ເລີ່ມແຕ່ວັນທີ 11 ກໍລະກົດ ເປັນຕົ້ນໄປ ກົມກົງສູນ ນະຄອນຫຼວງ ວຽງຈັນ ຈະບໍ່ຮັບເອກະສານຄໍາຮ້ອງຂໍໜັງສືຜ່ານແດນຈາກຜູ້ທີ່ມາຈາກ 6 ແຂວງ ຍົກເວັ້ນກໍລະນີ້ຈໍາເປັນ ເນື່ອງຈາກບັນດາແຂວງດັ່ງກ່າວມີສູນຮັບຄໍາຮ້ອງແລ້ວວັນທີ 7 ກໍລະກົດ 2022 ນີ້ ກົມກົງສຸນ, ກະຊວງການຕ່າງປະເທດ ໄດ້ປະກາດ ເລື່ອງການຍື່ນຄໍາຮ້ອງຂໍໜັງສືຜ່ານແດນ ທີ່ ກົມກົງສູນ ກະຊວງການຕ່າງປະເທດ ປັດຈຸບັນ ເຫັນວ່າມີປະຊາຊົນ ໄດ້ມາຍື່ນຄຳຮ້ອງຂໍໜັງສືຜ່ານແດນເປັນຈຳນວນຫຼາຍ ເຊິ່ງເກີນຂີດຄວາມສາມາດໃນການຮອງຮັບຕົວຈິງ.
ເພື່ອແກ້ໄຂສະພາບຄວາມແອອັດ, ຄວາມບໍ່ເປັນລະບຽບຮຽບຮ້ອຍ, ບັນຫາຫຍໍ້ທໍ້ຕ່າງໆທີ່ຈະກໍ່ໃຫ້ເກີດຂຶ້ນ ແລະ ການກີດຂວາງການສັນຈອນຢູ່ບໍລິເວນດ້ານໜ້າກົມກົງສູນ,ລວມໄປເຖິງການປະຫຍັດຄ່າໃຊ້ຈ່າຍໃນການເດີນທາງ, ຄ່າກິນຢູ່ພັກເຊົາຂອງພໍ່ແມ່ປະຊາຊົນທີ່ເດີນທາງມາຈາກຕ່າງແຂວງເພື່ອມາຍື່ນຄຳຮ້ອງຂໍໜັງສືຜ່ານແດນ ຢູ່ນະຄອນຫຼວງວຽງຈັນ (ກົມກົງສູນ).
ສະນັ້ນ, ນັບຕັ້ງແຕ່ວັນທີ 11 ກໍລະກົດ 2022 ເປັນຕົ້ນໄປ, ກົມກົງສູນ ຈະບໍ່ຮັບເອກະສານຄໍາຮ້ອງຂໍໜັງສືຜ່ານແດນ ຂອງທ່ານທີ່ມາຈາກບັນດາແຂວງ ທີ່ມີສູນຮັບຄໍາຮ້ອງຂໍໜັງສືຜ່ານແດນເຊັ່ນ: ແຂວງ ອຸດົມໄຊ, ໄຊຍະບູລີ, ຊຽງຂວາງ, ຄຳມ່ວນ, ສະຫວັນນະເຂດ ແລະ ຈຳປາສັກ, ຍົກເວັ້ນກໍລະນີເຈັບເປັນ ແລະ ມີຄວາມຈຊາເປັນຮີບດ່ວນຕ້ອງໄດ້ໄປປິ່ນປົວຢູ່ຕ່າງປະເທດ. ດັ່ງນັ້ນ, ຈຶ່ງຮຽກຮ້ອງມາຍັງບັນດາທ່ານທີ່ມາຈາກແຂວງດັ່ງກ່າວຂ້າງເທິງນີ້ຈົ່ງໃຫ້ການຮ່ວມມືດ້ວຍ.
ດັ່ງນັ້ນ, ຈຶ່ງຂໍແຈ້ງມາຍັງບັນດາທ່ານ ເພື່ອຊາບຕາມທາງຄວນດ້ວຍ.
