ເພື່ອໂຕ້ຕອບຕໍ່ການແຜ່ລະບາດຂອງພະຍາດ ໂຄວິດ-19, ອົງການສະຫະປະຊາຊາດ ກອງທຶນ ສໍາລັບປະຊາກອນ (UNFPA), UN-HABITAT ແລະ ອົງການສາກົນ ເພື່ອການອົບພະຍົບ (IOM) ໄດ້ຈັດຕັ້ງປະຕິບັດໂຄງການປົກປ້ອງ ແລະ ໃຫ້ບໍລິການສຳລັບຜູ້ຕັ້ງພູມລຳເນົາໃໝ່, ຜູ້ອົບພະຍົບ ແລະ ໄວໜຸ່ມ ຢູ່ແຂວງສະຫວັນນະເຂດ ແລະ ຈຳປາສັກ ເພື່ອຕອບໂຕ້ພະຍາດ ໂຄວິດ-19 ໃນ ສປປ ລາວ ໃນປີ 2021.
ທ່ານ ວຽງສະໄໝ ໄກສະຫວັດດີ ຫົວໜ້າສູນຈໍາກັດບໍລິເວນຫລັກ 21 ແຂວງຈໍາປາສັກ ໃຫ້ຮູ້ວ່າ:ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານໄດ້ໃຫ້ການສະໜັບສະໜູນຜູ້ອົບພະຍົບ(ແຮງງານລາວທີ່ກັບມາແຕ່ຕ່າງປະເທດ) ຫລາຍກວ່າ 7,000 ຄົນ, ຍິງ 3,721 ຄົນ ແລະ ສະມາຊິກຊຸມຊົນ 15,000 ຄົນໃນ ແຂວງຈໍາປາສັກ ແລະ ສະຫວັນນະເຂດ ໂດຍການສະໜອງຂໍ້ມູນການເຄື່ອນຍ້າຍທີ່ປອດໄພ, ການພັດທະນາທັກສະ ແລະ ການສະໜັບສະໜູນການຈ້າງງານ. ນອກຈາກນີ້, ບັນດາແຮງງານດັ່ງກ່າວ ຍັງໄດ້ຮັບຂໍ້ມູນທີ່ກ່ຽວຂ້ອງກັບການເຄື່ອນຍ້າຍຢ່າງປອດໄພ ທີ່ໄດ້ສະໜອງໃຫ້ຜ່ານໂທລະໂຄ່ງພາຍໃນສູນຈໍາກັດບໍລິເວນ ເພື່ອໃຫ້ເຂົາເຈົ້າໄດ້ເຂົ້າໃຈກ່ຽວກັບການເຮັດວຽກ ຢູ່ຕ່າງປະເທດຫລາຍຂຶ້ນ ທັງຫລີກ ລ່ຽງຄວາມສ່ຽງຈາກການຄ້າມະນຸດ ແລະ ການຂູດຮີດແຮງງານ.
ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ(IOM) ເປັນອົງການ ສະຫະປະຊາຊາດເຮັດວຽກໃນຂົງເຂດ ການເຄື່ອນຍ້າຍຖິ່ນຖານ ແລະ ເຮັດວຽກຢ່າງໃກ້ຊິດຮ່ວມກັບພາກສ່ວນກ່ຽວຂ້ອງທີ່ສຳຄັນຄື: ຄົນອົບພະຍົບ ແລະ ບັນດາປະເທດພາຄີ ເພື່ອຊຸກຍູ້ການເຄື່ອນຍ້າຍທີ່ມີມະນຸດສະທຳ, ປອດໄພ, ເປັນລະບຽບຮຽບຮ້ອຍ. IOM ສະຫນອງການບໍລິການ ແລະ ຄໍາແນະນໍາໃຫ້ລັດຖະບານ ແລະ ຜູ້ອົບພະ ຍົບຈາກທັດສະນະແບບລວມສູນ, ລວມທັງການເຊື່ອມຕໍ່ກັບການພັດທະນາ ເພື່ອເພີ່ມຜົນປະໂຫຍດ ແລະໂອກາດຂອງການເຄື່ອນຍ້າຍແຮງງານ.
ຂໍ້ມູນຈາກ: ຂປລ.