ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ປະທານກິຕິມະສັກ ອົງການກາແດງແຫ່ງຊາດລາວ ໄດ້ໂອ້ລົມຕໍ່ກອງປະຊຸມສະຫຼຸບວຽກງານກາແດງ ປີ 2022 ແລະ ທິດທາງແຜນການ ປີ 2023 ໃນວັນທີ 17 ມັງກອນນີ້ ທີ່ ນະຄອນຫຼວງວງຈັນ ໂດຍ ມີ ທ່ານ ພູທອນ ເມືອງປາກ ປະທານອົງການກາແດງແຫ່ງຊາດລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ທອງລຸນ ສີສຸລິດ ໄດ້ສະແດງຄວາມຊົມເຊີຍ ພະນັກງານ-ລັດຖະກອນ, ຜູ້ຊົງຄຸນວຸທິ, ນັກຮຽນຮູ້ປັນຍາຊົນ, ກຳມະກອນ, ນັກທຸລະກິດ, ມຸນນິທິ, ອາສາສະໝັກກາແດງ ແລະ ປະຊາຊົນບັນດາເຜົ່າ ທີ່ໄດ້ເປັນເຈົ້າການເຂົ້າຮ່ວມ ແລະ ປະກອບສ່ວນເຄື່ອນໄຫວວຽກງານມະນຸດສະທຳ ຢ່າງເປັນຂະບວນ ແລະ ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການນໍາພາ ຂອງຄະນະພັກ-ຄະນະນຳ ອົງການກາແດງແຫ່ງຊາດລາວ ທີ່ເຄື່ອນໄຫວຢ່າງເອົາຈິງເອົາຈັງ ແລະ ມີຜົນສໍາເລັດໃນຫຼາຍດ້ານໃນໄລຍະທີ່ຜ່ານມາ ແລະ ໄດ້ເນັ້ນໃຫ້ອົງການກາແດງແຫ່ງຊາດລາວເອົາໃຈໃສ່ 5 ບັນຫາສໍາຄັນດັ່ງນີ້:
- ຕາມກົດໝາຍ ວ່າດ້ວຍວຽກງານກາແດງລາວແລ້ວ, ອົງການກາແດງແຫ່ງຊາດລາວ ແມ່ນອົງການຈັດຕັ້ງທາງສັງຄົມຂອງ ສປປ ລາວ ທີ່ເຄື່ອນໄຫວວຽກງານມະນຸດສະທຳຢ່າງເປັນເອກະລາດ ຢູ່ພາຍໃຕ້ລັດຖະທຳມະນູນ, ກົດໝາຍ ແລະ 7 ຫຼັກການພື້ນຖານ ຂອງຂະບວນການກາແດງ ແລະ ຊີກວົງເດືອນແດງສາກົນ ຊຶ່ງມີປະທານປະເທດເປັນປະທານກິຕິມະສັກ, ເປັນອົງການຈັດຕັ້ງທີ່ມີກຽດສະຫງ່າ, ມີບົດບາດສຳຄັນໃນການເຮັດວຽກງານມະນຸດສະທຳ ຕາມແນວທາງນະໂຍບາຍຂອງພັກ, ແຜ່ເມດຕາສົງສານດ້ວຍຄວາມເຫັນອົກເຫັນໃຈຕໍ່ກັບເພື່ອນມະນຸດດ້ວຍກັນ, ເບິ່ງແຍງບັນເທົາທຸກ ທັງດ້ານວັດຖຸ ແລະ ຈິດໃຈ ເພື່ອປົກປ້ອງຊີວິດ, ສຸຂະພາບ ແລະ ເຄົາລົບສິດຂອງຄວາມເປັນມະນຸດ ລວມທັງການສົ່ງເສີມ ແລະ ພັດທະນາຄວາມຍືນຍົງຂອງມະນຸດ ໂດຍສະເພາະຜູ້ໄດ້ຮັບຜົນກະທົບທາງດ້ານຮ່າງກາຍ, ຊີວິດ, ຈິດໃຈ ແລະ ຊັບສິນ ຈາກໄພພິບັດທາງທຳມະຊາດ ແລະ ໄພອື່ນໆ ທີ່ມະນຸດສ້າງຂຶ້ນ. ສະນັ້ນ, ພະນັກງານ ແລະ ອາສາສະໝັກກາແດງຕ້ອງແມ່ນຜູ້ທີ່ມີຈິດໃຈເມດຕາທຳ, ມີຈິດໃຈມະນຸດສະທຳອັນສູງສົ່ງ, ມີຄຸນສົມບັດສິນທຳ, ມີຄວາມຮູ້ຄວາມສາມາດ, ມີຈັນຍາທຳ ແລະ ມີຄວາມຮັບຜີດຊອບສູງ, ມີຄວາມປອດໃສ ຂາວສະອາດ, ທັງມີຄວາມເສຍສະຫຼະ ເພື່ອເປັນການອຸທິດໃນການປະຕິບັດໜ້າທີ່ອັນມີກຽດນີ້.
