ສຳນັກຂ່າວ BBC ລາຍງານໃນວັນທີ16 ພຶດສະພາ ນີ້ວ່າ, ສະຫະປະຊາຊາດ (ສປຊ)ເຕືອນວ່າ: ໄພແຫ້ງແລ້ງ ມີທ່າອ່ຽງເພີ່ມຄວາມຮຸນແຮງຂຶ້ນ ແລະ ແກ່ຍາວອອກໄປອີກ ເຮັດໃຫ້ເກີດຄວາມເສຍຫາຍ ແລະ ສົ່ງຜົນກະທົບຕໍ່ຊັບສິນ ແລະ ຊີວິດຢ່າງໜັກໜ່ວງ ພ້ອມທັງສະໜີແນວທາງແກ້ໄຂບັນຫາຢ່າງມີປະສິດທິຜົນພາຍຫລັງໄດ້ເຜີຍແຜ່ ບົດລາຍງານກ່ຽວກັບຕົວເລກໄພແຫ້ງແລ້ງ ປີ 2022 ໃນໄລຍະກອງປະຊຸມໃຫຍ່ສະຫະປະຊາຊາດ (COP) ປະຈຳປີ ຄັ້ງທີ 15 ຈັດຕັ້ງໂດຍສົນທິສັນຍາສະຫະປະຊາຊາດ ວ່າດ້ວຍການຕໍ່ຕ້ານການປ່ຽນແປງສະພາບເປັນທະເລຊາຍ (UNCCD) ໄດ້ຊີ້ໃຫ້ເຫັນວ່າ: ໄພແຫ້ງແລ້ງເພີ່ມຂຶ້ນ 29% ແລະ ບັນຫານີ້ຈະເກີດຂຶ້ນ ໄວກວ່າເກົ່າ ເຖິງວ່າໄພແຫ້ງແລ້ງຈະເປັນສ່ວນໄພພິບັດທາງທຳມະຊາດພຽງ 15% ແຕ່ນັບເປັນອັດຕາສ່ວນຂອງການເສຍຊີວິດກ່ຽວກັບ ໄພພິບັດ ເຖິງ 45%.
ຕັ້ງແຕ່ປີ 1998 ຫາ 2017, ໄພແຫ້ງແລ້ງສ້າງຄວາມເສຍຫາຍຫລາຍກວ່າ 124 ຕື້ໂດລາ ແລະ ປະຊາກອນໂລກ ເສຍຊີວິດປະມານ 650,000 ຄົນ ໃນລະຫວ່າງ ປີ 1970 ຫາ 2019. ປັດຈຸບັນ ມີປະຊາກອນ ຫລາຍກວ່າ 2,3 ຕື້ຄົນລວມທັງເດັກນ້ອຍ 160 ລ້ານຄົນ ທີ່ອາໄສຢູ່ໃນປັດໄຈ ສະພາບແວດລ້ອມທີ່ມີຊັບພະຍາກອນນ້ໍາບໍ່ໝັ້ນຄົງ ນອກຈາກນັ້ນ ຖ້າໄພແຫ້ງແລ້ງ ຍັງສືບຕໍ່ຮ້າຍແຮງຂຶ້ນ ແລະ ບໍ່ມີການຈັດການກັບບັນຫານີ້ຈະມີຜູ້ອົບພະຍົບຈາກການປ່ຽນແປງຂອງດິນຟ້າອາກາດສູງຂຶ້ນເຖິງ 700 ລ້ານຄົນ ພາຍໃນປີ 2030 ປະຊາກອນເດັກປະມານ 1 ໃນ 4 ຂອງໂລກຈະຢູ່ໃນສະຖານະທີ່ຂາດແຄນນ້ຳຢ່າງຮຸນແຮງ ພາຍໃນປີ 2040 ແລະ ຫລາຍກວ່າ 3 ໃນ4 ຂອງໂລກ ອາດໄດ້ຮັບຜົນກະທົບເຊັ່ນດຽວກັນພາຍໃນປີ 2050.
