ຕາມຂ່າວຈາກ ໂຕກຽວ,ວັນທີ 23 ກັນຍານີ້, ຍີ່ປຸ່ນ ຈະຍົກເລີກມາດຕະການຄວບຄຸມເຂດຊາຍແດນແຕ່ວັນທີ 11ຕຸລານີ້ເປັນຕົ້ນໄປ ແລະ ກັບຄືນສູ່ການເປີດແບບບໍ່ເສຍຄ່າ ວີຊ່າ ໃຫ້ແກ່ 68 ປະເທດ ແລະ ເຂດແຄ້ວນຈາກທົ່ວໂລກລວມທັງ ປະເທດ ໄທ ເພື່ອຟື້ນຟູອຸດສາຫະກຳ ທ່ອງທ່ຽວທີ່ໄດ້ຮັບຜົນກະທົບຢ່າງໜັກໜ່ວງຈາກການລະບາດຂອງພະຍາດ ໂຄວິດ-19.
ພາຍຫລັງ ທ່ານ ຟູມິໂອະ ຄີຊິດະ,ນາຍົກ ລັດຖະມົນຕີ ຍີ່ປຸ່ນ ຖະແຫລງວ່າ: ຍີ່ປຸ່ນ ຈະເປີດ ປະເທດ ຕ້ອນຮັບ ນັກເດີນທາງ ຈາກທົ່ວໂລກ ແລະ ຈະກັບໄປຍົກເວັ້ນ ວີຊ່າ ໃຫ້ແກ່ ນັກເດີນທາງ ຈາກປະເທດ ທີ່ໄດ້ຮັບສະຖານະ ດັ່ງກ່າວ ລວມທັງຍົກເລີກໂຄງການ ໃຊ້ມາດຕະການ ຈໍາກັດ ຈໍານວນ ຜູ້ເດີນທາງ ເຂົ້າປະເທດ ລາຍວັນ ເຊັ່ນກັນ. ນອກນີ້ ຍີ່ປຸ່ນ ຈະອອກ ນະໂຍບາຍ ທີ່ເປັນສ່ວນຫລຸດ ການທ່ອງທ່ຽວ ໃນປະເທດ ອີກດ້ວຍ.ສຳລັບ ຍີ່ປຸ່ນ ອະນຸຍາດ ໃຫ້ນັກເດີນທາງ ຈາກ 68ປະເທດ ແລະ ເຂດແຄ້ວນ ທົ່ວໂລກ ເຊັ່ນ ສ.ອາເມຣິກາ, ສິງກະໂປ,ໄທ ແລະ ປະເທດອື່ນໆ ເດີນທາງ ເຂົ້າປະເທດໄດ້ ສູງສຸດ 90 ວັນ ໂດຍບໍ່ຕ້ອງຂໍ ແລະ ເສຍຄ່າ ວີຊ່າ. ຍີ່ປຸ່ນມີນັກທ່ອງທ່ຽວເດີນທາງ ເຂົ້າປະເທດ ເກືອບ 32ລ້ານເທື່ອຄົນໃນປີ 2019, ກ່ອນທີ່ຫລຸດລົງເຫລືອພຽງເປັນ 246,000 ຄົນ ໃນປີ 2021 ຍ້ອນ ໂຄວິດ-19 ແຜ່ລະບາດ ຮຸນແຮງ.
ຮຽບຮຽງຂ່າວໂດຍ: ສະໄຫວ ລາດປາກດີ