ປະມານສອງປີກວ່າທີ່ພະຍາດ ໂຄວິດ-19 ລະບາດໜັກຢູ່ໃນໂລກ ເຮັດໃຫ້ສະພາບເສດຖະກິດ-ສັງຄົມ ຢູ່ຫຼາຍປະເທດ ລວມທັງປະເທດ ລາວ ເຮົາພົບກັບຄວາມຫຍຸ້ງຍາກຢ່າງໜັກໜ່ວງ. ເມືອງ ງອຍ, ແຂວງ ຫຼວງພະບາງ ກໍເເມ່ນເມືອງໜຶ່ງທີ່ໄດ້ຮັບຜົນກະທົບ ຈາກເປັນເມືອງຜະລິດພືດກະສິກໍາສົ່ງອອກໄປແຂວງ ແລະ ເມືອງໃກ້ຄຽງ, ເປັນເມືອງ ທ່ອງທ່ຽວ ທີ່ມີນັກທ່ອງທ່ຽວໄປທ່ຽວບໍ່ເວັ້ນແຕ່ລະວັນ ກໍປະເຊີນກັບສະພາບເສດຖະກິດ-ສັງຄົມ ຕົກຕໍ່າບໍ່ຕ່າງຫຍັງກັບເມືອງອື່ນໆເຊັນດຽວກັນ.
ພາຍຫຼັງລັດຖະບານ ມີນະໂຍບາຍເປີດປະເທດ ການນໍາຂອງເມືອງໄດ້ພ້ອມກັນຄົ້ນຄວ້າປຶກສາຫາລື ຟື້ນຟູສະພາບເສດຖະກິດ-ສັງຄົມ ຂອງເມືອງ ດ້ວຍການສືບຕໍ່ຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກເມືອງຄັ້ງທີ XI ກໍານົດວຽກຈຸດສຸມຢ່າງລະອຽດ ເລັ່ງໃສ່ທ່າແຮງດ້ານເສດຖະກິດຕົ້ນຕໍເປັນສໍາຄັນ ຊຸກຍູ້ສົ່ງເສີມ ສ້າງເງື່ອນໄຂໃຫ້ປະຊາຊົນພາຍໃນເມືອງທໍາການຜະລິດຕາມລະດູການ, ຫົວໜ່ວຍທຸລະກິດທີ່ມີເງື່ອນໄຂດໍາເນີນກິດຈະການຂອງຕົນເປັນປົກກະຕິ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ການຟື້ນຟູເສດຖະກິດຂອງ ເມືອງ ງອຍ ແມ່ນເລັ່ງໃສ່ທ່າແຮງດ້ານເສດຖະກິດຕົ້ນຕໍຂອງເມືອງເຊັ່ນ: ການຜະລິດກະສິກຳ, ການປູກ, ການລ້ຽງ ຊຶ່ງມາຮອດປັດຈຸບັນ ທົ່ວເມືອງມີເນື້ອທີ່ນາທັງໝົດ 1,009.94 ເຮັກຕາ, ເນື້ອທີ່ນາທີ່ສາມາດເຮັດນາແຊງມີ 193.9 ເຮັກຕາ, ແຕ່ເນື້ອທີ່ເຮັດນາແຊງຕົວຈິງມີພຽງ 55 ເຮັກຕາ, ຜົນຜະລິດໄດ້ 243.36 ໂຕນ, ສະມັດຖະພາບ 4,5 ໂຕນ/ເຮັກຕາ, ມີຊົນລະປະທານຖາວອນ 6 ແຫ່ງ, ຝາຍປະຖົມປະຖານ 113 ແຫ່ງ, ນອກຈາກນີ້ຍັັງໄດ້ຊຸກຍູ້ການປູກພືດອຸດສາຫະກຳປະເພດຕ່າງໆເປັນສິນຄ້າເຊັນ: ປູກສາລີຫວານ, ສາລີແຂງ, ໝາກເດືອຍ, ໝາກງາ, ໝາກນໍ້າມັນເຄືອ, ໝາກນ້ຳມັນຕົ້ນ, ປູກຂ່າ, ປູກພືດລະດູແລ້ງ ແລະ ລ້ຽງສັດປະເພດງົວ 9.850 ໂຕ, ຄວາຍ 4,890 ໂຕ, ໝູ 11,411 ໂຕ, ແບ້ 13,475 ໂຕ ແລະ ສັດປິກ 399,500 