ອີງຕາມໜັງສືແຈ້ງການສະບັບເລກທີ 014 / ລຮຄ ລົງວັນທີ 30 ມີນາ 2023 ຂອງ ບໍລິສັດ ລຽງເຮັງການຄ້າ ບໍລິການຈັດສັນຕະຫຼາດ ຈຳກັດ ເລື່ອງ ການປິດຕະຫຼາດຊົ່ວຄາວເພື່ອກໍ່ສ້າງ ແລະ ພັດທະນາຕະຫຼາດໜອງຈັນ(ຕະຫຼາດຂົວດິນ) ໃຫ້ກາຍເປັນຕະຫຼາດທີ່ທັນສະໄຫມຮອບດ້ານ.
ເນື້ອໃນສຳຄັນຂອງແຈ້ງການໄດ້ລະບຸໄວ້ວ່າ: ອີງຕາມການພັດທະນາເສດຖະກິດ-ສັງຄົມ ແລະ ແນວທາງທິດຊີ້ນໍາຂອງ ພັກ-ລັດ ໄດ້ວາງອອກ ປັດຈຸບັນ ຈະໄດ້ມີການພັດທະນາ ແລະ ປັບປຸງຕະຫຼາດໜອງຈັນ ຄືນໃໝ່ ໃຫ້ກາຍເປັນຕະຫຼາດແບບຢ່າງ ທີ່ທັນສະໄໝ, ສະດວກ, ສະອາດ, ປອດໄພ ແລະ ການບໍລິການທີ່ດີຍິ່ງຂຶ້ນ, ໃນດ້ານວັດທະນະທໍາ, ສົ່ງເສີມເອກະລັກຄວາມເປັນລາວຂຶ້ນມາໃຫ້ເປັນຕະຫຼາດແຫ່ງທໍາອິດຂອງ ສປປ ລາວ ແຕ່ຍັງຄົງ ຮັກສາຮູບແບບການຄ້າຂາຍຄືເກົ່າ ຍັງຄົງເປັນຕະຫຼາດສົດ, ຕະຫຼາດຂາຍສົ່ງ-ຂາຍຍ່ອຍ ໄວ້ຄືເກົ່າ.
ສະນັ້ນ, ບໍລິສັດ ລຽງເຮັງການຄ້າ ບໍລິການຈັດສັນຕະຫຼາດ ຈໍາກັດ ຂໍຖືເປັນກຽດແຈ້ງມາຍັງຊາວຄ້າຂາຍ, ພະນັກງານ, ທະຫານ, ຕໍາຫຼວດ, ພໍ່ແມ່ປະຊາຊົນ, ຜູ້ທີ່ມາຊົມໃຊ້ຕະຫຼາດໜອງຈັນ ລວມເຖິງທຸກພາກສ່ວນທີ່ ກ່ຽວຂ້ອງຊາບທົ່ວເຖິງກັນວ່າ: ເລີ່ມແຕ່ ວັນທີ 25 ເມສາ 2023 ເປັນຕົ້ນໄປຕະຫຼາດໜອງຈັນ ຈະໄດ້ປິດໃຫ້ບໍລິການຊົ່ວຄາວ ເພື່ອກໍ່ສ້າງປັບປຸງ ແລະ ພັດທະນາຕະຫຼາດໜອງຈັນ ໃຫ້ກາຍເປັນຕະຫຼາດທີ່ທັນສະໄໝຮອບດ້ານ.
