ຂ່າວສານ ຊີອາໄອ ລາຍງານ ເມື່ອທ້າຍອາທິດທີ່ຜ່ານມານີ້, ອົງການເພື່ອການຮ່ວມມື ແລະ ການພັດທະນາທາງດ້ານເສດຖະກິດ (OECD) ໄດ້ເປີດເຜີຍບົດລາຍງານໂດຍລະບຸວ່າ: ເມື່ອຮອດປີ 2060, ຜົນຜະລິດ ພລາສຕິກໃນທົ່ວໂລກຈະບັນລຸເຖິງ 1.2 ຕື້ໂຕນ ເກືອບເປັນ 3 ເທົ່າຂອງປັດຈຸບັນ; ຖ້າຫາກວ່າບໍ່ຍົກສູງປະສິດທິພາບການນຳໃຊ້ແບບໝູນວຽນອີກ ເມື່ອຮອດເວລານັ້ນ, ຈຳນວນຂີ້ເຫຍື້ອພລາສຕິກກໍຈະເພີ່ມຂຶ້ນເກືອບ 2 ເທົ່າ.
ອີງຕາມຂໍ້ມູນຂອງ OECD ສະແດງໃຫ້ເຫັນວ່າ ໃນປີ 2019 ທົ່ວໂລກໄດ້ນຳໃຊ້ຜະລິດຕະພັນພລາສຕິກປະມານ 460 ລ້ານໂຕນ ຊຶ່ງໄດ້ເພີ່ມຂຶ້ນ 1 ເທົ່າເມື່ອທຽບໃສ່ 20 ປີກ່ອນ. ສ່ວນຂີ້ເຫຍື້ອ ພລາຕິກໄດ້ເພີ່ມຂຶ້ນໜຶ່ງເທົ່າ ໂດຍມີຫຼາຍກວ່າ 350 ລ້ານໂຕນ. ໃນນັ້ນ, ມີແຕ່ຈໍານວນບໍ່ຮອດ 10% ເທົ່ານັ້ນທີ່ໄດ້ຮັບການເກັບຄືນມານຳໃຊ້. ນອກຈາກນີ້, ໃນກອງປະຊຸມດ້ານສິ່ງແວດລ້ອມຂອງອົງການສະຫະປະຊາຊາດຄັ້ງທີ 5 ໄດ້ຮັບຮອງເອົາຮ່າງມະຕິກ່ຽວກັບການຢຸດຕິມົນລະພິດພລາສຕິກຢູ່ນະຄອນຫຼວງ ໄນໂຣບີ ປະເທດ ເຄັນຢາ ຊຶ່ງມະຕິສະບັບນີ້, ມີຜົນບັງຄັບໃຊ້ໃນດ້ານກົດໝາຍ ໂດຍມີຈຸດປະສົງເພື່ອຊຸກຍູ້ໃຫ້ທົ່ວໂລກແກ້ໄຂມົນລະພິດພລາສຕິກ.