ໂຕ. ດ້ານຄົມມະນາຄົມປັດຈຸບັນທົ່ວເມືອງມີເສັ້ນທາງລົດເຂົ້າເຖິງ 66 ບ້ານ, ກວມ 89% ໃນນີ້ ເສັ້ນທາງທຽວໄດ້ຕະຫຼອດປີ 35 ບ້ານ, ກວມ 47%, ທຽວໄດ້ລະດູດຽວ 31 ບ້ານ, ກວມ 41%, ບ້ານມີໄຟຟ້າຊົມໃຊ້ແລ້ວ 51 ບ້ານ, ກວມ 68%, ບ້ານທີ່ຊົມໃຊ້ນ້ຳປະປາ 4 ບ້ານ, ບ້ານທີ່ມີສັນຍານໂທລະສັບ 63 ບ້ານ. ໄປພ້ອມກັນນີ້, ເມືອງຍັງໄດ້ເອົາໃຈໃສ່ຊຸກຍູ້ສົ່ງເສີມການຜະລິດ ແລະ ການລົງທຶນ ເຮັດໃຫ້ເສດຖະກິດຂະຫຍາຍຕົວໃນລະດັບ 4.4%, ລວມຍອດຜະລິດຕະພັນບັນລຸ 212.26 ຕື້ກີບ, ໃນນີ້ຜະລິດຕະພັນ ກະສິກໍາ-ປ່າໄມ້ ບັນລຸ 127.36 ຕື້ກີບ ກວມ 60%, ຜະລິດຕະພັນ ອຸດສາຫະກໍາ-ຫັດຖະກຳ ບັນລຸ 14,86 ຕື້ກີບ ກວມ 7%, ຜະລິດຕະພັນ ບໍລິການ ບັນລຸ 70,04 ຕື້ກີບ ກວມ 33%. ລວມຍອດຜະລິດຕະພັນພາຍໃນເມືອງ (GDP) ສະເລ່ຍລາຍຮັບໃສ່ຫົວຄົນໄດ້ 6,763,000 ກີບ/ຄົນ/ປີ ເທົ່າກັບ 650 ໂດລາ (ອັດຕາແລກປ່ຽນ 1 ໂດລາ ເທົ່າກັບ 10.41, ກີບ).
ສໍາລັບວຽກງານວັດທະນາທໍາສັງຄົມ.ເມືອງໄດ້ປະຕິບັດຕາມແຈ້ງການຂອງກະຊວງສຶກສາທິການ-ກິລາວາງອອກໃນແຕ່ລະໄລຍະ. ໃນໄລຍະມີການລະບາດຂອງພະຍາດໂຄວິດ-19 ໄດ້ອອກແຈ້ງການໃຫ້ແຕ່ລະໂຮງຮຽນສິດສອນທາງອອນລາຍ. ໃນໄລຍະພະຍາດເບົາບາງລົງກໍໄດ້ເປີດການຮຽນ – ການສອນແບບປົກກະຕິ ທຸກຊັ້ນຮຽນໄດ້ສອບເສັງເລື່ອນຊັ້ນ ແລະ ຈົບຊັ້ນສໍາເລັດແລ້ວ.
ມາຮອດປັດຈຸບັນນີ້, ທົ່ວເມືອງມີໂຮງຮຽນ 126 ແຫ່ງ ໃນນີ້: ໂຮງຮຽນລ້ຽງເດັກ 1 ແຫ່ງ, ໂຮງຮຽນອະນຸບານ 9 ແຫ່ງ; ຫ້ອງກຽມປະຖົມ 35 ແຫ່ງ, ໂຮງຮຽນປະຖົມ 73 ແຫ່ງ, ໂຮງຮຽນມັດທະຍົມຕອນຕົ້ນ ແລະ ປາຍ 8 ແຫ່ງ, ມີຄູ 143 ຄົນ ຍິງ 59 ຄົນ, ໃນນີ້ຄູອາສາສະໝັກ 31 ຄົນ ຍິງ 10 ຄົນ, ມີນັກຮຽນ 1,965 ຄົນ ຍິງ 943 ຄົນ. ອັດຕາເຂົ້າຮຽນຂອງເດັກ 3-5 ປີ ກວມ 43%; ອັດຕາເຂົ້າຮຽນຂອງເດັກ 5 ປີ ກວມ 74.53%; ອັດຕາເຂົ້າຮຽນໃໝ່ສຸດທິ ປ.1 ກວມ 98.12%, ອັດຕາເຂົ້າຮຽນສຸດທິຊັ້ນປະຖົມກວມ 97.74%, ອັດຕາປະລະການຮຽນ ປ.1 ກວມ 4.71%, ອັດຕາຄ້າງຫ້ອງຊັ້ນປະຖົມສຶກສາກວມ 0.62%.
