ການນອນຫຼັບຍາກ ເປັນອາການທີ່ພົບຫຼາຍທີ່ສຸດອາການໜຶ່ງ ໃນບັນດາອາການບໍ່ສະບາຍຕ່າງໆ ເຊັ່ນ ເຈັບຫົວ, ໂຕຮ້ອນ, ເຈັບທ້ອງ, ທ້ອງບິດ, ຖ່າຍທ້ອງ, ຮາກ, ວິນຫົວ, ນໍ້າມູກໄຫຼ, ໄອ… ຕໍ່ໄປນີ້ ຄືຂໍ້ແນະນໍາສໍາຫຼັບຜູ້ທີ່ນອນຫຼັບຍາກ.
- ເຂົ້ານອນໃຫ້ເປັນເວລາ ຄື ບໍ່ເດິກເກີນໄປ, ນອນຫຼັບໃຫ້ພຽງພໍ (ຄືນລະ 6-8 ຊົ່ວໂມ) ແລະ ຕື່ນນອນໃຫ້ເປັນເວລາເຊັ່ນກັນ, ເພີ່ມໄລຍະເວລາການນອນໃຫ້ຫຼາຍຂຶ້ນໄດ້ ຖ້າຮູ້ສຶກວ່າ ຍັງນອນບໍ່ພຽງພໍ.
- ຕາມປົກກະຕິ ເມື່ອເຖິງເວລາທີ່ຮ່າງກາຍຕ້ອງການນອນຫຼັບພັກຜ່ອນ ເຮົາຈະຮູ້ສຶກງ່ວງນອນ ແລະ ຢາກນອນ, ຄົນທີ່ມີບັນຫານອນຫຼັບຍາກ ເມື່ອຮູ້ສຶກງ່ວງນອນ ຄວນຢຸດກິດຈະກຳທີ່ກຳລັງເຮັດຢູ່ ແລະເຂົ້ານອນທັນທີ.
- ບໍ່ຄວນໃຊ້ຕຽງນອນສຳລັບເຮັດກິດຈະກຳອື່ນ ເຊັ່ນ: ເຮັດວຽກ, ອ່ານປຶ້ມ, ຄິດເລື່ອງວຽກ ເປັນຕົ້ນ.
- ຖ້ານອນບໍ່ຫຼັບບໍ່ຄວນຝືນນອນ: ຄວນລຸກຂຶ້ນຈາກຕຽງຊອກເຮັດບາງຢ່າງເລັກໆນ້ອຍໆ ທີ່ເຮັດໃຫ້ຮູ້ສຶກຜ່ອນຄາຍ ເຊັ່ນ ຟັງເພງ, ກິນອາຫານເບົາໆ, ດື່ມນົມ…
- ຫຼີກເວັ້ນການເຊືອບ (ນອນ) ໄລຍະສັ້ນໆ ໃນເວລາກາງເວັນ ຫຼື ຕອນຄ້າຍແລງ: ນອກຈາກວ່າ ໄດ້ປະຕິບັດມາດົນແລ້ວ ແລະເກີດປະໂຫຍດສຳລັບຕົນເອງໂດຍບໍ່ເຮັດໃຫ້ນອນບໍ່ຫຼັບໃນຕອນກາງຄືນ.
- ຕ້ອງມີຄວາມເຂົ້າໃຈວ່າ ການນອນເປັນກິດຈະກຳປະຈຳວັນຢ່າງໜຶ່ງ ທີ່ມີຄວາມສຳພັນກັບເວລາກາງເວັນ-ກາງຄືນ ແລະສຳພັນກັບເວລາຢ່າງອື່ນ. ດັ່ງນັ້ນ ຄວນຈັດຕາຕະລາງການນອນ-ຕື່ນ ໃຫ້ສຳພັນກັບເວລາໃນການປະຕິບັດພາລະກິດຢ່າງອື່ນນຳ ເຊັ່ນ ພະຍາຍາມນອນກາງຄືນເຮັດວຽກກາງເວັນ ແລະ ນອນໃຫ້ເປັນເວລາ.
- ຕ້ອງມີຄວາມເຂົ້າໃຈວ່າ ເມື່ອອາຍຸຫຼາຍຂຶ້ນ ປະສິດທິພາບໃນການນອນຈະຫຼຸດລົງ: ການທີ່ປະສິດທິພາບການນອນບໍ່ຄືເກົ່າ ເປັນສິ່ງທີ່ຫຼີກເວັ້ນບໍ່ໄດ້.
- ຄວນເຮັດວຽກໃນຕອນກາງເວັນໃຫ້ດີທີ່ສຸດ ແລະ ສຳເລັດໄປໃຫ້ຫຼາຍທີ່ສຸດ ແລະມີຄວາມເພິ່ງພໍໃຈໃນວຽກທີ່ເຮັດ: ການນຳບັນຫາຕ່າງໆມາຄິດຢູ່ເຮືອນ ຖືເປັນສາເຫດທີ່ເຮັດໃຫ້ນອນບໍ່ຫຼັບ ຫຼື ຕື່ນຂຶ້ນມາກາງເດິກ.
