ມາຮອດປັດຈຸບັນ ແຂວງ ຊຽງຂວາງ ໄດ້ມີຄວາມພ້ອມ 70% ໃນການເປັນເຈົ້າພາບຈັດງານກິລາແຫ່ງຊາດຄັ້ງທີ 11 ຫລື ຊຽງຂວາງເກມ ເຊິ່ງລັດຖະບານ ກໍຄື ແຂວງຊຽງຂວາງ ໄດ້ກໍານົດເອົາ ວັນທີ 13-22 ທັນວາ 2022 ທີ່ຈະມາເຖິງນີ້, ເປັນມື້ເປີດ-ປິດ.
ທ່ານ ບົວເງິນ ຫຸມໄຊຍະພົມ ຮອງເຈົ້າແຂວງໆຊຽງຂວາງ ລາຍງານໃຫ້ຮູ້ ໃນວັນທີ 16 ພຶດສະພາ 2022 ນີ້ວ່າ: ງານກິລາແຫ່ງຊາດ ຄັ້ງທີ 11 ທີ່ຈະຈັດຂຶ້ນ ໃນຕົ້ນ ເດືອນ ທັນວາ 2022 ພາຍໃຕ້ຄໍາຂວັນ: “ເປັນເຈົ້າພາບຮ່ວມກັນທີ່ດີ” ໂດຍໄດ້ກໍານົດເອົາວັນທີ 13 ທັນວາ ເຊິ່ງເປັນວັນຄ້າຍວັນເກີດຂອງ ປະທານ ໄກສອນ ພົມວິຫານ ເປັນມື້ເປີດງານກິລາແຫ່ງຊາດ ຄັ້ງທີ 11 ແລະ ວັນທີ 22 ທັນວາ 2022 ເປັນມື້ປິດງານ. ມາຮອດປັດຈຸບັນ, ພວມກະກຽມບຸກຄະລາກອນຄືນໃໝ່ ພາຍຫລັງທີ່ໄດ້ມີການຍົກເລີກມາຫລາຍຄັ້ງ ໂດຍໄດ້ປັບປຸງບຸກຄະລາກອນຜູ້ທີ່ຈະຮັບຜິດຊອບໃນ 10 ອະນຸກໍາມະການໃຫຍ່, ສ່ວນທາງດ້ານພື້ນຖານໂຄງລ່າງ ແມ່ນໄດ້ມອບໃຫ້ກອງເລຂາພະແນກສຶກສາທິການ ແລະ ກິລາແຂວງຊຽງຂວາງ ກວດກາຄືນໃໝ່ສະໜາມແຂ່ງຂັນກິ ລາ, ບານເຕະ, ປິ່ງປ່ອງ ແລະ ອື່ນໆ ພ້ອມທັງຂຶ້ນແຜນສ້ອມແປງຈຸດທີ່ຍັງຄົງຄ້າງໃຫ້ຮັບປະກັນ ໃນການຈັດງານມະຫາກໍາກິລາຄັ້ງນີ້.
ທ່ານ ບົວເງິນ ຫຸມໄຊຍະພົມ ຍັງໃຫ້ຮູ້ອີກວ່າ: ສຳລັບການແຂ່ງຂັນກິລາປະເພດຕ່າງໆ ຈະເລີ່ມແຕ່ວັນທີ 9 ພະຈິກ ເປັນຕົ້ນໄປ ແລະ ບາງປະເພດກິລາແມ່ນຈະຈັດການແຂ່ງຂັນຢູ່ນະຄອນຫລວງວຽງຈັນ. ສ່ວນດ້ານງົບປະມານແມ່ນໄດ້ກວດສອບຄືນໃໝ່ ເພື່ອຈະນໍາສະເໜີລັດຖະບານ ຊອກຫາວິທີແກ້ໄຂ.
ຂໍ້ມູນ-ພາບຈາກ: ຊີອາໄອ