ກອງປະຊຸມຄະນະຮັບຜິດຊອບລະດັບຊາດ ຄັ້ງທີ V ຈັດງານມະຫະກຳກິລາແຫ່ງຊາດ ຄັ້ງທີ XI ເຫັນດີເປັນເອກະພາບ ກໍານົດງານມະຫະກໍາກິລາແຫ່ງຊາດ ຄັ້ງທີ XI ທີ່ແຂວງ ຊຽງຂວາງ ເປັນເຈົ້າພາບ ໃຫ້ເປີດພິທີຢ່າງເປັນທາງການ ໃນວັນທີ 13 ທັນວາ 2022 ແລະ ປິດວັນທີ 22 ທັນວາ 2022. ພ້ອມດຽວກັນກໍເຫັນດີຕັດປະເພດກິລາເຮືອຊ່ວງ, ກິລາບີລຽດ-ສະນຸກເກີ ແລະ ກິລາໂບລິ້ງ ອອກ, ຂະນະທີ່ລາຍການສະແດງໃນພິທີເປີດ-ປິດ ແມ່ນໃຫ້ປັບປຸງຕາມທິດກະທັດຮັດ ເໝາະສົມກັບສະພາບຄວາມເປັນຈິງ.
ກອງປະຊຸມດັ່ງກ່າວ, ໄດ້ຈັດຂຶ້ນໃນວັນທີ 18 ກໍລະກົດ ຜ່ານມາ ໂດຍການເປັນປະທານຂອງ ທ່ານ ບຸນຈັນ ສີວົງພັນ ເຈົ້າແຂວງແຂວງຊຽງຂວາງ, ປະທານຈັດງານມະຫະກໍາກິລາແຫ່ງຊາດ ຄັ້ງທີ XI ແລະ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານຮ່ວມຈັດງານມະຫະກຳກິລາແຫ່ງຊາດ ຄັ້ງທີ XI, ມີຄະນະຮັບຜິດຊອບລະດັບຊາດ ຂັ້ນສູນກາງ ແລະ ທ້ອງຖິ່ນ, ຄະນະຮັບຜິດຊອບລະດັບຊາດ ຊຸດເກົ່າ, ຫົວໜ້າຫ້ອງວ່າການປົກຄອງແຂວງ, ຫົວໜ້າກໍາມະການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ແລະ ຮັບຟັງລາຍງານຂອງບັນດາກໍາມະການຝ່າຍຕ່າງໆ ເຊັ່ນ: ວຽກງານກອງເລຂາ, ກໍາມະການຝ່າຍເຕັກນິກ-ຈັດການແຂ່ງຂັນ, ກໍາມະການເປີດ-ປິດ, ກໍາມະການເສດຖະກິິດ-ລະດົມທຶນ, ກໍາມະການສະຖານທີ່ພັກ-ອາຫານ, ກໍາມະການການແພດ-ສຸຂະພາບ ແລະ ລາຍງານການກະກຽມການຈັດງານແຂ່ງຂັນກິລາຄົນພິການທົ່ວປະເທດ ຄັ້ງທີ III ທີ່ແຂວງຊຽງຂວາງ ເປັນເຈົ້າພາບ, ລາຍງານການຈັດຕັ້ງປະຕິບັດການກະກຽມຄວາມພ້ອມໃນການຈັດງານມະຫະກໍາກິລາແຫ່ງຊາດ ຄັ້ງທີ XI ໃນໄລຍະຜ່ານມາ, ວຽກຈຸດສຸມທີ່ຈະຕ້ອງຮີບດ່ວນ ແລະ ບາງຫົວຂໍ້ ເພື່ອນໍາສະເໜີຂໍຄວາມເປັນເອກະພາບຕົກລົງຈາກກອງປະຊຸມ.
ການແຂ່ງຂັນ ແມ່ນໄດ້ແບ່ງເປັນແຕ່ລະໄລຍະ ເລີ່ມແຕ່ວັນທີ 8-15 ພະຈິກ 2022, ວັນທີ 17-21 ພະຈິກ 2022, ວັນທີ 23–28 ພະຈິກ 2022, ວັນທີ 30 ພະຈິກ ຫາ 10 ທັນວາ 2022 ແລະ ວັນທີ 9-22 ທັນວາ 2022; ງານມະຫະກໍາກິລາແຫ່ງຊາດ ຄັ້ງທີ XI ໃນເມື່ອກ່ອນ ໄດ້ກໍານົດການຈັດການແຂ່ງຂັນກິລາ ຈໍານວນ 28 ປະເພດ ແລະ ໄດ້ຕັດອອກ 3 ປະເພດ ຄື: ກິລາເຮືອຊ່ວງ, ກິລາບີລຽດ-ສະນຸກເກີ, ກິລາໂບລິ້ງ ແລະ ໄດ້ກໍານົດການແຂ່ງຂັນ 25 ປະເພດກິລາ ໃນງານມະຫະກໍາກິລາແຫ່ງຊາດ ຄັ້ງທີ XI.
ຂໍ້ມູນ: ລູກນ້ຳເຊ ອິນທະດາລິນ
