ຢາກເຊົານອນກົນ ເຮັດແບບນີ້

ປ່ຽນທ່ານອນ: ຈາກທີ່ເຄີຍນອນຫງາຍ ຊຶ່ງເປັນທ່າທີ່ສະດວກກັບການນອນກົນຫຼາຍທີ່ສຸດ ໃຫ້ມາເປັນທ່ານອນສະແຄງ ໂດຍອາດຈະນອນກອດໝອນຂ້າງໄປນຳກໍໄດ້ ຊຶ່ງຈະຊ່ວຍໃຫ້ທ່ານນອນສະແຄງໄດ້ດົນຂຶ້ນ. ພຽງເທົ່ານີ້ກໍເຮັດໃຫ້ກົນໜ້ອຍລົງ ຫຼື ເຊົາກົນໄປເລີຍ.
ນອນຫງາຍກໍໄດ້ ແຕ່ຕ້ອງມີເງື່ອນໄຂ: ຖ້າທ່ານນອນຫງາຍເປັນທ່າທີ່ທ່ານນອນຫຼັບສະບາຍທີ່ສຸດ ລອງນອນໂດຍບໍ່ຕ້ອງມີໝອນຮອງຫົວ ຫຼື ຈະນອນໝຸນໜອນແຕ່ໃຊ້ຜ້າຂົນໜູໝຸນໃຕ້ຄາງເພື່ອໃຫ້ປາກປິດຢູ່ຕະຫຼອດກໍໄດ້. ວິທີນີ້ ກໍຈະຊ່ວຍແກ້ການນອນກົນໄດ້ເຊັ່ນກັນ.
ຫຼຸດຄວາມອ້ວນ: ຖ້າທ່ານມີນຳ້ໜັກເກີນມາດຕະຖານ ແລ້ວພົບວ່າໂຕເອງນອນກົນ, ຄວາມອ້ວນອາດເປັນສາເຫດສຳຄັນທີ່ເຮັດໃຫ້ທ່ານນອນກົນກໍໄດ້ ເພາະເມື່ອຮ່າງກາຍມີຊີ້ນໜັງຮອບຄໍ ທີ່ແໜ້ນຈົນເກີນໄປ ອາດເຮັດໃຫ້ກົດຫຼອດລົມຫາຍໃຈຈົນຫາຍໃຈບໍ່ສະດວກ ແລ້ວກໍເຮັດໃຫ້ກົນສຽງດັງເກີດຂຶ້ນ. ສະນັ້ນ ຄວນຫຼຸດຄວາມອ້ວນລົງ ຈະດີກວ່າ.
ງົດດື່ມນຳ້ເມົາ: ນຳ້ເມົາທັງຫຼາຍ ມີລິດກົດປະສາດສ່ວນກາງ ແລະສາມາດສົ່ງຜົນໃຫ້ກ້າມຊີ້ນສ່ວນດ້ານຫຼັງລຳຄໍຕຶງຄຽດໄດ້ ຈົນເຮັດໃຫ້ເກີດການນອນກົນ ໂດຍສະເພາະຖ້າທ່ານດື່ມນຳ້ເມົາກ່ອນນອນ ປະມານ 4-5 ຊົ່ວໂມງ, ອາການນອນກົນຈະຍິ່ງເພີ່ມທະວີຄວາມຮຸນແຮງ.
ບໍ່ສູດຢາ: ຢາສູບເປັນສາເຫດສຳຄັນທີ່ເຮັດໃຫ້ລະບົບການຫາຍໃຈຂອງເຮົາຜິດປົກກະຕິໄປ ແລະມັນຍັງບໍ່ດີຕໍ່ສຸຂະພາບຂອງເຮົາອີກດ້ວຍ.
ຊັກເຄື່ອງນອນໃຫ້ສະອາດ: ຄວາມເປິເປື້ອນ ແລະເຊື້ອໂຣກທີ່ເກາະຢູ່ຕາມໝອນ, ຜ້າຫົ່ມ ແລະຜ້າປູບ່ອນນອນຂອງທ່ານ ລ້ວນແຕ່ເປັນສາເຫດໃຫ້ການຫາຍໃຈຕະຫຼອດການນອນຫຼັບຕິດຂັດໄດ້.
ເພີ່ມຄວາມຊຸ່ມຊື່ນໃຫ້ຫ້ອງ: ຖ້າຫ້ອງນອນທີ່ເປີດແອເຢັນເລື້ອຍໆ ຄວນນເອົາອ່າງນຳ້ມາວາງໄວ້ຂ້າງໆຕຽງເພື່ອເພີ່ມຄວາມຊຸ່ມຊື່ນຫ້ອງນອນໃຫ້ສົມດຸນ ເນື່ອງຈາກວ່າ ຖ້ານອນຫຼັບໃນຫ້ອງທີ່ມີຄວາມຊຸ່ມຊື່ນບໍ່ສົມດຸນ ອາກາດໃນຫ້ອງນອນອາດລົບກວນລະບົບຫາຍໃຈຈົນເຮັດໃຫ້ນອນກົນໄດ້ນັ້ນເອງ.
ນອນຫຼັບໃຫ້ພຽງພໍ: ການຫັກໂຫມກັບວຽກງານຫຼາຍເກີນໄປ ຫຼື ການນອນເດິກເປັນປະຈຳ ອາດເຮັດໃຫ້ກ້າມຊີ້ນສ່ວນຕ່າງໆ ໃນຮ່າງກາຍອິດເມື່ອຍໄດ້ ແລະເມື່ອກ້າມຊີ້ນສ່ວນດ້ານຫຼັງລຳຄໍບໍ່ຢູ່ໃນລັກສະນະທີ່ເຮັດໃຫ້ຫາຍໃຈໄດ້ສະດວກແລ້ວ ອາການນອນກົນກໍຈະເກີດຂຶ້ນ.
ອະນາໄມດັງໃຫ້ສະອາດ: ສາເຫດຫຼັກໆຂອງການນອນກົນ ຢູ່ທີ່ຄວາມຜິດປົກກະຕິຂອງລະບົບທາງເດີນຫາຍໃຈ. ດັ່ງນັ້ນຖ້າເຮັດແນວໃດກໍບໍ່ເຊົານອນກົນ ລອງໃຊ້ວິທີລ້າງດັງ ກໍຈະຊ່ວຍໄດ້ ເພາະພາຍໃນດັງຂອງເຮົາອາດມີຂີ້ມູກ ຫຼື ສິ່ງຕົກຄ້າງເຂົ້າໄປຕີບຕັນຈົນເຮັດໃຫ້ຫາຍໃຈບໍ່ຄ່ອຍສະດວກໃນເວລາທີ່ນອນຫຼັບກໍໄດ້.
ໃຊ້ຢາປິ່ນປົວໂຣກພາຍໃຕ້ການເບິ່ງແຍງຂອງແພດ: ຢາບາງປະເພດມີລິດກົດລະບົບປະສາດສ່ວນກາງ ແລະມີຜົນຕໍ່ສະໝອງບໍ່ຕ່າງຈາກແອວກໍຮໍ ເຊັ່ນ ຢາແກ້ຫວັດບາງຊະນິດ ຊຶ່ງອາດເປັນສາເຫດຂອງການນອນກົນໄດ້. ດັ່ງນັ້ນ ຖ້າທ່ານຈຳເປັນຕ້ອງໃຊ້ຢາຊະນິດໃດກໍຕາມ ຄວນປຶກສາແພດສາກ່ອນ ທຸກຄັ້ງທີ່ໃຊ້.