ທົ່ວເມືອງມີໂຮງໝໍຊຸມຊົນ 1 ແຫ່ງ, ໂຮງໝໍນ້ອຍ 8 ແຫ່ງ ແລະ 1 ຈຸດບໍລິການສຸຂະພາບຂັ້ນຕົ້ນ, ມີຮ້ານຂາຍຢາຂັ້ນ 3 ຈໍານວນ 10 ຮ້ານ, ຜົນການຈັດຕັ້ງປະຕິບັດຄາດໝາຍ 11 ຕົວຊີ້ວັດ: ອັດຕາການຕາຍຂອງເດັກຕໍ່າກວ່າ 1 ປີ ປະຕິບັດໄດ້ 1,6/1.000; ອັດຕາການຕາຍຂອງເດັກຕໍ່າກ່ວາ 5 ປີ ປະຕິບັດໄດ້ 1,6/1.000; ອັດຕາການຕາຍຂອງແມ່ ປະຕິບັດໄດ້ 0/100,000; ອັດຕາການເກີດລູກມີແພດຊ່ວຍ ປະຕິບັດໄດ້ 40%, ອັດຕາການສັກຢາກັນພະຍາດຂອງເດັກຕໍ່າກ່ວາ 1 ປີ ປະຕິບັດໄດ້ 46,3%, ອັດຕາການຊົມໃຊ້ນໍ້າປະຕິບັດໄດ້ 97,33%, ອັດຕາການນໍາໃຊ້ວິດຖ່າຍ ປະຕິບັດໄດ້ 69%; ອັດຕາປົກຄຸມປະກັນສຸຂະພາບ ປະຕິບັດໄດ້ 100%; ອັດຕາການຮັບຮອງບ້ານແບບຢ່າງສາທາລະນະສຸກ ປະຕິບັດໄດ້ 66,6% ແລະ ອັດຕາປົກຄຸມ ການສັກຢາວັກຊິນປ້ອງກັນໂຄວິດ-19 (ໃນກຸ່ມເປົ້າໝາຍ) ເຂັມທີ 1 ກວມ 75%, ສັກເຂັມ 2 ຂຶ້ນໄປ ກວມ 67.8%.
ຕໍ່ກັບການຈັດຕັ້ງຜັນຂະຫຍາຍວາລະແຫ່ງຊາດຂອງລັດຖະບານ ເມືອງງອຍໄດ້ຊີ້ນຳໆພາແຕ່ຂັ້ນເມືອງ ລົງຮອດຮາກຖານບ້ານຢ່າງຕັ້ງໜ້າ, ຜ່ານການຈັດຕັ້ງປະຕິບັດ ສາມາດແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນພາຍໃນເມືອງໄດ້ດີສົມຄວນ, ຕິດພັນກັບວຽກງານໂຄສະນາເຜີຍແຜ່ກົດໝາຍ, ການສ້າງຄອບຄົວ, ບ້ານປ້ອງກັນຊາດເຂັ້ມແຂງ, ຄອບຄົວ, ບ້ານປ້ອງກັນຄວາມສະຫງົບດີ, ຄອບຄົວ, ບ້ານປອດຢາເສບຕິດ, ຝຶກອົບຮົມວຽກງານປ້ອງກັນຊາດ ໃຫ້ແກ່ປ້ອງກັນ-ກອງຫຼອນບ້ານ, ລົງເຄື່ອນໄຫວກວດກາຈຸດສໍາຄັນຕ່າງໆ, ຂອບເຂດຊາຍແດນ ສາມາດກວດກາ, ທຳລາຍສວນຝິ່ນ 3 ຈຸດ, ມີ 15 ຕອນ, ເນື້ອທີ່ 1,5 ເຮັກຕາ, ເກັບ ແລະ ທຳລາຍສິ່ງເກືອດຫ້າມເປັນຕົ້ນ: ອາວຸດລ່າເນື້ອ 1.480 ກະບອກ, ຈັກຕັດໄມ້ 42 ເຄື່ອງ, ໝໍ້ຊອດປາ 15 ເຄື່ອງ, ໝໍ້ໄຟ 5 ໜ່ວຍ, ມ້າງຄະດີຢາເສບຕິດ 7 ລາຍ, ມີຜູ້ຖືກຫາ 11 ຄົນ; ຢຶດຂອງກາງຢາບ້າໄດ້ 3.675 ເມັດ, ເຮັດໃຫ້ເມືອງງອຍ ມີຄວາມສະຫງົບຢ່າງໜັກແໜ້ນ.
