ສຳນັກຂ່າວ ເອພີ ລາຍງານວ່າ, ທ່ານ ໂຈ ໄບເດັນ (Joe Biden), ປະທານາທິບໍດີ ສ.ອາເມຣິກາ ຈະເປັນເຈົ້າພາບ ຈັດກອງປະຊຸມສຸດຍອດກັບບັນດາຜູ້ນຳປະເທດສະມາຊິກ ອາຊຽນ ທີ່ນະຄອນຫລວງ ວໍຊີງຕັນ ໃນລະຫວ່າງ ວັນທີ 12-13 ພືດສະພາ ນີ້.
ກອງປະຊຸມຄັ້ງນີ້ ຈະເປັນວາລະຄົບຮອບ 45 ປີ ແຫ່ງການພົວພັນ ສ.ອາເມຣິກາ-ອາຊຽນ ສືບຕໍ່ຈາກກອງປະຊຸມທີ່ ທ່ານ ໂຈໄບເດັນ ເຂົ້າຮ່ວມກອງປະຊຸມສຸດຍອດຜູ້ນຳ ອາຊຽນ ແລະ ປະເທດພັນທະມິດເມື່ອເດືອນ ຕຸລາ ປີຜ່ານມານີ້ ພ້ອມທັງປະກາດໃຫ້ການຊ່ວຍເຫລືອ ອາຊຽນ ມູນຄ່າ 102 ລ້ານໂດລາສະຫະລັດ ໃນການຕໍ່ສູ້ກັບພະຍາດ ໂຄວິດ-19 ແລະ ຄວາມໝັ້ນຄົງທາງສຸຂະພາບ ລວມທັງການຮັບມືສະພາວະໂລກຮ້ອນ, ສະໜັບສະໜູນ ການຂະຫຍາຍຕົວທາງເສດຖະກິດ ແລະ ສ້າງຄວາມເທົ່າທຽມທາງເພດ.
