ສ.ເກົາຫຼີ ຍິງສົ່ງຈະຫຼວດສົ່ງຍານທີ່ຄົ້ນຄວ້າຜະລິດເອງຂຶ້ນສູ່ອະວະກາດຢ່າງສຳເລັດຜົນ

ອີງຕາມແຫລ່ງຂ່າວສານ​ ຊີອາໄອ​ ລາຍງານວ່າ: ເມື່ອບໍ່ດົນມານີ້ ລັດຖະບານ ສ.ເກົາຫຼີ ໄດ້ປະກາດວ່າ ປະເທດຕົນໄດ້ຍິງສົ່ງຈະຫຼວດສົ່ງຍານ “ນູຣີ” ທີ່ຄົ້ນຄວ້າຜະລິດເອງຂຶ້ນສູ່ອະວະກາດຢ່າງສຳເລັດຜົນ, ດາວທຽມທີ່ບັນທຸກໂດຍຈະຫຼວດດັ່ງກ່າວໄດ້ເຂົ້າສູ່ວົງໂຄຈອນທີ່ກຳນົດໄວ້.
ໂດຍອີງຕາມກະຊວງວິທະຍາສາດເຕັກນິກ, ຂໍ້ມູນຂ່າວສານ ແລະ ໂທລະຄົມ ສ.ເກົາຫຼີ ແລະ ສະຖາບັນຄົ້ນຄວ້າການບິນອະວະກາດ ສ.ເກົາຫຼີ ແຈ້ງໃຫ້ຮູ້ວ່າ: ເມື່ອເວລາ 16 ໂມງຂອງວັນທີ 21 ມິຖຸນານີ້ຕາມເວລາທ້ອງຖິ່ນ ຈະຫຼວດສົ່ງຍານດັ່ງກ່າວໄດ້ຮັບການຍິງສົ່ງຂຶ້ນສູ່ອະວະກາດຢູ່ສູນອະວະກາດນາໂຣທີ່ຕັ້ງຢູ່ເມືອງໂກເຮັງກັນແຂວງເຈວລານາມໂດ ຂອງ ສ.ເກົາຫຼີ, ດາວທຽມຢັ້ງຢືນກວດສອບສະ ມັດຖະພາບທີ່ບັນທຸກໂດຍຈະຫຼວດສົ່ງຍານດັ່ງກ່າວໄດ້ເຂົ້າສູ່ວົງໂຄຈອນທີ່ກຳນົດໄວ້ຢ່າງສຳເລັດຜົນ.
ກະຊວງວິທະຍາສາດເຕັກນິກ, ຂໍ້ມູນຂ່າວສານ ແລະ ໂທລະຄົມ ສ.ເກົາຫຼີ ແຈ້ງໃຫ້ຮູ້ຕື່ມວ່າ: ຄາດວ່າ ຮອດປີ 2027, ລັດຖະບານ ສ.ເກົາຫຼີ ມີແຜນຈະດຳເນີນການຍິງສົ່ງດັ່ງກ່າວອີກ 4 ຄັ້ງ ເພື່ອຍົກສູງຄວາມອາດເປັນໄປໄດ້ຂອງການຍິງສົ່ງ.