ທ່ານ ບຸນເມືອງ ໄຊຍະສິດ ເຈົ້າເມືອງງອຍ ກ່າວວ່າ: ໃນຕໍ່ໜ້ານີ້, ເພື່ອເລັ່ງຟື້ນຟູເສດຖະກິດ-ວັດທະນະທໍາສັງຄົມ ໃຫ້ເຂົ້າສູ່ສະພາບປົກກະຕິ ຈະໄດ້ສຸມໃສ່ການຈັດຕັ້ງປະຕິບັດບັນດາແຜນການ- ໂຄງການຕ່າງໆ ທີ່ໄດ້ກຳນົດໃນແຜນພັດທະນາເສດຖະກິດ-ສັງຄົມຂອງເມືອງ; ສືບຕໍ່ຊຸກຍູ້ການປູກ-ການລ້ຽງ ຂອງປະຊາຊົນບັນດາເຜົ່າໃຫ້ຫຼາຍຂຶ້ນ, ປັບປຸງການຜະລິດອາໄສແຕ່ທຳມະຊາດໃຫ້ໄປນຳໃຊ້ເຕັກນິກວິທະຍາສາດເຂົ້າຊ່ວຍ, ຄຸ້ມຄອງສິນຄ້າ ແລະ ການຊອກຕະຫຼາດຄ້ຳປະກັນ ຜົນຜະລິດຂອງປະຊາຊົນທີ່ນັບມື້ນັບຫຼາຍຂຶ້ນ, ປັບປຸງລະບົບການຮຽນ-ການສອນໃຫ້ມີຄຸນນະພາບສູງຂຶ້ນ, ຟື້ນຟູ ແລະ ດຶງດູດການລົງທຶນໃສ່ວຽກງານທ່ອງທ່ຽວໃຫ້ຢູ່ໃນສະພາບປົກກະຕິເພື່ອສ້າງແຫຼ່ງລາຍຮັບ, ຄຸ້ມຄອງຄ່າຄອງຊີບໃຫ້ຢູ່ໃນເກນປົກກະຕິເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ, ຈໍາກັດປະກົດການຫຍໍ້ທໍ້ເປັນ ຕົ້ນ: ບັນຫາຢາເສບຕິດ, ຂີ້ລັກງັດແງະ ເກີດຂຶ້ນໃນສັງຄົມໃຫ້ຫຼຸດລົງ.
ເມືອງງອຍ ຕັ້ງຢູ່ຫ່າງຈາກເທດສະບານແຂວງຫຼວງພະບາງ ໄປທາງທິດເໜືອຕາມເສັ້ນທາງເລກທີ 13 ເໜືອ ເຂົ້າສູ່ເສັ້ນທາງເລກທີ 1C ປະມານ 142 ກິໂລແມັດ, ມີເນື້ອທີ່ທັງໝົດ 199,091.16 ເຮັກຕາ, ພື້ນທີ່ສ່ວນຫຼາຍແມ່ນຜາຫີນ, ເປັນພູສູງຊັນ ກວມ 91% ຂອງເນື້ອທີ່ທັງໝົດ.
ທົ່ວເມືອງມີ 15 ກຸ່ມບ້ານ, ມີ 74 ບ້ານ, ມີ 5,818 ຄອບຄົວ, ມີພົນລະເມືອງ 31,068 ຄົນ ຍິງ 15,311 ຄົນ, ໃນນີ້: ເຜົ່າລາວ ກວມ 22%, ເຜົ່າກຶມມຸ 65% ແລະ ເຜົ່າມົ້ງ ກວມ 13%, ປະຊາກອນປະກອບອາຊີີບດ້ານກະສິກໍາກວມ 80%, ໂຄງປະກອບພື້ນຖານເສດຖະກິດ ແມ່ນກະສິກຳ, ບໍລິການ, ອຸດສາຫະກຳ ແລະ ຫັດຖະກຳ.
ຂໍ້ມູນ: ປະຊາຊົນ