- ຄວນອອກກຳລັງກາຍໃນເວລາກາງເວັນ ຫຼືຕອນແລງ ເພາະນອກຈາກຈະເຮັດໃຫ້ຮູ້ສຶກສົດຊື່ນຂຶ້ນ ແລະ ສຸຂະພາບດີແລ້ວ ຍັງເຮັດໃຫ້ຮ່າງກາຍມີຄວາມຕ້ອງການນອນຫຼາຍຂຶ້ນໃນຕອນກາງຄືນ.
- ການມີເພດສຳພັນກ່ອນນອນ ອາດຊ່ວຍໃຫ້ນອນຫຼັບງ່າຍຂຶ້ນ: ແຕ່ຢ່າງໃດກໍຕາມ ການມີເພດສຳພັນໃນຂະນະທີ່ຮູ້ສຶກອ່ອນເພຍ ຫຼື ຫຼາຍເກີນໄປ ຫຼື ເດິກເກີນໄປ ອາດເຮັດໃຫ້ນອນບໍ່ຫຼັບໄດ້.
- ຫຼີກເວັ້ນການດື່ມນໍ້າຊາ, ກາເຟ ກ່ອນນອນ: ໃນຄົນສູງອາຍຸ ລະບົບປະສາດສ່ວນກາງຍັງໄວຕໍ່ກາເຟອິນຫຼາຍກວ່າຄົນໜຸ່ມສາວ.
- ຫຼີກເວັ້ນລ່ຽງການດື່ມເຫຼົ້າ ເພາະນອກຈາກທຳລາຍສຸຂະພາບແລ້ວ ເມື່ອລິດເຫຼົ້າໃກ້ຈະໝົດ ຖ້າຍັງບໍ່ນອນ ຈະເຮັດໃຫ້ນອນຫຼັບຍາກ.
- ຫຼີກເວັ້ນການກິນອາຫານຫຼາຍໆ ກ່ອນນອນ ເພາະເຮັດໃຫ້ການຫຼັບບໍ່ມີຄຸນນະພາບ.
- ຄວນຈັດຫ້ອງນອນໃຫ້ສະອາດ, ມີສຽງລົບກວນໜ້ອຍ, ແສງບໍ່ສະຫວ່າງເກີນໄປ, ອຸນຫະພູມເຢັນພໍສົມຄວນ ແລະ ຕຽງທີ່ນອນສະບາຍ.
- ການສົນທະນາກັບສະມາຊິກໃນຄອບຄົວ ໃນບັນຍາກາດທີ່ຜ່ອນຄາຍກ່ອນນອນ ເຮັດໃຫ້ຮູ້ສຶກອົບອຸ່ນ ແລະ ເປັນສຸກໃຈ.
- ຄວາມຢ້ານ ແລະຄວາມກັງວົນວ່າ ຈະນອນບໍ່ຫຼັບ ຈະເປັນວົງຈອນ ແລະ ສາເຫດທີ່ເຮັດໃຫ້ນອນບໍ່ຫຼັບ.
- ຫຼີກເວັ້ນການເສບຢາເສບຕິດທັງຫຼາຍ ລວມທັງຢາສູບນຳ, ຫຼີກເວັ້ນການໃຊ້ຢານອນຫຼັບເປັນປະຈໍາ ຫຼື ຕິດຕໍ່ກັນເປັນເວລາດົນ.
- ຄວນປິດໂທລະສັບມືຖື ແລະສຽງອື່ນໆທີ່ລົບກວນ ຢູ່ໃນຫ້ອງ ເພາະເມື່ອຖືກປຸກກາງເດິກ ທ່ານອາດກັບໄປນອນບໍ່ຫຼັບອີກ.
- ບໍ່ເບິ່ງຮູບເງົາ ຫຼື ຟັງເລື່ອງເລົ່າທີ່ຕື່ນເຕັ້ນ ຫຼື ເປັນຕາຢ້ານກ່ອນນອນ ແລະ ຫຼີກເວັ້ນການຟັງເພງທີ່ສະໜຸກສະໜານກ່ອນນອນ ເພາະສິ່ງເຫຼົ່ານີ້ເຮັດໃຫ້ນອນຫຼັບຍາກ.
- ຖ້າມີອາການນອນບໍ່ຫຼັບຊຳເຮື້ອ ຫຼື ຕ້ອງການຄວາມຊ່ວຍເຫຼືອໃນບັນຫານອນບໍ່ຫຼັບ ຄວນໄປປຶກສາຈິດຕະແພດ.