- ເພື່ອພັດທະນາວຽກງານມະນຸດສະທໍາຂອງອົງການກາແດງແຫ່ງຊາດລາວ ໃຫ້ມີຄວາມເຂັ້ມແຂງຍືນຍົງ ຕ້ອງໄດ້ເພີ່ມທະວີການມີສ່ວນຮ່ວມຂອງສັງຄົມໃຫ້ກວ້າງຂວາງ, ຍົກບົດບາດຂອງອົງການກາແດງແຫ່ງຊາດລາວໃຫ້ສູງຂຶ້ນ, ໂຄສະນາເຜີຍແຜ່ກົດໝາຍ, ພາລະບົດບາດໜ້າທີ່ຂອງອົງການກາແດງແຫ່ງຊາດລາວ ໃຫ້ເປັນທີ່ຮັບຮູ້ເຂົ້າໃຈຢ່າງເລິກເຊິ່ງ ແລະ ກວ້າງຂວາງໃນທົ່ວສັງຄົມ, ໂດຍສະເພາະ ແມ່ນການສົ່ງເສີມສຸຂະພາບຂັ້ນພື້ນຖານຢູ່ຊຸມຊົນ, ການບໍລິຈາກເລືອດ ແລະ ການສະໜອງເລືອດທີ່ປອດໄພ, ວຽກງານຫຼຸດຜ່ອນຄວາມສ່ຽງ ແລະ ຕອບໂຕ້ໄພພິບັດ, ການຊ່ວຍກູ້ໄພສຸກເສີນ ແລະ ການຊ່ວຍເຫຼືອບັນເທົາທຸກເບື້ອງຕົ້ນ ຊຶ່ງແມ່ນວຽກງານມະນຸດສະທຳ ທີ່ສຳຄັນທີ່ສຸດ ແລະ ແມ່ນສິດທິພື້ນຖານຂອງມະນຸດທີ່ຈະຕ້ອງໄດ້ຮັບການເອົາໃຈໃສ່ເບິ່ງແຍງ.
- ກ່ຽວກັບງົບປະມານຮັບໃຊ້ການເຄື່ອນໄຫວວຽກງານກາແດງລາວ, ນອກຈາກແຫຼ່ງລາຍຮັບທີ່ໄດ້ຈາກງົບປະມານຂອງລັດ, ການຊ່ວຍເຫຼືອຈາກບຸກຄົນ, ນິຕິບຸກຄົນ, ການຈັດຕັ້ງພາຍໃນ, ອົງການຈັດຕັ້ງສາກົນ, ຄະນະນໍາກາແດງລາວແຕ່ລະຂັ້ນ ກໍ່ຕ້ອງມີຄວາມເປັນເຈົ້າການ, ມີຄວາມຄິດລິເລີ່ມ ແລະ ຫົວຄິດປະດິດສ້າງ ໃນການຄົ້ນຄວ້າສ້າງກິດຈະກຳເຄື່ອນໄຫວຕ່າງໆທີ່ຖືກຕ້ອງຕາມກົດໝາຍ ເພື່ອໃຫ້ມີແຫຼ່ງລາຍຮັບທີ່ເປັນປົກກະຕິ, ເພື່ອສາມາດກຸ້ມຕົນເອງໃນບາງດ້ານ ຊຶ່ງອາດຈະດຳເນີນດ້ວຍຕົນເອງ ຫຼື ຮູບແບບການຮ່ວມມືກັບພາກເອກະຊົນ, ເປັນຕົ້ນແມ່ນ ຂະແໜງການບໍລິການ ການຜະລິດ ທີ່ເປັນເອກະລັກຂອງກາແດງລາວ. ການສ້າງຕັ້ງກອງທຶນຊ່ວຍເຫຼືອສຸກເສີນ ກໍໃຫ້ດຳເນີນໄປຢ່າງຖືກຕ້ອງຕາມກົດໝາຍ ແລະ ມີການບໍລິຫານຄຸ້ມຄອງຢ່າງມີປະສິດທິຜົນ ເພື່ອສາມາດຊ່ວຍເຫຼືອຮີບດ່ວນທາງດ້ານວັດຖຸ ແລະ ຈິດໃຈ ຂັ້ນພື້ນຖານໃຫ້ແກ່ຜູ້ໄດ້ຮັບຜົນກະທົບຈາກໄພພິບັດ, ຜູ້ທຸກຍາກຂາດເຂີນ, ປ່ຽວພອຍດ້ອຍໂອກາດ, ກຳພ້າ, ກຳພອຍ, ຄົນພິການ ລວມທັງແມ່ຍິງ, ເດັກນ້ອຍ ແລະ ຜູ້ທີ່ຢູ່ຫ່າງໄກສອກຫຼີກ.
