ສຳນັກຂ່າວ ຊິນຮວາ, ວັນທີ8 ກໍລະກົດນີ້, ສື່ມວນຊົນ ທ້ອງຖິ່ນ ຍີ່ປຸ່ນ ລາຍງານວ່າ, ອະດີດນາຍົກລັດຖະມົນຕີ Shinzo Abe ຂອງ ຍີ່ປຸ່ນ ໄດ້ຖືກຢືນຢັນວ່າ ເສຍຊີວິດແລ້ວຫລັງຈາກໄດ້ຖືກລອບສັງຫານໃນລະຫວ່າງ ການກ່າວປາໄສ ຢູ່ນະຄອນ Nara ພາກຕາເວັນຕົກຂອງ ຍີ່ປຸ່ນ ຊຶ່ງເປັນສ່ວນໜຶ່ງຂອງການໂຄສະນາ ເພື່ອດໍາເນີນການ ເລືອກຕັ້ງ ສະພາສູງ ຈະຈັດຂຶ້ນ ໃນວັນທີ10 ກໍລະກົດນີ້.ປັດຈຸບັນ ເຈົ້າໜ້າທີ່ຕໍາຫລວດ ຍີ່ປຸ່ນ ໄດ້ຈັບຕົວທ້າວ Tetsuya Yamagami ອາຍຸ 41 ປີ ໃນຂໍ້ຫາເຈດຕະນາຄາດຕະກໍາຫລັງກໍ່ເຫດ ໃຊ້ປືນປະດິດຂຶ້ນເອງຍິງໃສ່ ອະດິດ ນາຍົກລັດຖະມົນຕີ ທ່ານ Shinzo Abe ຂອງຍີ່ປຸ່ນ ອາຍຸ 67 ປີ ໂດຍຖືກຍິງໃສ່ໜ້າເອິກ ແລະ ລໍາຄໍ ເຮັດໃຫ້ ໄດ້ຮັບບາດເຈັບຢ່າງໜັກ ເສຍເລືອດຫລາຍ ຈົນເສຍຊີວິດ ໃນເວລາຕໍ່ມາ.
ສຳລັບ ຜູ້ຕ້ອງຫາ ທ້າວ Tetsuya Yamagami ເປັນ ຊາວເມືອງ ນາຣະ (Nara) ເຂດກັນໄຊ (Kansai) ທາງຕາເວັນຕົກ ຂອງ ຍີ່ປຸ່ນ ແລະ ເຄີຍເຮັດວຽກຢູ່ໃນກອງກຳລັງປ້ອງກັນຕົນເອງທາງທະເລຂອງ ຍີ່ປຸ່ນ ເປັນເວລາ 3 ປີ.
ຂະນະນີ້ ເຈົ້າໜ້າທີ່ຕຳຫລວດ ຍີ່ປຸ່ນ ພວມສືບສວນສອບສວນຫາກຸ່ມຄົນທີ່ກ່ຽວຂ້ອງຕື່ມອີກ.
ຮຽບຮຽງຂ່າວໂດຍ ສະໄຫວ ລາດປາກດີ