ວັນທີ 30 ກັນຍາ 2022 ຢູ່ ນະຄອນ ປາກເຊ ໄດ້ຈັດພິທີເປີດງານວາງສະແດງ ແລະ ຈໍາໜ່າຍສິນຄ້າກະສິກໍາປຸງແຕ່ງ 9 ແຂວງຕົວແບບ ຄື: ແຂວງ ອຸດົມໄຊ, ໄຊຍະບູລີ, ຫຼວງພະບາງ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ ແລະ ແຂວງ ຈໍາປາສັກ ເຊິ່ງເປັນເຈົ້າພາບງານ ຈັດຂຶ້ນຢູ່ສູນການຄ້າ ແຟຣັນຊິບມໍ ນະຄອນ ປາກເຊ, ແຂວງ ຈໍາປາສັກ ໂດຍການເຂົ້າຮ່ວມຂອງທ່ານ ປອ ວິໄລວົງ ບຸດດາຄຳ ເຈົ້າແຂວງຈໍາປາສັກ ທ່ານນາງ ຈັນສຸກ ແສງພະຈັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ມີບັນດາການນໍາແຂວງ ຫົວໜ້າພະແນກ ຮອງຫົວໜ້າພະແນກອຸດສາຫະກໍາ ແລະ ການຄ້າ 9 ແຂວງ ບັນດາການນໍາພະແນກການອ້ອມຂ້າງແຂວງ ເຈົ້ານະຄອນ ເຈົ້າເມືອງ ນັກທຸລະກິດ ຜູ້ປະກອບການດ້ານກະສິກໍາປຸງແຕ່ງໃນ 9 ແຂວງ ເຂົ້າຮ່ວມ.
ໃນພິທີ ທ່ານ ປອ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງ ຈໍາປາສັກ ໄດ້ຕາງໜ້າໃຫ້ຄະນະກໍາມະການຈັດງານ ລາຍງານວ່າ: ການຈັດງານຄັ້ງນີ້ ໂດຍປະຕິບັດຕາມໜັງສືສະເໜີຂອງກົມສົ່ງເສີມການຄ້າ ກະຊວງອຸດສາຫະກໍາ ແລະ ການຄ້າ ໄດ້ຮັບການສະໜັບສະໜູນດ້ານງົບປະມານ ຈາກໂຄງການປະເມີນການພັດທະນາສິນຄ້າຫົວໜ່ວຍທຸລະກິດຂະໜາດນ້ອຍ ແລະ ກາງ ເພື່ອສົ່ງອອກ ແລະ ເຂົ້າເຖິງຕະຫຼາດ ສປ ຈີນ ສົກປີ 2022 ບົນພື້ນຖານສັນຍາຮ່ວມມືໂຄງການກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ລະຫວ່າງ ສປປ ລາວ ແລະ ສປ ຈີນ ງານຄັ້ງນີ້ ມີຫ້ອງວາງສະແດງສິນຄ້າເຂົ້າຮ່ວມທັງໝົດ 40 ຫ້ອງ ມີ 46 ຫົວໜ່ວຍ ທີ່ເປັນທ່າແຮງຂອງແຂວງ ແລະ ສິນຄ້າຈາກ 9 ແຂວງທີ່ເຂົ້າຮ່ວມໂຄງການ.
ທ່ານ ໄຊສົມບັດ ນໍລະສິງ ຫົວໜ້າກົມສົ່ງເສີມການຄ້າ ໄດ້ລາຍງານກ່ຽວກັບໂຄງການວ່າ: ຈຸດປະສົງ ແລະ ເປົ້າໝາຍ ກໍເພື່ອແນ່ໃສ່ການໂຄສະນາຜະລິດຕະພັນສິນຄ້າກະສິກໍາປຸງແຕ່ງ ເພື່ອສົ່ງອອກ ແລະ ເຂົ້າເຖິງຕະຫຼາດພາຍໃນ ແລະ ຕ່າງປະເທດຂອງຜະລິດຕະພັນ ລາວ ເປັນຫຼັກ ທັງເປັນການສົ່ງເສີມສິນຄ້າລາວເຂົ້າສູ່ຕະຫຼາດພາຍໃນ ແລະ ສາກົນ ເພື່ອກະຕຸ້ນການຕະຫຼາດຢູ່ພາຍໃນປະເທດໃຫ້ມີການຂະຫຍາຍຕົວເພີ່ມຂຶ້ນ ເຮັດໃຫ້ຜູ້ຜະລິດ ແລະ ຜູ້ປະກອບການເຂົ້າໃຈກ່ຽວກັບສະພາບການປ່ຽນແປງຕະຫຼາດທັງພາຍໃນ ແລະ ຕ່າງປະເທດ ເພື່ອສາມາດປັບໂຕໃຫ້ເຂົ້າກັບສະພາບການປົກກະຕິແບບໃໝ່ໃນປັດຈຸບັນ (New normal) ເຮັດໃຫ້ຫົວໜ່ວຍທຸລະກິດໄດ້ແລກປ່ຽນບົດຮຽນເຊີ່ງກັນ ແລະ ກັນ ທັງດ້ານການປຸງແຕ່ງ ຕະຫຼອດຮອດການຈັບຄູ່ທຸລະກິດ (Business Matching) ລະຫວ່າງຜູ້ປຸງແຕ່ງ ແລະ ຜູ້ປະກອບການທຸລະກິດກະສິກໍາ ຫັດຖະກໍາ ໃຫ້ມີມູນຄ່າທີ່ສູງຂື້ນ.
