ແຫລ່ງຂ່າວຈາກ ແຂວງ ຫລວງພະບາງ ໃຫ້ຮູ້ວ່າ: ວັນທີ 6 ກັນຍາ ນີ້, ບໍລິສັດ ຜະລິດ-ໄຟຟ້າລາວ ມະຫາຊົນ ໄດ້ມອບເງິນຊົດເຊີຍຜົນກະທົບດ້ານຜົນລະປູກຈາກການກໍ່ສ້າງເຂື່ອນໄຟຟ້າ ນໍ້າຄານ 3 ໃຫ້ປະຊາຊົນ 341 ຄອບຄົວ ຢູ່ເມືອງຊຽງເງິນ ໂດຍມີ ທ່ານ ນາງ ສີລິພອນ ສຸພັນທອງ ຮອງເຈົ້າແຂວງຫລວງພະບາງ, ທ່ານ ສົມແວວເພັດ ດວງປະສິດ ເຈົ້າເມືອງ ຊຽງເງິນ, ມີພາກສ່ວນກ່ຽວຂ້ອງ ແລະ ຄອບຄົວທີ່ຖືກຜົນກະທົບເຂົ້າຮ່ວມ.
ໃນໄລຍະຜ່ານມາ, ການກໍ່ສ້າງເຂື່ອນໄຟຟ້າ ນ້ຳຄານ 3 ໄດ້ສົ່ງຜົນກະທົບໃຫ້ປະຊາ ຊົນຖືກຍົກຍ້າຍ ແລະ ໄດ້ຮັບການຈັດສັນທີ່ຢູ່ໃໝ່ ປະກອບມີ 10 ບ້ານ ໃນເຂດເມືອງຊຽງເງິນ ຄື: ບ້ານຫ້ວຍສະທັນ, ຄອນຫວາຍ, ປາກບາກ, ປາກໂປງ, ບ້ານກອກ, ສະເພີນ, ບ້ານຖິ່ນ, ປາກຊ້າ, ແກ້ງກີບ ແລະ ບ້ານແກ້ງກຸ້ງ ໂດຍໃຊ້ງົບປະມານຊົດເຊີຍຜົນກະທົບດ້ານຜົນລະປູກ ໃຫ້ກັບຜູ້ທີ່ຖືກຜົນກະທົບ ງວດທີ 1 ໃນໄລຍະຜ່ານມາ (ແຕ່ປີ 2011-2013 ແລະ ບ້ານນໍ້າມິ່ງ ປີ 2017) ທັງໝົດ 20,1 ຕື້ກ່ວາກີບ, ພ້ອມດຽວກັນນີ້ຍັງໄດ້ຍົກຍ້າຍ 655 ຫລັງຄາເຮືອນ, 655 ຄອບຄົວ, ປະຊາກອນ 3,489 ຄົນ ຍິງ 1,725 ຄົນ ໄປຢູ່ບ່ອນຈັດສັນໃໝ່. ແຕ່ທາງໂຄງການ ແລະ ຄະນະກຳມະການຂອງເມືອງ ຍັງໄດ້ສືບຕໍ່ລົງສຳຫລວດ ແລະ ເກັບກໍາຂໍ້ມູນຜົນກະທົບຄືນໃຫ້ປະຊາຊົນຈາກ ຄັ້ງທີ 1 ຫລື ຜົນກະທົບງວດທີ 1 ຕາມລະດັບທີ່ນໍ້າໜ້າເຂື່ອນຈະຖ້ວມຮອດ ໃນລະດັບ 350 ແມັດ ທຽບ ໃສ່ລະດັບໜ້ານ້ຳທະເລ (ລະດັບນໍ້າສູງຂອງໜ້າອ່າງ), ເມື່ອເວລາເຂື່ອນກັກເກັບນ້ຳເຕັມອ່າງຕາມລະດັບທີ່ກໍານົດໄວ້ 348-350 ແມັດ. ຫລັງຈາກນັ້ນ ກໍມີປະຊາຊົນເຂົ້າແຈ້ງວ່ານໍ້າໄດ້ຖ້ວມສວນໄມ້ອຸດສາຫະກຳ (ສວນໄມ້ປູກ) ກາຍຂອບເຂດທີ່ໄດ້ເກັບກຳຂໍ້ມູນ ແລະ ໄດ້ຊົດເຊີຍໃນໄລຍະຜ່ານມາ ກໍຄື ງວດທີ 1.
ເມື່ອເປັນແນວນັ້ນ, ຄະນະກໍາມະການຂອງເມືອງ, ນາຍບ້ານ ແລະ ພະນັກງານໂຄງການ ຈຶ່ງໄດ້ລົງສໍາຫລວດ ແລະ ກວດກາຕົວຈິງ ຈຶ່ງສະຫລຸບໄດ້ວ່າມີ 341 ຄອບຄົວທີ່ຖືກຜົນກະທົບນໍ້າຖ້ວມສວນ ແລະ ສາມາດສະຫລຸບເປັນມູນຄວາມເສຍຫາຍ ທີ່ນໍ້າໄດ້ຖ້ວມຜົນລະປູກ ແລະ ຈະຕ້ອງໄດ້ຊົດເຊີຍ ໃຫ້ປະຊາຊົນທັງໝົດ 5.8 ຕື້ກວ່າກີບ.
ຂ່າວ-ພາບ: ໄຊຍະສອນ
