ບັນດາຜູ້ຕາງໜ້າຂະແໜງສາທາລະນະສຸກ ຈາກບັນດາປະເທດອາຊຽນ ເຂົ້າຮ່ວມປຶກສາຫາລືແລກປ່ຽນບົດຮຽນ, ປະສົບການກ່ຽວກັບການໂຕ້ຕອບ-ການປ້ອງກັນພະຍາດໂຄວິດ-19, ບັນຫາຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍຕ່າງໆຂອງແຕ່ລະປະເທດ ເພື່ອແລກປ່ຽນໃນກອງປະຊຸມການຮ່ວມມືດ້ານວັກຊິນ ໃນຂົງເຂດອີນໂດ-ປາຊີຟິກ ຄັ້ງທີ 2 ໃນວັນທີ 7 ທັນວາ 2022 ທີ່ນະຄອນຫລວງໂຊ ສ ເກົາຫລີ ເຊິ່ງຝ່າຍ ສປປ ລາວ ເຂົ້າໂດຍ ທ່ານ ກອງໄຊ ພູນແພງຮັກ ຫົວໜ້າພະແນກຢາວັກຊິນປ້ອງກັນພະຍາດ ສູນສຸຂະພາບແມ່ ແລະ ເດັກ ກະຊວງສາທາລະນະສຸກ.
ການດຳເນີນກອງປະຊຸມຄັ້ງນີ້, ເພື່ອກະກຽມຄວາມພ້ອມໃນການຜະລິດວັກຊິນ ເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫລາດ ແລະ ແຈກຢາຍໃຫ້ກັບບັນດາປະເທດອາຊຽນຢ່າງພຽງພໍ, ສ້າງແຜນ, ລະບົບ ແລະ ກົນໄກການຮ່ວມມືປະສານງານ ເພື່ອຮັບມືກັບການລະບາດຂອງພະຍາດໃນອະນາຄົດ.
ທ່ານ ໂຊ ຮຸນດົງ (CHO Hyundong) ຮອງລັດຖະມົນຕີກະຊວງການຕ່າງປະເທດ ສ ເກົາຫລີ ໄດ້ກ່າວວ່າ: ອາຊຽນ ແລະ ສ ເກົາຫລີ ພ້ອມກັບບັນດາຄູ່ຮ່ວມມືໃນອິນໂດປາຊີຟິກ, ໄດ້ຮັບຜົນສໍາເລັດທີ່ໜ້າປະທັບໃຈ ໃນການຮ່ວມມືດ້ານສາທາລະນະສຸກ ແລະ ວັກຊິນ ໂດຍໄດ້ໂຕ້ຕອບຕໍ່ສິ່ງທ້າທາຍຂອງ ໂຄວິດ-19 ເຊິ່ງແມ່ນປະສົບການທີ່ມີຄຸນຄ່າ ຂອງຄວາມສາມັກຄີ ແລະ ການຮ່ວມມືຢ່າງກົມກຽວ. ສ ເກົາຫລີ ແມ່ນຜູ້ສະໜັບສະໜູນຫລັກຕໍ່ກັບຄວາມພະຍາຍາມຂອງພາກພື້ນ ແລະ ໃນທົ່ວໂລກ, ໄດ້ໃຫ້ຄຳໝັ້ນສັນຍາ ແລະ ອະນຸມັດງົບປະມານ 300 ລ້ານໂດລາສະຫະລັດ ເພື່ອສົ່ງເສີມຂໍ້ລິເລີ່ມ ACT-A ໃນປີນີ້ ແລະ ອີກ 210 ລ້ານໂດລາ ອະນຸມັດໃຫ້ແກ່ COVAX AMC. ພວກເຮົາຍັງເປັນໜຶ່ງໃນຜູ້ປະກອບສ່ວນຕົ້ນໆ ໃຫ້ແກ່ກອງທຶນຕອບໂຕ້ ໂຄວິດ-19 ຂອງອາຊຽນ, ສະໜອງເງິນ 6 ລ້ານໂດລາສະຫະລັດ ໃຫ້ແກ່ຄວາມອາດສາມາດຊອກຄົ້ນຫາຂອງອາຊຽນ.
ສ ເກົາຫລີ ໄດ້ຮັບຮູ້ຄວາມສໍາຄັນຂອງກອງທຶນແບບຍືນຍົງ ເພື່ອເພີ່ມທະວີການກຽມພ້ອມຮັບມືກັບພະຍາດລະບາດໃນອະນາຄົດ ແລະ ໄດ້ອະນຸມັດເງິນ 30 ລ້ານໂດລາສະຫະລັດ ໃຫ້ແກ່ກອງທຶນຕົວກາງທາງດ້ານການເງິນ.
ຂ່າວ-ພາບ: ພູລາວັນ