- ການປຸກລະດົມຂົນຂວາຍການບໍລິຈາກເລືອດແບບສະໝັກໃຈ ບໍ່ຫວັງສິ່ງຕອບແທນ ແມ່ນສິ່ງຈຳເປັນ, ເປັນວຽກທີ່ສຳຄັນ ແລະ ຂາດບໍ່ໄດ້ຢູ່ໃນສັງຄົມ, ການໃຫ້ເລືອດກໍຄືການໃຫ້ຊີວິດ ຕໍ່ລົມຫາຍໃຈໃຫ້ແກ່ຄົນເຈັບທີ່ຕ້ອງການເລືອດ, ຖ້າບໍ່ມີເລືອດພຽງພໍກໍບໍ່ສາມາດຊ່ວຍເຫຼືອກອບກູ້ຊີວິດຂອງຄົນເຈັບ. ສະນັ້ນ, ທຸກຂະແໜງການ, ທຸກການຈັດຕັ້ງ, ບຸກຄົນ, ນິຕິບຸກຄົນ, ທຸກຊັ້ນຄົນໃນທົ່ວສັງຄົມ ຈະຕ້ອງໄດ້ເປັນເຈົ້າການຮ່ວມກັນ ໂຄສະນາ ປຸກລະດົມຂົນຂວາຍໃຫ້ມີຜູ້ບໍລິຈາກເລືອດແບບສະໝັກໃຈ ບໍ່ຫວັງສິ່ງຕອບແທນໃຫ້ນັບມື້ນັບຫຼາຍຂຶ້ນ, ປູກຈິດສຳນຶກໃຫ້ເຍົາວະຊົນ, ຊາວໜຸ່ມ ໃຫ້ຮັບຮູ້ເຂົ້າໃຈ ແລະ ເຫັນໄດ້ເຖິງຄວາມສຳຄັນຂອງການບໍລິຈາກເລືອດແບບສະໝັກໃຈ ແລະ ຕ້ອງມີນະໂຍບາຍຕໍ່ຜູ້ມີຜົນງານໃນການປຸກລະດົມຂົນຂວາຍເກັ່ງ, ຕໍ່ຜູ້ມາບໍລິຈາກເລືອດຫຼາຍຄັ້ງ ບໍ່ຫວັງສິ່ງຕອບແທນ ດ້ວຍຮູບການຕ່າງໆຢ່າງເໝາະສົມ,ການສ້າງດຳລັດວ່າດ້ວຍກອງທຶນເລືອດ ກໍຕ້ອງເລັ່ງໃຫ້ສຳເລັດໂດຍໄວ ເພື່ອໃຫ້ລັດຖະບານພິຈາລະນາຮັບຮອງ ແລະ ປະກາດໃຊ້ ແນໃສ່ສ້າງແຫຼ່ງທຶນສຳຮອງໄວ້ ສະເພາະວຽກງານປຸກລະດົມຂົນຂວາຍການບໍລິຈາກເລືອດ ແລະ ສະໜອງເລືອດທີ່ປອດໄພໃຫ້ພຽງພໍ ເຊິ່ງຖືວ່າເປັນກອງທຶນໜຶ່ງທີ່ສໍາຄັນ ແລະ ເປັນການແບ່ງເບົາງົບປະມານຂອງລັດ.
- ຕໍ່ກັບການສ້າງສະມາຊິກ ແລະ ອາສາສະໝັກກາແດງລາວ, ໃນຄວາມເປັນຈິງ ລັດຖະບານ ກໍໄດ້ເອົາໃຈໃສ່ ປະກອບບຸກຄະລາກອນ ແລະ ງົບປະມານ ສະໜັບສະໜູນວຽກງານກາແດງລາວ, ແຕ່ໃນເງື່ອນໄຂທີ່ໂກຕາ ລັດຖະກອນ ແລະ ງົບປະມານ ຍັງຈຳກັດ, ສະນັ້ນ ອົງການກາແດງແຫ່ງຊາດລາວ ຕ້ອງໄດ້ສູ້ຊົນຂົນຂວາຍ ສະມາຊິກ, ອາສາສະໝັກກາແດງ ໃຫ້ຫຼາຍຂຶ້ນ ແລະ ເຊື້ອເຊີນເອົາຜູ້ຊົງຄຸນວຸດທິ ທີ່ສະໝັກໃຈເຮັດວຽກເພື່ອສັງຄົມ ໂດຍບໍ່ຮຽກຮ້ອງສິ່ງຕອບແທນ ມາຮ່ວມເຄື່ອນໄຫວວຽກງານດັ່ງກ່າວນີ້.
ຂ່າວ-ພາບ: ສຳນານ