ-ຈີນ ໃຫ້ນັບມື້ນັບເຕີບໃຫຍ່ເຂັ້ມແຂງ ເພື່ອສົ່ງເສີມ ແລະ ພັດທະນາເສດຖະກິດ-ສັງຄົມຂອງສອງປະເທດ.
(ຂ່າວ: ທະນາຄານ ອຸດສາຫະກຳ ແລະ ການຄ້າຈີນ ຈໍາກັດ)