ໃນລະຫວ່າງ ວັນທີ 24-26 ກໍລະກົດ ນີ້, ສະມາຄົມນັກຂ່າວແຫ່ງ ສປປ ລາວ ແລະ ສະມາຄົມນັກຂ່າວນັກໜັງສືພິມແຫ່ງ ປະເທດໄທ ໄດ້ຮ່ວມກັນຈັດຊຸດຝຶກອົບຮົມ ພາຍໃຕ້ຫົວຂໍ້: ການນຳພາເຮັດຕົວຈິງ ເພື່ອພັດທະນາທັກສະການສ້າງລາຍຮັບຈາກສື່ອອນລາຍ ຂຶ້ນທີ່ເມືອງວັງວຽງ ແຂວງວຽງຈັນ. ໂດຍການເປັນປະທານຮ່ວມຂອງ ທ່ານ ສະຫວັນຄອນ ຣາຊມຸນຕີ ປະທານສະມາຄົມນັກຂ່າວແຫ່ງ ສປປ ລາວ ແລະ ທ່ານ ຊາວະຣົງ ລິມປັດທຳມະປານີ ທີ່ປຶກສາສະມາຄົມນັກຂ່າວນັກໜັງສືພິມ ແລະ ສະມາຄົມຜູ້ຜະລິດຂ່າວອອນລາຍແຫ່ງປະເທດໄທ ພ້ອມດ້ວຍແຂກຖືກເຊີນ ແລະ ນັກສຳມະນາກອນຈາກສຳນັກຂ່າວຕ່າງໆຂອງ ສປປ ລາວ ເຂົ້າຮ່ວມ.
ໃນພິທີ, ທ່ານ ສະຫວັນຄອນ ຣາຊມຸນຕີ ໄດ້ກ່າວຕໍ່ຊຸດຝຶກອົບຮົມຄັ້ງນີ້ວ່າ: ການຝຶກອົບຮົມໃນຄັ້ງນີ້ເປັນນິມິດໝາຍອັນດີທີ່ສອດຄອງກັບການປ່ຽນແປງໃໝ່ດ້ານສື່ມວນຊົນ ໂດຍຈະສ້າງເງື່ອນໄຂສະດວກຊ່ວຍໃຫ້ນັກຝຶກອົບຮົມໄດ້ພ້ອມກັນຮຽນຮູ້ ແລະ ຮັບເອົາຂໍ້ມູນໃໝ່ໆຈາກສື່ໃນຍຸກດີຈີຕອນ. ພ້ອມກັນນັ້ນ, ກໍຍັງໄດ້ຮັບຮູ້ຮູບແບບປ່ຽນທັດສະນີຍະພາບ, ຄວາມສຳຄັນ ແລະ ຄວາມແຕກຕ່າງລະຫວ່າງຮູບແບບຂອງສື່ຕ່າງໆ; ຮູບແບບການຫາລາຍໄດ້ ແລະ ການວິເຄາະຂໍ້ມູນ; ການຜະລິດເນື້ອໃນຂ່າວໃສ່ສີໃນຍຸກດີຈີຕອນ, ການຊອກຫາລູກຄ້າຢູ່ໃນບັນດາສື່ດີຈີຕອນ ແລະ ການເຮັດທຸລະກິດແບບຊອກຫາສະຖິຕິລູກຄ້າ. ນອກຈາກນັ້ນ, ບັນດານັກສຳມະນາກອນ ຍັງໄດ້ຝຶກຕົວຈິງໃນການສ້າງແຜນວາດທຸລະກິດຕົວແບບທີ່ເນັ້ນໃສ່ປັດໄຈຍຸດທະສາດຫຼັກທັງໝົດ, ໂດຍໃນນີ້ລວມທັງສະຖິຕິລູກຄ້າ, ລະບົບການເຮັດວຽກ, ລາຍຮັບ-ລາຍຈ່າຍ, ກິດຈະກຳຕ່າງໆຂອງບໍລິສັດ ແລະ ກໍມີການນຳສະເໜີແຜນທຸລະກິດ ແລະ ແຜນການຫາລາຍໄດ້ ຊຶ່ງບົດຮຽນຕ່າງໆທີ່ກ່າວມານີ້ ຈະກາຍເປັນພື້ນຖານໃນການຊອກຫາ ຫຼື ສ້າງລາຍຮັບເຂົ້າສູ່ສຳນັກຂ່າວຂອງຕົນ.
ຂ່າວ-ພາບ: ວິໄລສັກ